1 Maccabees 11
The First Book of Maccabees
܀ ܐ ܡܩܒܝ̈ܐ ܝܐ ܀
1 ܘܡܰܠܟܳܐ ܕܡܶܨܪܶܝܢ ܟܰܢܶܫ ܠܶܗ ܚܰܝܠܳܐ ܣܰܓܺܝܐܳܐ: ܐܰܝܟ ܚܳܠܳܐ ܕܥܰܠ ܣܶܦܬܶܗ ܕܝܰܡܳܐ: ܘܶܐܠܦ̈ܶܐ ܣܰܓܺܝ̈ܐܳܬܳܐ. ܘܰܨܒܳܐ ܕܢܶܐܚܽܘܕ ܡܰܠܟܽܘܬܶܗ ܕܰܐܠܶܟܣܰܢܕܪܽܘܣ ܒܢܶܟܠܳܐ: ܕܢܰܘܣܦܺܝܗ̇ ܥܰܠ ܡܰܠܟܽܘܬܶܗ.
2 ܘܰܢܦܰܩ ܠܣܽܘܪܺܝܰܐ ܒܡ̈ܶܠܶܐ ܕܰܫܠܳܡܳܐ. ܘܦܳܬܚܺܝܢ ܗܘܰܘ ܠܶܗ ܝܳܬܒܰܝ̈ ܡܕܺܝ̈ܢܳܬܳܐ ܘܳܐܪܥܺܝܢ ܗܘܰܘ ܠܶܗ. ܡܶܛܽܠ ܕܰܦܩܰܕ ܗܘܳܐ ܐܰܠܶܟܣܰܢܕܪܽܘܣ ܕܢܶܗܘܽܘܢ ܐܳܪܥܺܝܢ ܠܶܗ ܐܰܝܟ ܕܠܰܚܡܽܘܗܝ.
3 ܟܰܕ ܕܶܝܢ ܥܳܐܶܠ ܗܘܳܐ ܦܛܽܘܠܡܶܐܳܘܣ ܠܰܡܕܺܝ̈ܢܳܬܳܐ: ܫܳܒܶܩ ܗܘܳܐ ܚܰܝܠܳܐ ܘܢܳܛܽܘܖ̈ܶܐ ܒܟܽܠܗܶܝܢ.
4 ܘܟܰܕ ܕܶܝܢ ܡܰܛܺܝ ܠܙܽܘܛܽܘܣ: ܚܰܘܺܝܘ ܠܶܗ ܠܒܶܝܬ ܕܳܓܽܘܢ ܦܬܰܟܪܳܐ ܕܡܰܘܩܰܕ ܒܢܽܘܪܳܐ: ܘܠܙܘܛܘܣ ܘܰܠܟܽܠ ܕܰܚܕܳܪ̈ܶܝܗ̇ ܟܰܕ ܡܣܰܚ̈ܦܳܢ: ܘܦܰܓܖ̈ܶܐ ܟܰܕ ܫܕܶܝܢ. ܘܡܰܘܩ̈ܕܶܐ ܗܳܢܽܘܢ ܕܰܐܘܩܶܕܘ ܒܰܩܪܳܒܳܐ. ܘܰܥܒܰܕܘ ܟܳܫ̈ܝܳܢ ܟܳܫ̈ܝܳܢ ܒܽܐܘܪܚܳܐ.
5 ܘܶܐܫܬܰܥܺܝܘ ܠܶܗ ܠܡܰܠܟܳܐ ܟܽܠ ܕܰܥܒܰܕ ܐܰܝܟ ܕܰܠܨܰܥܪܶܗ ܕܺܝܠܶܗ. ܘܟܰܕ ܫܡܰܥ ܡܰܠܟܳܐ ܫܬܶܩ ܠܶܗ.
6 ܘܰܐܪܥܶܗ ܝܽܘܢܳܬܳܢ ܠܡܰܠܟܳܐ ܒܝܽܘܦܺܐ ܒܬܶܫܒܽܘܚܬܳܐ ܪܰܒܬܳܐ. ܘܫܶܐܠܘ ܒܰܫܠܳܡܳܐ ܚܰܕ ܕܚܰܕ. ܘܒܳܬܘ ܬܰܡܳܢ.
7 ܘܶܐܙܰܠ ܝܽܘܢܳܬܳܢ ܥܰܡ ܡܰܠܟܳܐ ܥܕܰܡܳܐ ܠܢܰܗܪܳܐ ܕܡܶܬܩܪܶܐ ܒܰܪ ܚܺܐܖ̈ܶܐ. ܘܰܗܦܰܟ ܠܽܐܘܪܺܫܠܶܡ.
8 ܦܛܽܘܠܡܶܐܳܘܣ ܕܶܝܢ ܡܰܠܟܳܐ ܐܶܫܬܰܠܰܛ ܥܰܠ ܟܽܠܗܶܝܢ ܡܕܺܝ̈ܢܳܬܳܐ ܕܒܰܚܒܶܠ ܝܰܡܳܐ ܥܕܰܡܳܐ ܠܣܰܠܽܘܩܝܰܐ ܕܥܰܠ ܓܶܢܒ ܝܰܡܳܐ. ܘܡܶܬܚܰܫܰܒ ܗܘܳܐ ܥܰܠ ܐܰܠܶܟܣܰܢܕܪܽܘܣ ܡܰܚ̈ܫܒܳܬܳܐ ܒܺܝ̈ܫܳܬܳܐ.
9 ܘܫܰܕܰܪ ܐܺܝܙܓܰܕ̈ܶܐ ܠܘܳܬ ܕܦܛܽܘܠܡܶܐܳܘܣ ܡܰܠܟܳܐ ܘܶܐܡܰܪ ܠܶܗ. ܬܳܐ ܢܩܺܝܡ ܩܝܳܡܳܐ ܚܰܕ ܥܰܡ ܚܰܕ. ܘܶܐܬܶܠ ܠܳܟ ܠܰܒܪܰܬܝ ܗܳܝ ܕܰܫܩܰܠ ܐܰܠܶܟܣܰܢܕܪܽܘܣ. ܘܬܰܡܠܶܟ ܒܡܰܠܟܽܘܬܶܗ ܕܰܐܒܽܘܟ.
10 ܘܶܐܬܬܘܺܝܬ ܓܶܝܪ ܥܰܠ ܕܝܶܗܒܶܬ ܠܶܗ ܒܪܰܬܝ. ܡܶܛܽܠ ܕܰܨܒܳܐ ܕܢܶܩܛܠܰܢܝ.
11 ܘܫܳܛܶܗ ܘܰܐܣܠܶܝܗ. ܡܶܛܽܠ ܕܪܰܓ ܗܘܳܐ ܡܰܠܟܽܘܬܶܗ.
12 ܘܢܰܣܒܶܗ ܠܒܰܪܬܶܗ ܡܶܢܶܗ. ܘܝܰܗܒܳܗ̇ ܠܕܺܡܰܛܪܺܝܳܘܣ. ܘܶܐܫܬܰܚܠܰܦ ܥܰܠ ܐܰܠܶܟܣܰܢܕܪܽܘܣ: ܘܶܐܬܓܰܠܝܰܬ ܒܥܶܠܕܒܳܒܽܘܬܶܗ.
13 ܘܥ̣ܰܠ ܦܛܽܘܠܡܶܐܳܘܣ ܠܰܐܢܛܝܳܟܺܝܰܐ. ܘܰܩܛܰܪ ܬܳܓܳܐ ܕܰܐܣܝܳܐ. ܘܣܳܡ ܬܪܶܝܢ ܬܳܓܺܝ̈ܢ ܒܪܺܝܫܶܗ: ܡܶܢ ܐܰܣܝܳܐ ܘܰܥܕܰܡܳܐ ܠܡܶܨܪܶܝܢ.
14 ܘܰܐܠܶܟܣܰܢܕܪܽܘܣ ܕܶܝܢ ܡܰܠܟܳܐ ܒܩܺܝܠܺܝܩܝܰܐ ܗܘܳܐ ܒܗܰܘ ܙܰܒܢܳܐ. ܡܶܛܽܠ ܕܰܡܪܰܕܘ ܗܘܰܘ ܥܠܰܘܗܝ ܒܢܰܝ̈ ܐܰܬܪܳܐ ܗܰܘ.
15 ܘܰܫܡܰܥ ܐܰܠܶܟܣܰܢܕܪܽܘܣ ܘܶܐܬܳܐ ܥܠܰܘܗܝ ܠܰܩܪܳܒܳܐ. ܘܰܢܦܰܩ ܦܛܽܘܠܡܶܐܳܘܣ ܠܩܽܘܒܠܶܗ ܒܚܰܝܠܳܐ ܣܰܓܺܝܐܳܐ ܘܒܺܐܝܕܳܐ ܬܰܩܝܦܬܳܐ. ܘܰܙܟܳܝܗܝ ܗܘܳܐ ܠܰܐܠܶܟܣܰܢܕܪܽܘܣ.
16 ܘܰܥܪܰܩ ܐܶܠܶܟܣܰܢܪܺܘܣ ܠܥܰܪܰܒܺܝܰܐ ܕܢܶܣܬܰܬܰܪ ܬܰܡܳܢ. ܦܛܽܘܠܡܶܐܳܘܣ ܕܶܝܢ ܡܰܠܟܳܐ ܐܶܬܬܪܺܝܡ.
17 ܘܰܢܣܰܒ ܙܰܒܕܺܝܐܶܝܠ ܥܰܪܰܒܳܝܳܐ ܪܺܝܫܶܗ ܕܰܐܠܶܟܣܰܢܕܪܽܘܣ. ܘܫܰܕܪܶܗ ܠܰܦܛܽܘܠܡܰܐܺܝܣ.
18 ܘܦܛܽܘܠܡܶܐܳܘܣ ܡܰܠܟܳܐ: ܐܳܦ ܗܽܘ ܡܺܝܬ ܠܰܬܠܳܬܳܐ ܝܰܘ̈ܡܺܝܢ. ܘܰܐܝܠܶܝܢ ܕܰܫܒܰܩ ܗܘܳܐ ܒܚܶܣܢ̈ܶܐ: ܡܺܝܬܘ ܗܘܰܘ ܡܶܢܗܽܘܢ ܒܚܶܣܢ̈ܶܐ.
19 ܘܰܐܡܠܶܟ ܕܺܡܰܛܪܺܝܳܘܣ ܒܰܫܢܰܬ ܡܳܐܐ ܘܫܬܺܝܢ ܘܰܫܒܰܥ.
20 ܒܗܳܢܽܘܢ ܝܰܘ̈ܡܳܬܳܐ. ܟܰܢܶܫ ܝܽܘܢܳܬܳܢ ܚܰܝܠܶܐ ܡܶܢ ܝܺܗܽܘܕܳܐ: ܕܢܶܬܟܰܬܰܫ ܥܰܡ ܝܳܬܒܰܝ̈ ܡܶܪܕܳܐ ܕܒܽܐܘܪܺܫܠܶܡ. ܘܰܥܒܰܕ ܥܠܘܰܗܝ ܡܐܟܢܘ̈ܣ ܣܰܓܺܝ̈ܐܳܬܳܐ.
21 ܘܶܐܙܰܠܘ ܐ̱ܢܳܫܺܝ̈ܢ ܣܳܢܝܰܝ̈ ܥܰܡܗܽܘܢ ܓܰܒܖ̈ܶܐ ܥܰܘ̈ܳܠܶܐ ܠܘܳܬ ܡܰܠܟܳܐ: ܘܶܐܡܰܪ ܠܶܗ. ܕܗܳܐ ܝܽܘܢܳܬܳܢ ܝܳܬܶܒ ܥܰܠ ܒܶܝܬ ܡܶܪܕܳܐ.
22 ܘܟܰܕܡ ܫܡܰܥ ܡܰܠܟܳܐ ܐܶܬܚܰܡܰܬ. ܘܒܰܪ ܫܶܥܬܶܗ ܕܰܫܡܰܥ ܫܩܰܠ ܘܶܐܬܳܐ ܠܰܦܛܽܘܠܡܰܐܺܝܣ. ܘܰܟܬܰܒ ܠܝܽܘܢܳܬܳܢ: ܕܠܳܐ ܢܶܬܒܽܘܢ ܥܰܠ ܡܶܪܕܳܐ. ܘܰܕܢܺܐܙܰܠ ܢܶܐܪܥܺܝܘܗܝ ܒܰܥܓܰܠ ܒܦܛܘܠܡܐܝܣ.
23 ܟܰܕ ܕܶܝܢ ܫܡܰܥ ܝܽܘܢܳܬܳܢ: ܦܩܰܕ ܢܶܬܒܽܘܢ ܥܠܰܘܗܝ ܥܰܠ ܡܶܪܕܳܐ. ܘܰܓܒܳܐ ܡܶܢ ܟܳܗ̈ܢܶܐ ܘܡܶܢ ܣܳܒ̈ܶܐ ܕܺܝܣܪܳܐܶܝܠ. ܘܝܰܗܒ ܢܰܦܫܶܗ ܠܩܝܘܢܕܝܢܘܣ.
24 ܘܰܢܣܰܒ ܕܰܗܒܳܐ ܘܣܺܐܡܳܐ ܘܡܳܐܢ̈ܶܐ: ܘܫܰܪܟܳܐ ܕܩܽܘܪ̈ܒܳܢܶܐ ܐ̱ܚܪ̈ܳܢܶܐ. ܘܶܐܙܰܠ ܠܰܦܛܽܘܠܡܰܐܺܝܣ ܠܘܳܬ ܡܰܠܟܳܐ. ܘܶܐܫܟܰܚ ܖ̈ܰܚܡܶܐ ܩܕܳܡܰܘܗܝ.
25 ܘܩܳܒܠܺܝܢ ܗܘܰܘ ܥܠܰܘܗܝ ܐ̱ܢܳܫ̈ܳܐ ܥܰܘ̈ܳܠܶܐ ܡܶܢ ܒܢܰܝ̈ ܥܰܡܳܐ.
26 ܘܰܥܒܰܕ ܠܶܗ ܡܰܠܟܳܐ ܐܰܝܟ ܕܰܥܒܰܕ ܠܶܗ ܗܰܘ ܕܡܶܢ ܩܕܳܡܰܘܗܝ. ܘܪܰܡܪܡܶܗ ܩܕܳܡ ܟܽܠܗܽܘܢ ܪ̈ܳܚܡܰܘܗܝ.
27 ܘܝܰܗܒ ܠܶܗ ܟܳܗܢܽܘܬܳܐ: ܘܟܽܠ ܐܺܝܩܳܪܳܐ ܕܺܐܝܬ ܗܘܳܐ ܠܶܗ ܡܶܢ ܩܕܺܝܡ. ܘܰܐܘܪܒܶܗ ܘܥܰܒܕܶܗ ܡܶܢ ܪ̈ܳܚܡܰܘܗܝ ܪܰܘܪ̈ܒܶܐ ܘܰܡܝܰܩܖ̈ܶܐ.
28 ܘܰܐܦܺܝܣ ܝܽܘܢܳܬܳܢ ܠܡܰܠܟܳܐ. ܘܢܶܥܒܶܕ ܠܺܝܗܽܘܕܳܐ ܕܠܳܐ ܗܘܳܬ ܡܰܣܩܳܐ ܡܰܕܰܐܬܳܐ: ܘܠܰܬܠܳܬܰܝ̈ܗܽܘܢ ܪ̈ܺܫܰܘܗܝ ܕܰܐܬܪܳܐ ܘܰܠܫܳܡܪܺܝܢ. ܘܶܐܫܬܰܘܕܺܝ ܠܶܗ ܬܠܳܬܡܳܐܐ ܟܰܟܪ̈ܺܝܢ.
29 ܘܶܐܨܛܒܺܝ ܡܰܠܟܳܐ: ܘܰܟܬܰܒ ܠܶܗ ܠܝܽܘܢܳܬܳܢ ܐܶܓܪ̈ܳܬܳܐ ܥܰܠ ܟܽܠ ܕܰܒܥܳܐ. ܘܰܟܬܺܝܒ ܒܗܶܝܢ ܗܳܟܰܢܳܐ.
30 ܕܺܡܰܛܪܺܝܳܘܣ ܡܰܠܟܳܐ ܠܝܽܘܢܳܬܳܢ ܐܳܚܝ ܘܰܠܥܰܡܳܐ ܕܺܝܗܽܘ̈ܕܳܝܶܐ: ܫܠܳܡ.
31 ܦܶܚܡܳܐ ܕܶܐܓܰܪܬܳܐ ܟܬܰܒܢ ܠܶܠܣܬܳܢܺܝܣ ܒܰܪ ܓܶܢܣܰܢ ܥܠܰܝܟܽܘܢ. ܟܬܰܒܢ ܕܶܝܢ ܐܳܦ ܠܘܳܬܟܽܘܢ: ܕܳܐܦ ܐܰܢ̱ܬܽܘܢ ܬܶܕܥܽܘܢ.
32 ܕܺܡܰܛܪܺܝܳܘܣ ܡܰܠܟܳܐ ܠܶܠܣܬܳܢܺܝܣ ܐܳܒܝ: ܫܠܳܡ.
33 ܠܥܰܡܳܐ ܕܺܝܗܽܘ̈ܕܳܝܶܐ ܪ̈ܳܚܡܰܝܢ: ܘܢܳܛܖ̈ܰܝ ܫܰܠܡܽܘܬܳܐ ܕܰܠܘܳܬܰܢ: ܨܒܰܝܢ ܕܢܶܥܒܶܕ ܠܗܽܘܢ ܛܳܒ̈ܳܬܳܐ ܡܶܛܽܠ ܬܰܪܥܺܝܬܗܽܘܢ ܕܰܠܘܳܬܰܢ.
34 ܐܰܩܺܝܡܢ ܠܗܽܘܢ ܕܶܝܢ ܘܝܰܗܒܢ ܠܗܽܘܢ: ܠܰܬܚܽܘ̈ܡܶܝܗ̇ ܕܺܝܗܽܘܕܳܐ ܘܠܰܬܠܳܬܳܐ ܩܫܳܠܺܝ̈ܢ: ܠܰܐܦܪܶܝܡ ܘܰܠܠܽܘܕܳܐ ܘܰܠܪܰܡܬܺܝܡ. ܗܳܠܶܝܢ ܕܶܐܬܬܰܘܣܰܦܘ ܡܶܢ ܫܳܡܪܺܝܢ ܥܰܠ ܝܺܗܽܘܕܳܐ ܘܟܽܠܶܗ ܫܽܘܠܛܳܢܗܶܝܢ ܠܩܽܘܪ̈ܒܳܢܶܐ ܕܒܽܐܘܪܺܫܠܶܡ: ܚܠܳܦ ܫܩ̈ܳܠܶܐ ܕܡܰܠ̈ܟܶܐ ܕܰܫܩܰܠܘ ܡܶܢܗܽܘܢ ܡܶܢ ܩܕܺܝܡ: ܡܶܢ ܙܰܪܥܳܗ̇ ܕܰܐܪܥܳܐ ܘܡܶܢ ܦܺܐܖ̈ܶܐ ܕܺܐܝܠܳܢ̈ܶܐ.
35 ܘܰܕܫܰܪܟܳܐ ܕܰܗܘܳܐ ܗܘܳܐ ܠܰܢ ܡܶܢ ܡܰܥܣܳܖ̈ܶܐ ܘܡܶܢ ܡܰܟ̈ܣܶܐ: ܘܝܰܡ̈ܡܳܬܳܐ ܕܡܶܠܚܳܐ: ܘܰܟܠܺܝ̈ܠܶܐ ܕܗܳܘܶܝܢ ܗܘܰܘ ܠܰܢ: ܟܽܠܡܶܕܶܡ ܫܒܺܝܩ ܠܗܽܘܢ.
36 ܘܠܳܐ ܬܶܫܬܪܶܐ ܚܕܳܐ ܡܶܢ ܗܳܠܶܝܢ ܡܶܢ ܗܳܫܳܐ ܘܰܠܗܰܠ.
37 ܘܗܳܫܳܐ ܐܶܬܚܰܦܛ ܒܦܶܚܡܳܐ ܕܗܳܠܶܝܢ ܬܶܟܬܽܘܒ ܘܬܶܬܶܠ ܠܝܽܘܢܳܬܳܢ. ܘܢܶܬܬܣܺܝܡ ܒܰܐܬܪܳܐ ܝܺܕܺܝܥܳܐ ܘܓܰܠܝܳܐ ܒܛܽܘܪܳܐ ܩܰܕܺܝܫܳܐ.
38 ܘܰܚܙܳܐ ܕܺܡܰܛܪܺܝܳܘܣ ܡܰܠܟܳܐ: ܕܫܶܠܝܰܬ ܘܶܐܬܬܢܺܝܚܰܬ ܐܰܪܥܳܐ ܩܕܳܡܰܘܗܝ: ܘܠܰܝܬ ܕܩܳܐܶܡ ܠܩܽܘܒܠܶܗ: ܘܰܫܪܳܐ ܠܟܽܠܶܗ ܚܰܝܠܳܐ ܐ̱ܢܳܫ ܠܕܽܘܟܬܶܗ: ܣܛܰܪ ܡܶܢ ܗܳܠܶܝܢ ܕܰܓܒܳܐ ܡܶܢ ܓܳܙܪ̈ܳܬܳܐ ܕܥܰܡ̈ܡܶܐ. ܘܰܥܒܰܕܘ ܥܰܡܶܗ ܒܥܶܕܒܳܒܽܘܬܳܐ ܟܽܠܗܽܘܢ ܚܰܝ̈ܠܶܐ ܕܰܐܒܳܗܰܘ̈ܗܝ.
39 ܛܪܺܝܦܽܘܢ ܕܶܝܢ ܐܺܝܬܰܘܗܝ ܗܘܳܐ ܡܢ ܒܶܝܬ ܐܶܠܶܟܣܰܢܕܪܽܘܣ ܡܶܢ ܩܕܺܝܡ. ܘܰܚܙܳܐ ܕܟܽܠܶܗ ܚܰܝܠܶܗ ܪܳܛܶܢ ܗܘܳܐ ܥܰܠ ܕܺܡܰܛܪܺܝܳܘܣ. ܘܶܐܙܰܠ ܠܘܳܬ ܡܰܠܟܳܐ ܥܰܪܰܒܳܝܳܐ ܗܰܘ ܕܰܡܪܰܒܶܐ ܗܘܳܐ ܠܰܐܢܛܺܝܰܟܳܘܣ ܫܪܶܗ ܕܰܐܠܶܟܣܰܢܕܪܽܘܣ.
40 ܘܶܐܡܰܪ ܠܶܗ ܕܢܰܫܠܡܺܝܘܗܝ ܠܶܗ ܐܰܝܟ ܕܢܰܡܠܟܺܝܘܗܝ ܚܠܳܦ ܐܰܒܽܘܗܝ. ܘܰܐܘܕܥܶܗ ܟܽܠܡܶܕܶܡ ܕܰܥܒܰܕ ܕܺܡܶܛܪܺܝܘܳܣ: ܘܰܒܥܶܠܕܒܳܒܽܘܬܳܐ ܕܰܥܒܰܕ ܥܰܡܶܗ ܚܰܝܠܶܗ. ܘܩܰܘܺܝ ܬܰܡܳܢ ܝܰܘ̈ܡܳܬܳܐ ܣܰܓܺܝ̈ܐܶܐ.
41 ܘܫܰܕܰܪ ܝܽܘܢܳܬܳܢ ܠܘܳܬ ܕܺܡܶܛܪܺܝܘܳܣ ܡܰܠܟܳܐ: ܕܢܰܦܶܩ ܠܝܳܬܒܰܝ̈ ܡܶܪܕܳܐ ܡܶܢ ܐܽܘܪܺܫܠܶܡ ܘܰܠܝܳܬܒܰܝ̈ ܚܶܣ̈ܢܶܐ. ܡܰܩܪܒܺܝܢ ܗܘܰܘ ܓܶܝܪ ܥܰܡ ܐܺܝܣܪܳܐܶܝܠ.
42 ܘܫܰܕܰܪ ܕܺܡܶܛܪܺܝܘܳܣ ܠܘܳܬ ܝܽܘܢܳܬܳܢ ܘܶܐܡܰܪ ܠܶܗ. ܠܳܐ ܗܘܳܐ ܗܳܠܶܝܢ ܒܰܠܚܽܘܕ ܐܶܥܒܶܕ ܠܳܟ ܘܰܠܥܰܡܳܟ: ܐܶܠܳܐ ܐܳܦ ܒܬܶܫܒܽܘܚܬܳܐ ܐܶܫܰܒܚܳܟ ܘܰܠܥܰܡܳܟ: ܡܳܐ ܕܰܗܘܳܐ ܠܺܝ ܐܰܬܪܳܐ.
43 ܗܳܫܳܐ ܕܶܝܢ ܫܰܦܺܝܪ ܥܳܒܶܕ ܐܰܢ̱ܬ ܐܶܢ ܡܫܰܕܰܪ ܐܰܢ̱ܬ ܠܺܝ ܓܰܒܖ̈ܶܐ ܠܥܽܘܕܪܳܢܝ. ܡܶܛܽܠ ܕܰܣܛܳܐ ܠܶܗ ܓܶܝܪ ܡܶܢܝ ܟܽܠܶܗ ܚܰܝܠܳܐ.
44 ܘܫܰܕܰܪ ܝܽܘܢܳܬܳܢ ܬܠܳܬܳܐ ܐܰܠܦܺܝ̈ܢ ܓܰܒܖ̈ܶܐ ܚܰܝ̈ܠܬܳܢܶܐ ܠܰܐܢܛܝܳܟܺܝܰܐ: ܘܶܐܬܰܘ ܠܘܳܬ ܡܰܠܟܳܐ. ܘܰܚܕܺܝ ܡܰܠܟܳܐ ܒܡܶܐܬܺܝܬܗܽܘܢ.
45 ܘܶܐܬܟܰܢܰܫܘ ܟܽܠܗܽܘܢ ܝܳܬܒܰܝ̈ ܡܕܺܝܢܬܳܐ ܐܰܝܟ ܬܰܪܬܰܥܶܣܖ̈ܶܐ ܪ̈ܶܒܘܳܢ ܠܡܶܙܥܰܬ ܡܕܺܝܢܬܳܐ. ܘܨܳܒܶܝܢ ܗܘܰܘ ܕܢܶܩܛܠܽܘܢܳܝܗܝ ܠܡܰܠܟܳܐ ܕܺܡܶܛܪܺܝܘܳܣ.
46 ܘܰܥܪܰܩ ܡܰܠܟܳܐ ܘܥ̣ܰܠ ܠܶܗ ܠܕܳܪܬܳܐ. ܘܶܐܚܰܕܘ ܒܢܰܝ̈ ܡܕܺܝܢܬܳܐ ܠܟܽܠܗܽܘܢ ܡܰܦ̈ܩܳܢܶܝܗ̇ ܕܰܡܕܺܝܢܬܳܐ. ܘܫܰܪܺܝܘ ܡܰܩܪܒܺܝܢ.
47 ܘܰܩܪܳܐ ܡܰܠܟܳܐ ܠܺܝܗܽܘܕܳܝ̈ܶܐ ܠܥܽܘܕܪܳܢܶܗ. ܘܶܐܬܟܰܢܰܫܘ ܠܘܳܬܶܗ ܟܽܠܗܽܘܢ ܐܰܟܚܕܳܐ. ܘܶܐܬܒܰܕܰܪܘ ܟܽܠܗܽܘܢ ܒܰܡܕܺܝܢܬܳܐ. ܘܩܰܛܶܠܘ ܒܗܰܘ ܝܰܘܡܳܐ ܒܰܡܕܺܝܢܬܳܐ: ܐܰܝܟ ܥܣܰܪ ܪ̈ܶܒܘܳܢ.
48 ܘܰܐܘܩܕܽܘܗ̇ ܠܰܡܕܺܝܢܬܳܐ. ܘܰܢܣܰܒܘ ܒܗܰܘ ܝܰܘܡܳܐ ܒܶܙܬܳܐ ܣܰܓܺܝܐܬܳܐ. ܘܦܰܨܝܽܘܗܝ ܠܡܰܠܟܳܐ.
49 ܘܰܚܙܰܘ ܝܳܬܒܰܝ̈ ܡܕܺܝܢܬܳܐ ܕܶܐܬܥܰܫܰܢܘ ܝܺܗܽܘܕܳܝ̈ܶܐ: ܘܰܐܚܕܽܘܗ̇ ܠܟܽܠܳܗ̇ ܡܕܺܝܢܬܳܐ ܐܰܝܟ ܕܨܳܒܶܝܢ ܗܘܰܘ: ܘܶܐܬܪܫܶܠܘ ܪ̈ܶܥܝܢܰܝܗܽܘܢ. ܘܰܓܥܰܘ ܠܘܳܬ ܡܰܠܟܳܐ ܒܒܳܥܽܘܬܳܐ ܘܶܐܡܰܪܘ.
50 ܗܰܒ ܠܰܢ ܝܰܡܺܝܢܳܐ: ܘܢܶܫܠܽܘܢ ܡܶܢܰܢ ܝܺܗܽܘ̈ܕܳܝܶܐ ܕܡܰܩܪܒܺܝܢ ܥܰܡܰܢ ܘܥܰܡ ܡܕܺܝܢܬܳܐ.
51 ܘܰܫܕܰܘ ܙܰܝܢܗܽܘܢ: ܘܝܰܗܒܘ ܝܰܡܺܝܢܳܐ. ܘܰܥܒܰܕܘ ܫܠܳܡܳܐ ܘܶܐܫܬܰܒܰܚܰܘ ܝܰܬܺܝܪܳܐܺܝܬ ܝܺܗܽܘ̈ܕܳܝܶܐ ܩܕܳܡ ܡܰܠܟܳܐ ܘܰܩܕܳܡ ܟܽܠܳܗ̇ ܡܰܠܟܽܘܬܶܗ. ܘܰܗܦܰܟܘ ܠܽܐܘܪܺܫܠܶܡ ܟܰܕ ܐܺܝܬ ܗܘܳܐ ܥܰܡܗܽܘܢ ܒܶܙܬܳܐ ܣܰܓܺܝܐܬܳܐ.
52 ܘܺܝܬܶܒ ܕܺܡܶܛܪܺܝܘܳܣ ܡܰܠܟܳܐ ܥܰܠ ܟܽܘܪܣܝܳܐ ܕܡܰܠܟܽܘܬܶܗ. ܘܫܶܠܝܰܬ ܘܶܐܬܬܢܺܝܚܰܬ ܐܰܪܥܳܐ ܩܕܳܡܰܘܗܝ.
53 ܘܕܰܓܶܠ ܒܟܽܠܡܶܕܶܡ ܕܶܐܡܰܪ. ܘܶܐܫܬܰܚܠܰܦ ܥܰܠ ܝܽܘܢܳܬܳܢ. ܘܠܳܐ ܝܰܗܒ ܠܶܗ ܟܽܠ ܕܶܐܫܬܰܘܕܺܝ ܗܘܳܐ ܠܶܗ. ܘܳܐܠܶܨ ܗܘܳܐ ܠܶܗ ܣܰܓܺܝ.
54 ܡܶܢ ܒܳܬܰܪ ܕܶܝܢ ܗܳܠܶܝܢ: ܗܦܰܟ ܛܪܝܦܘܢ: ܘܥܰܡܶܗ ܐܰܢܛܝܰܟܳܘܣ ܛܰܠܝܳܐ ܙܥܽܘܪܳܐ. ܘܰܐܡܠܶܟ ܘܰܩܛܰܪ ܬܳܓܳܐ.
55 ܘܶܐܬܟܰܢܰܫ ܗܘܳܐ ܠܳܘܬܶܗ ܟܽܠܶܗ ܚܰܝܠܳܐ ܕܒܰܕܰܪ ܗܘܳܐ ܕܺܡܶܛܪܺܝܘܳܣ. ܘܰܐܩܪܶܒ ܥܰܡܶܗ ܘܶܐܙܕܟܺܝ. ܘܰܥܪܰܩ ܕܺܡܶܛܪܺܝܘܳܣ.
56 ܘܰܢܣܰܒ ܛܪܝܦܘܢ ܠܚܰܝܽܘܬܶܗ ܟܽܠܳܗ̇. ܘܰܐܚܕܳܗ̇ ܠܰܐܢܛܝܳܟܺܝܰܐ.
57 ܘܰܟܬܰܒ ܐܰܢܛܝܰܟܳܘܣ ܙܥܽܘܪܳܐ ܠܝܽܘܢܳܬܳܢ ܘܶܐܡܰܪ. ܡܩܺܝܡ ܐ̱ܢܳܐ ܠܳܟ ܪܰܒܽܘܬ ܟܳܗܢܽܘܬܳܐ. ܘܰܡܫܰܠܶܛ ܐ̱ܢܳܐ ܠܳܟ ܥܰܠ ܐܰܪ̈ܒܰܥܬܰܝܗܶܝܢ ܫܩ̈ܳܠܶܐ. ܘܰܕܬܶܗܘܶܐ ܡܶܢ ܪ̈ܳܚܡܰܘܗܝ ܕܡܰܠܟܳܐ.
58 ܘܫܰܕܰܪ ܠܶܗ ܡܳܐܢ̈ܶܐ ܕܕܰܗܒܳܐ ܘܬܶܫܡܶܫܬܳܐ ܘܝܰܗܒ ܠܶܗ ܫܽܘܠܛܳܢܳܐ ܕܢܶܗܘܶܐ ܫܳܬܶܐ ܒܕܰܗܒܳܐ ܘܰܡܟܰܣܰܝ̈ ܐܰܪ̈ܓܘܳܢܶܐ. ܘܶܐܝܬ ܥܠܰܝܗܽܘܢ ܦܺܝܒܠܳܐ ܕܕܰܗܒܳܐ.
59 ܘܰܠܫܶܡܥܽܘܢ ܐܰܚܽܘܗܝ ܐܰܩܺܝܡܶܗ ܪܺܝܫܳܐ: ܡܶܢ ܬܚܽܘ̈ܡܶܝܗ̇ ܕܨܽܘܪ ܘܰܥܕܰܡܳܐ ܠܰܬܚܽܘܡܳܐ ܕܡܶܨܪܶܝܢ.
60 ܘܰܢܦܰܩ ܝܽܘܢܳܬܳܢ ܘܶܐܙܰܠ ܗܘܳܐ ܠܥܶܒܖ̈ܰܘܗܝ ܕܢܰܗܪܳܐ ܘܒܰܡܕܺܝ̈ܢܳܬܳܐ. ܘܶܐܬܟܰܢܰܫܘ ܠܘܳܬܶܗ ܟܽܠܶܗ ܚܰܝܠܳܐ ܕܣܽܪܺܝܰܐ ܠܥܽܘܕܪܳܢܶܗ.
61 ܘܶܐܬܳܐ ܝܽܘܢܳܬܳܢ ܠܰܐܫܩܳܠܽܘܢ. ܘܰܐܪܥܽܘܗܝ ܝܳܬܒܰܝ̈ ܡܕܺܝܢܬܳܐ ܒܬܶܫܒܽܘܚܬܳܐ ܪܰܒܬܳܐ. ܘܶܐܙܰܠ ܡܶܢ ܬܰܡܳܢ ܠܥܶܐܙܳܐ. ܘܶܐܚܰܕܘ ܩܕܳܡܰܘܗܝ ܒܢܰܝ̈ ܥܶܐܙܳܐ ܘܺܝܬܶܒܘ ܥܠܶܝܗ̇. ܘܰܐܘܩܕܽܘܗ̇ ܒܢܽܘܪܳܐ ܘܰܠܟܽܠܗܽܘܢ ܚܕܳܪ̈ܶܝܗ̇. ܘܒܰܙܳܗ̇.
62 ܘܰܒܥܰܘ ܒܢܰܝ̈ ܥܶܐܙܳܐ ܡܶܢ ܝܽܘܢܳܬܳܢ. ܘܝܰܗܒ ܠܗܽܘܢ ܝܰܡܺܝܢܳܐ. ܘܰܢܣܰܒ ܒܢܰܝ̈ܗܽܘܢ ܕܪܰܘܪ̈ܒܳܢܶܐ ܠܰܗܡܰܝܖ̈ܶܐ: ܘܫܰܕܰܪ ܐܶܢܽܘܢ ܠܽܐܘܪܺܫܠܶܡ. ܘܗܰܠܶܟ ܒܰܐܪܥܳܐ ܥܕܰܡܳܐ ܠܕܰܪܡܣܽܘܩ.
63 ܘܰܫܡܰܥ ܝܽܘܢܳܬܳܢ ܕܶܐܬܰܘ ܪܰܘܪ̈ܒܳܢܶܐ ܕܕܺܡܶܛܪܺܝܘܳܣ ܠܩܕܶܫ ܕܒܰܓܠܺܝܠܳܐ ܒܚܰܝܠܳܐ ܣܰܓܺܝܐܳܐ. ܕܨܳܒܶܝܢ ܗܘܰܘ ܕܢܶܦܪܩܽܘܢܳܝܗܝ ܡܶܢ ܨܶܒ̈ܘܳܬܶܗ.
64 ܘܶܐܙܰܠ ܘܰܐܪܰܥ ܐܶܢܽܘܢ. ܠܫܶܡܥܽܘܢ ܕܶܝܢ ܐܰܚܬܘܗܝ ܫܰܒܩܶܗ ܒܰܐܬܪܳܐ.
65 ܘܺܝܬܶܒ ܫܶܡܥܽܘܢ ܥܰܠ ܒܶܝܬ ܫܽܘܖ̈ܶܐ. ܘܡܰܩܪܶܒ ܗܘܳܐ ܥܰܡܗܽܘܢ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܚܒܰܫ ܐܶܢܽܘܢ ܠܝܳܬܒܶܝ̈ܗ̇.
66 ܘܰܒܥܰܘ ܡܶܢܶܗ ܕܢܶܬܶܠ ܠܗܽܘܢ ܝܰܡܺܝܢܳܐ. ܘܝܰܗܒ ܠܗܽܘܢ ܘܰܐܦܶܩ ܐܶܢܽܘܢ ܡܶܢ ܬܰܡܳܢ. ܘܰܐܚܕܳܗ̇ ܠܰܡܕܺܝܢܬܳܐ: ܘܣܳܡ ܒܳܗ̇ ܡܛܰܪܬܳܐ.
67 ܘܝܽܘܢܳܬܳܢ ܘܡܰܫܪܺܝܬܶܗ: ܫܪܰܘ ܥܰܠ ܡܰܝ̈ܳܐ ܕܓܶܢܶܣܰܪ. ܘܩܰܕܶܡܘ ܒܨܰܦܪܳܐ ܠܰܦܩܰܥܬܳܐ ܕܰܐܣܽܘܪ.
68 ܘܗܳܐ ܡܰܫܪܺܝܬܳܐ ܕܰܦܠܶܫܬܳܝ̈ܶܐ ܐܰܪܰܥܬܶܗ ܒܰܦܩܰܥܬܳܐ. ܘܰܐܦܶܩܘ ܥܠܰܘܗܝ ܟܡܺܐܢ̈ܶܐ.
69 ܘܩܳܡܘ ܡܶܢ ܒܶܣܬܰܪܗܽܘܢ. ܘܫܰܪܺܝܘ ܠܡܰܩܪܳܒܽܘ. ܘܰܥܪܰܩܘ ܟܽܠܗܽܘܢ ܕܒܶܝܬ ܢܽܘܢܳܬܳܢ.
70 ܘܐ̱ܢܳܫ ܡܶܢܗܽܘܢ ܠܳܐ ܐܶܫܬܚܰܪ ܠܘܳܬܶܗ. ܐܶܠܳܐ ܐܶܢ ܡܰܬܺܝܬܳܐ ܒܰܪ ܐܰܒܫܠܳܡ: ܘܺܝܗܽܘܕܳܐ ܒܰܪ ܚܰܦܺܝ: ܘܪܰܘܪ̈ܒܶܢܳܐ ܕܪ̈ܺܝܫܰܝ ܚܰܝܠܳܐ.
71 ܘܨܰܪܺܝ ܝܽܘܢܳܬܳܢ ܢܰܚܬܰܘ̈ܗܝ: ܘܰܐܪܡܺܝ ܥܰܦܪܳܐ ܥܰܠ ܪܺܝܫܶܗ. ܘܨܰܠܺܝ.
72 ܘܰܗܦܰܟ ܥܠܰܝܗܽܘܢ ܠܰܩܪܳܒܳܐ. ܘܰܙܟܳܐ ܐܶܢܽܘܢ: ܘܰܥܪܰܩܘ.
73 ܘܟܰܕ ܚܙܰܘ ܐܶܢܽܘܢ ܕܥܳܪܩܺܝܢ ܗܳܠܶܝܢ ܕܺܐܝܬ ܗܘܰܘ ܥܰܡܶܗ: ܘܶܐܬܦܢܺܝܘ ܘܶܐܬܰܘ ܨܶܐܕܰܘܗܝ. ܘܪܳܕܦܺܝܢ ܗܘܰܘ ܠܗܽܘܢ ܥܕܰܡܳܐ ܠܩܰܠܳܣ ܡܰܫܪܺܝܬܗܽܘܢ. ܘܰܫܪܰܘ ܬܰܡܳܢ.
74 ܘܰܢܦܰܠܘ ܡܶܢ ܦܠܶܫܬܳܝ̈ܶܐ ܒܗܰܘ ܝܰܘܡܳܐ ܐܰܝܟ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܰܗܦܰܟ ܝܽܘܢܳܬܳܢ ܠܽܐܘܪܺܫܠܶܡ.