1 Peter 1
First Epistle of Peter
܀ ܐܓܪܬܐ ܩܕܡܝܬܐ ܕܦܛܪܘܣ ܐ ܀
1- ܦܶܛܪܳܘܣ ܫܠܺܝܚܳܐ ܕܝܶܫܽܘܥ ܡܫܺܝܚܳܐ܆ ܠܰܓܒܰܝ̈ܳܐ ܘܬܰܘ̈ܬܳܒܶܐ ܕܰܙܪܺܝܥܺܝܢ ܒܦܳܢܛܳܘܣ. ܘܰܒܓܰܠܰܛܺܝܰܐ. ܘܰܒܩܰܦܰܕܽܘܩܝܰܐ ܘܒܰܐܣܺܝܰܐ. ܘܰܒܒܺܝܬܽܘܢܺܝܰܐ܇
2- ܐܰܝܠܶܝܢ ܕܶܐܬܓܒܺܝܘ ܒܰܡܩܰܕܡܽܘܬ ܝܺܕܰܥܬܶܗ ܕܰܐܠܳܗܳܐ ܐܰܒܳܐ܁ ܒܩܰܕܺܝܫܽܘܬܳܐ ܕܪܽܘܚܳܐ܇ ܕܢܶܗܘܽܘܢ ܠܡܰܫܡܰܥܬܳܐ ܘܠܰܪܣܳܣ ܕܡܶܗ ܕܝܶܫܽܘܥ ܡܫܺܝܚܳܐ. ܛܰܝܒܽܘܬܳܐ ܘܰܫܠܳܡܳܐ ܢܶܣܓܶܐ ܠܘܳܬܟܽܘܢ܀
3- ܡܒܰܪܰܟ ܗ̱ܘ ܐܰܠܳܗܳܐ ܐܰܒܽܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ܇ ܗܰܘ ܕܒܰܚܢܳܢܶܗ ܣܰܓܺܝܳܐܐ ܐܰܘܠܕܰܢ ܡܶܢ ܕܪܺܝܫ܇ ܒܰܩܝܳܡܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܠܣܰܒܪܳܐ ܕܚܰܝ̈ܶܐ.
4- ܘܰܠܝܳܪܬܽܘܬܳܐ ܕܠܳܐ ܡܶܬܚܰܒܠܳܐ ܘܠܳܐ ܡܶܬܛܰܢܦܳܐ ܘܠܳܐ ܚܳܡܝܳܐ. ܗܳܝ ܕܰܡܛܰܝܒܳܐ ܠܟܽܘܢ ܒܰܫܡܰܝܳܐ.
5- ܟܰܕ ܢܛܺܝܪܺܝܢ ܐܢ̱ܬܽܘܢ ܒܚܰܝܠܳܐ ܕܰܐܠܳܗܳܐ ܘܰܒܗܰܝܡܳܢܽܘܬܳܐ܆ ܠܚܰܝ̈ܶܐ ܕܰܡܛܰܝܒܺܝܢ ܕܢܶܬܓܠܽܘܢ ܠܙܰܒ̈ܢܶܐ ܐ̱ܚܪ̈ܳܝܶܐ܇
6- ܕܰܒܗܽܘܢ ܬܶܚܕܽܘܢ ܠܥܳܠܰܡ܆ ܐܳܦܶܢ ܒܗܳܢܳܐ ܙܰܒܢܳܐ ܩܰܠܺܝܠ ܡܶܬܬܥܺܝܩܺܝܢ ܐܢ̱ܬܽܘܢ ܒܢܶܣܝܽܘ̈ܢܶܐ ܡܫܰܚ̈ܠܦܶܐ ܕܥܳܕܶܝܢ ܥܠܰܝܟܽܘܢ܆
7- ܐܰܝܟܰܢܳܐ ܕܒܽܘܚܪܳܢܳܐ ܕܗܰܝܡܳܢܽܘܬܟܽܘܢ ܢܶܬܚܙܶܐ܇ ܕܰܡܝܰܬܰܪ ܡܶܢ ܕܰܗܒܳܐ ܣܢܺܝܢܳܐ ܕܶܐܬܒܩܺܝ ܒܢܽܘܪܳܐ܇ ܠܬܶܫܒܽܘܚܬܳܐ ܘܠܺܐܝܩܳܪܳܐ ܘܰܠܩܽܘܠܳܣܳܐ. ܒܓܶܠܝܳܢܶܗ ܕܝܶܫܽܘܥ ܡܫܺܝܚܳܐ.
8- ܗܰܘ ܕܠܳܐ ܚܙܰܝܬܽܘܢܳܝܗ̱ܝ ܘܡܰܚܒܺܝܢ ܐܢ̱ܬܽܘܢ ܠܶܗ. ܘܰܒܗܰܝܡܳܢܽܘܬܶܗ ܪܳܘܙܺܝܢ ܐܢ̱ܬܽܘܢ ܒܚܰܕܽܘܬܳܐ ܡܫܰܒܰܚܬܳܐ ܕܠܳܐ ܡܶܬܡܰܠܠܳܐ܆
9- ܕܰܬܩܰܒܠܽܘܢ ܦܽܘܪܥܳܢܳܐ ܕܗܰܝܡܳܢܽܘܬܟܽܘܢ. ܚܰܝ̈ܶܐ ܕܢܰܦ̈ܫܳܬܟܽܘܢ܀
10- ܗܳܢܽܘܢ ܚܰܝ̈ܶܐ ܕܥܰܩܶܒܘ ܗ̱ܘܰܘ ܥܠܰܝܗܽܘܢ ܢܒܺܝ̈ܶܐ܇ ܟܰܕ ܐܶܬܢܰܒܺܝܘ ܥܰܠ ܛܰܝܒܽܘܬܳܐ ܕܰܥܬܺܝܕܳܐ ܗ̱ܘܳܬ ܕܬܶܬܺܝܗܶܒ ܠܟܽܘܢ.
11- ܘܰܒܨܰܘ ܕܒܰܐܝܢܳܐ ܙܰܒܢܳܐ ܡܚܰܘܝܳܐ ܘܡܰܣܗܕܳܐ ܪܽܘܚܶܗ ܕܰܡܫܺܝܚܳܐ ܕܥܳܡܪܳܐ ܒܗܽܘܢ܆ ܕܰܥܬܺܝܕܺܝܢ ܚܰܫܰܘ̈ܗ̱ܝ ܕܰܡܫܺܝܚܳܐ ܘܬܶܫܒܽܘܚܬܶܗ ܕܡܶܢ ܒܳܬܰܪܟܶܢ.
12- ܘܶܐܬܓܠܺܝ ܠܗܽܘܢ܁ ܟܽܠ ܕܒܳܨܶܝܢ ܗ̱ܘܰܘ. ܡܶܛܽܠ ܕܠܰܘ ܠܢܰܦܫܗܽܘܢ ܒܳܥܶܝܢ ܗ̱ܘܰܘ܆ ܐܶܠܳܐ ܠܰܢ ܕܺܝܠܰܢ ܡܶܬܢܰܒܶܝܢ ܗ̱ܘܰܘ܆ ܐܰܝܠܶܝܢ ܕܗܳܫܳܐ ܐܶܬܓܠܺܝ ܠܟܽܘܢ܇ ܒܝܰܕ ܐܰܝܠܶܝܢ ܕܣܰܒܰܪܢܳܟܽܘܢ. ܒܪܽܘܚܳܐ ܕܩܽܘܕܫܳܐ ܕܶܐܫܬܰܕܰܪ ܡܶܢ ܫܡܰܝܳܐ. ܕܰܒܗܶܝܢ ܒܗܳܠܶܝܢ ܡܶܬܪܰܓܪܓܺܝܢ ܐܳܦ ܡ̈ܰܠܰܐܟܶܐ. ܕܰܢܕܰܝܩܽܘܢ܀
13- ܡܶܛܽܠ ܗܳܢܳܐ ܚܙܽܘܩܘ ܚ̈ܰܨܶܐ ܕܬܰܪ̈ܥܝܳܬܟܽܘܢ܆ ܘܶܐܬܬܥܺܝܪܘ ܓܡܺܝܪܳܐܺܝܬ. ܘܣܰܒܰܪܘ ܥܰܠ ܚܰܕܽܘܬܳܐ ܕܳܐܬܝܳܐ ܠܟܽܘܢ܇ ܒܓܶܠܝܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܇
14- ܐܰܝܟ ܒܢܰܝ̈ܳܐ ܡܶܫܬܰܡ̈ܥܳܢܶܐ. ܘܠܳܐ ܬܶܫܬܰܘܬܦܽܘܢ ܬܽܘܒ ܠܰܪ̈ܓܺܝܓܳܬܟܽܘܢ ܩܰܕ̈ܡܳܝܳܬܳܐ܇ ܐܰܝܠܶܝܢ ܕܪܳܓܺܝܢ ܗ̱ܘܰܝܬܽܘܢ ܕܠܳܐ ܒܺܝܕܰܥܬܳܐ.
15- ܐܶܠܳܐ ܗܘܰܘ ܩܰܕܺܝܫܺܝܢ ܒܟܽܠܗܽܘܢ ܗܽܘܦܳܟܰܝ̈ܟܽܘܢ܇ ܐܰܝܟ ܕܩܰܕܺܝܫ ܗܰܘ ܡܰܢ ܕܰܩܪܳܟܽܘܢ.
16- ܡܶܛܽܠ ܕܰܟܬܺܝܒ܆ ܕܰܗܘܰܝܬܽܘܢ ܩܰܕܺܝܫܺܝܢ ܐܰܝܟܰܢܳܐ ܕܳܐܦ ܐܶܢܳܐ ܩܰܕܺܝܫ ܐ̱ܢܳܐ.
17- ܘܶܐܢ ܗܽܘ ܕܰܐܒܳܐ ܩܳܪܶܝܢ ܐܢ̱ܬܽܘܢ܇ ܗܰܘ ܕܠܰܝܬ ܩܕܳܡܰܘܗ̱ܝ ܡܰܣܰܒ ܒܰܐܦ̈ܶܐ܇ ܘܕܳܐܶܢ ܠܟܽܠ ܐ̱ܢܳܫ ܐܰܝܟ ܥ̈ܒܳܕܰܘܗ̱ܝ܆ ܒܕܶܚܠܬܳܐ ܐܶܬܕܰܒܰܪܘ ܒܙܰܒܢܳܐ ܗܳܢܳܐ ܕܬܰܘܬܳܒܽܘܬܟܽܘܢ.
18- ܟܰܕ ܝܳܕܥܺܝܢ ܐܢ̱ܬܽܘܢ ܕܠܳܐ ܒܟܶܣܦܳܐ ܕܒܳܠܶܐ ܘܠܳܐ ܒܕܰܗܒܳܐ܇ ܐܶܬܦܪܶܩܬܽܘܢ ܡܶܢ ܥܒܳܕܰܝ̈ܟܽܘܢ ܣܪ̈ܺܝܩܶܐ܇ ܗܳܢܽܘܢ ܕܩܰܒܶܠܬܽܘܢ ܡܶܢ ܐܰܒܳܗܰܝ̈ܟܽܘܢ܆
19- ܐܶܠܳܐ ܒܰܕܡܳܐ ܝܰܩܺܝܪܳܐ ܕܶܐܡܪܳܐ ܕܡܽܘܡܳܐ ܘܛܽܘܠܫܳܐ. ܠܰܝܬ ܒܶܗ. ܕܺܐܝܬܰܘܗ̱ܝ ܡܫܺܝܚܳܐ.
20- ܗܰܘ ܕܰܡܩܰܕܰܡ ܗ̱ܘܳܐ ܦܪܺܝܫ ܠܗܳܕܶܐ܇ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ܆ ܘܶܐܬܓܠܺܝ ܒܰܐ̱ܚܪܳܝܬܗܽܘܢ ܕܙܰܒܢ̈ܶܐ ܡܶܛܽܠܳܬܟܽܘܢ.
21- ܐܰܝܠܶܝܢ ܕܒܺܐܝܕܶܗ ܗܰܝܡܶܢܬܽܘܢ ܒܰܐܠܳܗܳܐ܁ ܗܰܘ ܕܰܐܩܺܝܡܶܗ ܡܶܢ ܒܶܝܬ ܡܺܝ̈ܬܶܐ܇ ܘܝܰܗ̱ܒ ܠܶܗ ܫܽܘܒܚܳܐ܆ ܕܗܰܝܡܳܢܽܘܬܟܽܘܢ ܘܣܰܒܪܟܽܘܢ ܢܶܗܘܶܐ ܥܰܠ ܐܰܠܳܗܳܐ܀
22- ܟܰܕ ܢܶܗܘ̈ܝܳܢ ܩܰܕܺܝ̈ܫܳܢ ܢܰܦ̈ܫܳܬܟܽܘܢ ܒܡܶܫܬܰܡܥܳܢܽܘܬܶܗ ܕܰܫܪܳܪܳܐ܇ ܘܢܶܗܘ̈ܝܳܢ ܡܰܠ̈ܝܳܢ ܚܽܘܒܳܐ ܕܠܳܐ ܡܰܣܰܒ ܒܰܐܦ̈ܶܐ܆ ܕܡܶܢ ܠܶܒܳܐ ܕܰܟܝܳܐ ܘܰܓܡܺܝܪܳܐ܇ ܬܶܗܘܽܘܢ ܡܰܚܒܺܝܢ ܚܰܕ ܠܚܰܕ.
23- ܐܰܝܟ ܐ̱ܢܳܫ̈ܳܐ ܕܡܶܢ ܕܪܺܝܫ ܐܶܬܺܝܠܶܕܬܽܘܢ܆ ܠܳܐ ܡܶܢ ܙܰܪܥܳܐ ܕܒܳܠܶܐ. ܐܶܠܳܐ ܡܶܢ ܐܰܝܢܳܐ ܕܠܳܐ ܒܳܠܶܐ. ܒܡܶܠܬܳܐ ܚܰܝܬܳܐ ܕܰܐܠܳܗܳܐ ܕܩܰܝܳܡܳܐ ܠܥܳܠܰܡ.
24- ܡܶܛܽܠ ܕܟܽܠ ܒܣܰܪ ܐܰܝܟ ܥܡܺܝܪܳܐ. ܘܟܽܠܳܗ̇ ܝܳܐܝܽܘܬܶܗ ܐܰܝܟ ܥܽܘܦܝܳܐ ܕܚܰܩܠܳܐ. ܝܳܒܶܫ ܥܡܺܝܪܳܐ ܘܚܳܡܶܐ ܥܽܘܦܝܳܐ܆
25- ܘܡܶܠܬܶܗ ܕܰܐܠܳܗܰܢ ܩܰܝܳܡܳܐ ܠܥܳܠܡܺܝܢ. ܘܗܳܕܳܐ ܗ̱ܝ ܡܶܠܬܳܐ ܗܳܝ ܕܶܐܣܬܰܒܰܪܬܽܘܢ܀