Esther 6
The Book of Esther
܀ ܐܣܬܝܪ ܘ ܀
1 ܘܰܒܠܺܠܝܳܐ ܗܰܘ ܦܶܪܕܰܬ ܫܶܢܬܶܗ ܕܡܰܠܟܳܐ. ܘܶܐܡܰܪ ܠܡܰܥܳܠܽܘ ܣܦܰܪ ܥܽܘܗ̈ܕܳܢܶܐ ܕܡ̈ܶܠܶܐ ܕܝܰܘ̈ܡܳܬܳܐ. ܘܰܗܘܰܘ ܩܳܪܶܝܢ ܩܖ̈ܰܝ ܩܕܳܡ ܡܰܠܟܳܐ.
2 ܘܶܐܫܬܟܰܚ ܕܰܟܬܺܝܒ: ܕܚܰܘܺܝ ܡܽܘܪܕܟܰܝ: ܥܰܠ ܒܰܓܬܳܢ ܘܰܬܪܰܫ ܬܪܶܝܢ ܡܗܰܝܡܢ̈ܶܐ ܕܡܰܠܟܳܐ ܢܳܛܖ̈ܰܝ ܬܰܪܥܳܐ: ܕܰܒܥܰܘ ܕܢܰܘܫܛܽܘܢ ܐܺܝܕܰܝ̈ܗܽܘܢ ܥܰܠ ܡܰܠܟܳܐ ܐܰܚܫܺܝܪܺܝܫ.
3 ܘܶܐܡܰܪ ܡܰܠܟܳܐ: ܡܳܢܳܐ ܐܶܬܥܒܶܕ ܐܺܝܩܳܪܳܐ ܘܪܰܒܽܘܬܳܐ ܠܡܽܘܪܕܟܰܝ ܥܰܠ ܗܳܕܶܐ: ܐܳܡܪܺܝܢ ܠܶܗ ܥܰܒܕܰܘ̈ܗܝ ܠܡܰܠܟܳܐ: ܘܰܡܫܰܡܫܳܢܰܘ̈ܗܝ: ܕܠܳܐ ܐܶܬܥܒܶܕ ܠܶܗ ܡܶܕܶܡ.
4 ܘܶܐܡܰܪ ܡܰܠܟܳܐ: ܡܰܢܽܘ ܒܕܳܪܬܳܐ: ܘܗܳܡܳܢ ܐܶܬܳܐ ܠܒܶܝܬ ܡܰܠܟܳܐ ܠܕܳܪܬܳܐ ܒܰܪܳܝܬܳܐ: ܕܢܺܐܡܰܪ ܠܡܰܠܟܳܐ ܕܢܶܬܠܶܐ ܠܡܽܘܪܕܟܰܝ ܥܰܠ ܩܰܝܣܳܐ ܕܰܐܬܩܶܢ ܠܶܗ.
5 ܘܥܰܠ ܗܳܡܳܢ. ܘܶܐܡܰܪ ܠܶܗ ܡܰܠܟܳܐ: ܡܳܢܳܐ ܘܳܠܶܐ ܠܡܶܥܒܰܕ ܠܓܰܒܪܳܐ: ܕܡܰܠܟܳܐ ܨܳܒܶܐ ܒܺܐܝܩܳܪܶܗ. ܘܶܐܡܰܪ ܗܳܡܳܢ ܒܠܶܒܶܗ: ܠܡܰܢܽܘ ܨܳܒܶܐ ܡܰܠܟܳܐ ܠܡܶܥܒܰܕ ܐܺܝܩܳܪܳܐ ܝܰܬܺܝܪ ܡܶܢ ܕܺܝܠܝ.
6 ܘܳܐܡܪܺܝܢ ܠܶܗ ܥܠܰܝܡܰܘ̈ܗܝ ܠܡܰܠܟܳܐ: ܗܳܐ ܗܳܡܳܢ ܩܳܐܶܡ ܒܕܳܪܬܳܐ. ܘܶܐܡܰܪ ܡܰܠܟܳܐ: ܢܶܥܽܘܠ.
7 ܘܶܐܡܰܪ ܗܳܡܳܢ ܠܡܰܠܟܳܐ: ܠܓܰܒܪܳܐ ܕܡܰܠܟܳܐ ܨܳܒܶܐ ܒܺܐܝܩܳܪܶܗ.
8 ܢܰܝܬܽܘܢ ܠܒܽܘ̈ܫܶܐ ܕܡܰܠܟܽܘܬܳܐ: ܕܠܳܒܶܫ ܡܰܠܟܳܐ: ܘܣܽܘܣܝܳܐ ܕܪܳܟܶܒ ܥܠܰܘܗܝ ܡܰܠܟܳܐ: ܟܰܕ ܐܰܢ̱ܬ ܬܣܺܝܡ ܬܳܓܳܐ ܕܡܰܠܟܽܘܬܳܐ ܒܪܺܝܫܶܗ.
9 ܘܢܶܬܺܝܗܶܒ ܠܒܽܘܫܳܐ ܘܣܽܘܣܝܳܐ ܠܚܰܕ ܡܶܢ ܚܺܐܖ̈ܶܐ ܕܡܰܠܟܳܐ ܦܰܖ̈ܬܘܳܝܶܐ. ܘܢܰܠܒܫܺܝܘܗܝ ܠܓܰܒܪܳܐ: ܕܡܰܠܟܳܐ ܨܳܒܶܐ ܒܺܐܝܩܳܪܶܗ. ܘܢܰܪܟܒܽܘܢܶܗ ܥܰܠ ܣܽܘܣܝܳܐ: ܘܢܰܚܕܪܽܘܢܶܗ ܒܫܽܘ̈ܩܶܐ: ܘܢܶܩܪܽܘܢ ܩܕܳܡܰܘܗܝ: ܗܳܟܰܢܳܐ ܢܶܬܥܒܶܕ ܠܓܰܒܪܳܐ: ܕܡܰܠܟܳܐ ܨܳܒܶܐ ܒܺܐܝܩܳܪܶܗ.
10 ܘܶܐܡܰܪ ܡܰܠܟܳܐ ܠܶܗܡܳܢ: ܒܰܥܓܰܠ ܣܰܒ ܠܒܽܘܫܳܐ: ܘܰܕܒܰܪ ܣܽܘܣܝܳܐ ܐܰܝܟ ܕܶܐܡܰܪܬ. ܘܰܥܒܶܕ ܗܳܟܰܢܳܐ ܠܡܽܘܪܕܟܰܝ ܝܽܗܘܕܳܝܳܐ: ܕܝܳܬܶܒ ܒܬܰܪܥܳܐ ܕܡܰܠܟܳܐ. ܘܠܳܐ ܬܒܰܨܰܪ ܡܶܠܬܳܐ ܡܶܢ ܟܽܠ ܡܶܕܶܡ ܕܶܐܡܰܪܬ.
11 ܘܰܢܣܰܒ ܗܳܡܳܢ ܠܒܽܘ̈ܫܶܐ: ܘܰܕܒܰܪ ܣܽܘܣܝܳܐ: ܘܰܐܠܒܫܶܗ ܠܡܽܘܪܕܟܰܝ ܘܰܐܟܪܟܶܗ ܒܫܽܘ̈ܩܶܐ ܕܰܡܕܺܝܢ̱ܬܳܐ: ܘܰܩ̣ܪܳܐ ܩܕܳܡܰܘܗܝ: ܗܳܟܰܢܳܐ ܢܶܬܥܒܶܕ ܠܓܰܒܪܳܐ ܕܡܰܠܟܳܐ ܨܳܒܶܐ ܒܺܐܝܩܳܪܶܗ.
12 ܘܶܐܬܳܐ ܡܽܘܪܕܟܰܝ ܠܬܰܪܥܳܐ ܕܡܰܠܟܳܐ. ܘܗܳܡܳܢ ܐܶܙܰܠ ܠܒܰܝܬܶܗ: ܟܰܕ ܐܰܒܺܝܠ ܘܰܡܚܰܦܰܝ ܪܺܝܫܶܗ.
13 ܘܶܐܫܬܰܥܺܝ ܗܳܡܳܢ ܠܙܳܪܶܫ ܐܰܢ̱ܬܬܶܗ ܟܽܠ ܡܶܕܶܡ ܕܰܓܕܰܫ ܠܶܗ. ܘܳܐܡܪܺܝܢ ܠܶܗ ܖ̈ܳܚܡܰܘܗܝ ܘܙܳܪܶܫ ܐܰܢ̱ܬܬܶܗ: ܐܶܢ ܡܶܢ ܙܰܪܥܰܐ ܗ̱ܘ ܕܺܝܗܽܘ̈ܕܳܝܶܐ ܡܽܘܪܕܟܰܝ. ܘܫܰܪܺܝܬ ܠܡܶܦܰܠ ܩܕܳܡܰܘܗܝ: ܕܠܳܐ ܡܨܶܐ ܐܰܢ̱ܬ ܚܰܝܠܶܗ: ܐܶܠܳܐ ܬܽܘܒ ܢܳܦܶܠ ܐܰܢ̱ܬ ܩܕܳܡܰܘܗܝ.
14 ܘܥܰܕ ܗܽܘ ܡܡܰܠܶܠ ܥܰܡܗܽܘܢ: ܡܰܛܺܝܘ ܖ̈ܰܗܳܛܶܐ ܕܡܰܠܟܳܐ. ܘܣܰܪܗܒܽܘܗܝ ܠܶܗܡܳܢ ܠܡܰܫܬܝܳܐ ܕܥܶܒܕܰܬ ܐܶܣܬܺܝܪ.