1 Maccabees 14
The First Book of Maccabees
܀ ܐ ܡܩܒܝ̈ܐ ܝܕ ܀
1 ܘܒܰܫܢܰܬ ܡܳܐܐ ܘܫܰܒܥܺܝܢ ܘܬܰܪܬܶܝܢ: ܟܰܢܶܫ ܕܺܡܰܛܪܺܝܳܘܣ ܠܚܰܝܠܶܗ. ܘܶܐܙܰܠ ܠܳܡܕܰܝ ܕܰܢܟܰܢܶܫ ܠܶܗ ܚܰܝܠܳܐ ܘܢܰܩܪܶܒ ܥܰܡ ܛܪܺܝܦܽܘܢ.
2 ܘܰܫܡܰܥ ܐܰܪܣܰܩ ܡܰܠܟܳܐ ܕܦܳܪܶܣ ܘܰܕܡܳܕܰܝ: ܕܶܐܬܳܐ ܕܺܡܰܛܪܺܝܳܘܣ ܠܰܬܚܽܘܡܰܘ̈ܗܝ: ܘܫܰܕܰܪ ܠܚܰܕ ܡܶܢ ܪܰܘܪ̈ܒܳܢܰܘܗܝ ܕܢܶܐܚܕܺܝܘܗܝ ܟܰܕ ܚܰܝ.
3 ܘܶܐܙܰܠ ܘܰܡܚܳܗ̇ ܠܡܰܫܪܺܝܬܶܗ ܕܕܺܡܰܛܪܺܝܳܘܣ: ܘܰܐܚܕܶܗ. ܘܰܐܝܬܝܶܗ ܠܘܳܬ ܐܰܪܣܰܩ. ܘܰܐܪܡܝܶܗ ܒܶܝܬ ܐܰܣܺܝܖ̈ܶܐ.
4 ܘܫܠܝܰܬ ܘܶܐܬܬܢܺܝܚܰܬ ܐܰܪܥܳܐ ܟܽܠܗܽܘܢ ܝܰܘ̈ܡܳܬܶܗ ܕܫܶܡܥܽܘܢ. ܘܰܥܒܰܕ ܛܳܒ̈ܳܬܳܐ ܠܥܰܡܶܗ. ܘܰܫܦܰܪ ܠܗܽܘܢ ܫܽܘܠܛܳܢܶܗ ܘܬܶܫܒܽܘܚܬܶܗ ܟܽܠܗܽܘܢ ܝܰܘ̈ܡܳܬܶܗ.
5 ܘܥܰܡ ܟܽܠܳܗ̇ ܬܶܫܒܽܘܚܬܶܗ. ܘܰܫܩܰܠ ܠܝܽܘܦܺܐ ܠܰܠܡܺܐܢܳܐ. ܘܰܥܒܰܕ ܡܰܥܠܳܢܳܐ ܠܶܐܠܦ̈ܶܐ ܕܝܰܡܳܐ.
6 ܘܰܐܦܬܺܝ ܘܰܐܘܪܶܒ ܬܚܽܘ̈ܡܶܐ ܕܥܰܡܶܗ. ܘܰܐܚܕܳܗ̇ ܠܟܽܠܳܗ̇ ܐܰܪܥܗܽܘܢ.
7 ܘܟܰܢܶܫ ܫܒܺܝܬܳܐ ܣܰܓܺܝܐܬܳܐ. ܘܰܐܫܠܶܛ ܥܰܠ ܓܙܺܝܪܳܐ ܘܥܰܠ ܒܶܝܬ ܫܽܘܖ̈ܶܐ ܘܥܰܠ ܒܶܝܬ ܡܶܪܕܳܐ. ܘܰܥܛܳܐ ܘܰܐܪܺܝܡ ܡܶܢܗܽܘܢ ܟܽܠܳܗ̇ ܛܰܡܐܽܘܬܳܐ. ܘܠܳܐ ܐܺܝܬ ܗܘܳܐ ܕܩܳܐܶܡ ܠܩܽܘܒܠܶܗ.
8 ܘܥܳܡܪܺܝܢ ܗܘܰܘ ܘܦܳܠܚܺܝܢ ܐܰܪܥܗܽܘܢ ܒܰܫܠܳܡܳܐ. ܘܰܐܪܥܳܐ ܝܳܗܒܳܐ ܗܘܳܬ ܥܰܠ̈ܠܳܬܳܗ̇: ܘܺܐܝ̈ܠܳܢܶܐ ܕܰܐܪܥܳܐ ܦܺܐܖ̈ܰܝܗܽܘܢ.
9 ܣܳܒ̈ܶܐ ܒܫܽܘ̈ܩܶܐ ܝܳܬܒܺܝܢ ܗܘܰܘ. ܘܟܽܠܗܽܘܢ ܥܰܠ ܛܳܒ̈ܳܬܳܐ ܡܶܬܡܰܠܟܺܝܢ ܗܘܰܘ. ܘܰܥܠܰܝ̈ܡܶܐ ܐܶܬܟܰܣܺܝܘ ܬܶܫܒܽܘܚܬܳܐ: ܘܠܳܐ ܡܳܐܢ̈ܶܐ ܕܰܩܪܳܒܳܐ.
10 ܘܝܰܗܒ ܬܽܘܪܣܳܝܳܐ ܠܰܡܕܺܝ̈ܢܳܬܳܐ. ܘܰܐܥܫܶܢ ܐܶܢܶܝܢ ܒܡܳܐܢܰܝ̈ ܚܶܣܢ̈ܶܐ: ܥܕܰܡܳܐ ܕܶܐܫܬܰܡܰܗ ܫܡܳܐ ܕܬܶܫܒܽܘܚܬܶܗ ܒܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ.
11 ܘܰܥܒܰܕ ܫܠܳܡܳܐ ܒܰܐܪܥܳܐ. ܘܶܐܬܒܰܣܰܡ ܝܺܣܪܳܐܶܝܠ ܒܒܽܘܣܳܡܳܐ ܪܰܒܳܐ.
12 ܘܺܝܬܶܒܘ ܐ̱ܢܳܫ ܬܶܚܝܬ ܓܽܘܦܢܰܘ̈ܗܝ ܘܰܬܚܶܝܬ ܬܺܐܢܰܘ̈ܗܝ. ܘܠܳܐ ܐܺܝܬ ܗܘܳܐ ܕܰܡܕܰܚܶܠ ܠܗܽܘܢ.
13 ܘܶܐܬܓܰܡܪܘ ܘܶܐܬܛܰܠܩܘ ܡܶܢܗܽܘܢ ܒܥܶܠܕܒܳܒ̈ܶܐ ܩܖ̈ܰܒܬܳܢܶܐ ܡܶܢ ܐܰܪܥܳܐ. ܘܳܐܦ ܡܰܠ̈ܟܶܐ ܐܶܬܬܒܰܪܘ ܒܗܳܢܽܘܢ ܝܰܘ̈ܡܳܬܳܐ.
14 ܘܫܰܕܰܪ ܘܚܰܝܶܠ ܠܟܽܠܗܽܘܢ ܡܶܣܟܺܢ̈ܶܐ ܕܥܰܡܶܗ. ܘܰܥܛܳܐ ܘܰܐܪܺܝܡ ܠܟܽܠ ܪܽܘܫܥܳܐ ܘܥܰܘܠܳܐ ܘܒܺܝܫܬܳܐ. ܘܢܳܡܽܘܣܳܐ ܦܩܰܕ.
15 ܘܩܺܘܕܫܳܐ ܫܰܒܰܚ. ܘܰܐܣܓܺܝ ܡܳܐܢ̈ܶܐ ܕܒܶܝܬ ܡܰܩܕܫܳܐ.
16 ܘܰܫܡܰܥܘ ܒܢܰܝ̈ ܪܽܗܘܡܺܝ ܕܡܺܝܬ ܝܽܘܢܳܬܳܢ: ܐܳܦ ܠܶܐܣܦܰܪ̈ܛܳܝܶܐ ܐܶܫܬܡܰܥ. ܘܶܐܬܬܥܺܝܩܘ ܥܳܩܬܳܐ ܪܰܒܬܳܐ.
17 ܟܰܕ ܕܶܝܢ ܫܡܰܥܘ ܕܫܶܡܥܽܘܢ ܐܰܚܽܘܗܝ ܗܘܳܐ ܚܠܳܦܰܘܗܝ ܪܰܒ ܟܳܗ̈ܢܶܐ: ܘܶܐܚܰܕ ܐܰܪܥܳܐ ܘܰܡܕܺܝ̈ܢܳܬܳܐ ܘܟܽܠ ܕܰܒܗܶܝܢ.
18 ܟܬܰܒܘ ܠܶܗ ܒܦܰܢܩܺܝܬܳܐ ܕܰܢܚܳܫܳܐ ܠܰܡܚܰܕܳܬܽܘ ܠܘܳܬܶܗ ܪܳܚܡܽܘܬܳܐ ܘܥܽܘܕܪܳܢܳܐ ܕܰܐܩܺܝܡܘ ܥܰܡ ܝܺܗܽܘܕܳܐ ܘܥܰܡ ܝܽܘܢܳܬܳܢ ܐܰܚܰܘ̈ܗܝ.
19 ܘܶܐܬܩܪܺܝ ܩܕܳܡ ܟܶܢܫܳܐ ܒܽܐܘܪܺܫܠܶܡ.
20 ܘܗܳܢܰܘ ܦܶܚܡܳܗ̇ ܕܶܐܓܰܪܬܳܐ ܕܫܰܕܰܪܘ ܐܶܣܦܰܪ̈ܛܳܝܶܐ. ܪܺܝܫܳܐ ܕܶܐܣܦܰܪ̈ܛܳܝܶܐ ܘܰܡܕܺܝ̈ܢܳܬܳܐ ܠܫܶܡܥܘܢ ܪܰܒ ܟܳܗܢ̈ܶܐ ܪܰܒܳܐ: ܘܰܠܣܰܒ̈ܶܐ ܘܰܠܟܳܗ̈ܢܶܐ ܘܰܠܫܰܪܟܳܐ ܕܥܰܡܳܐ ܕܺܝܗܽܘܕܳܝ̈ܶܐ ܐܰܚܰܝ̈ܢ: ܫܠܳܡ.
21 ܣܳܒ̈ܶܐ ܕܶܐܫܬܰܕܰܪܘ ܠܘܳܬܰܢ: ܐܰܘܕܥܽܘܢ ܥܰܠ ܫܠܳܡܳܐ ܕܺܐܝܬ ܠܟܽܘܢ: ܘܥܰܠ ܐܺܝܩܰܪܬܟܽܘܢ ܘܥܰܠ ܬܶܫܒܽܘܚܬܟܽܘܢ. ܘܚܳܕܶܝܢ ܣܰܓܺܝ ܒܡܶܐܬܺܝܬܗܽܘܢ.
22 ܘܰܟܬܰܒܢ ܟܽܠܡܶܕܶܡ ܕܶܐܬܶܐܡܰܪ ܡܶܢܗܽܘܢ ܒܶܝܬ ܒܽܘܠܳܐ ܕܥܰܡܰܢ ܗܳܟܰܢܳܐ. ܢܘܡܢܝܘܣ ܒܰܪ ܐܰܢܛܝܰܟܳܘܣ ܘܐܢܛܝܦܛܪܘܣ ܒܰܪ ܐܺܝܳܣܽܘܢ ܕܺܝܗܽܘ̈ܕܳܝܶܐ: ܐܶܬܰܘ ܠܘܳܬܰܢ: ܕܰܢܚܰܕܬܽܘܢ ܪܳܚܡܽܘܬܳܐ ܨܶܐܕܰܝܢ.
23 ܘܰܫܦܰܪ ܠܥܰܡܳܐ ܕܰܢܩܰܒܶܠ ܡܶܢܗܽܘܢ ܪܳܚܡܽܘܬܳܐ. ܘܩܰܒܶܠܘ ܐܶܢܽܘܢ ܠܓܰܒܖ̈ܶܐ ܒܬܶܫܒܽܘܚܬܳܐ. ܘܣܳܡܘ ܦܶܚܡܳܐ ܕܶܐܓܪ̈ܳܬܗܽܘܢ ܒܶܝܬ ܓܰܙܳܐ ܕܰܟܬܳܒ̈ܶܐ. ܕܢܶܗܘ̈ܝܳܢ ܠܥܰܡܳܐ ܕܶܣܦܰܪ̈ܛܳܝܶܐ ܠܕܽܘܟܪܳܢܳܐ. ܦܶܚܡܗܶܝܢ ܕܶܝܢ ܕܗܳܠܶܝܢ ܘܥܶܢܝܳܢܗܶܝܢ: ܟܬܰܒܘ ܫܶܡܥܽܘܢ ܪܰܒ ܟܳܗ̈ܢܶܐ.
24 ܡܶܢ ܒܳܬܰܪ ܕܶܝܢ ܗܳܠܶܝܢ: ܫܰܕܰܪ ܫܶܡܥܽܘܢ ܠܢܘܡܢܝܘܣ ܠܪܽܗܘܡܺܝ: ܟܰܕ ܐܺܝܬ ܥܠܰܘܗܝ ܡܓܰܢܳܐ ܪܰܒܬܳܐ ܕܕܰܗܒܳܐ ܕܳܐܠܶܦ ܡܢܺܝ̈ܢ: ܠܰܡܩܳܡܽܘ ܥܰܡܗܽܘܢ ܥܽܘܕܪܳܢܳܐ.
25 ܟܰܕ ܫܡܰܥ ܕܶܝܢ ܥܰܡܳܐ ܗܳܠܶܝܢ ܡ̈ܶܠܶܐ ܐܶܡܰܪܘ. ܡܳܢܳܐ ܛܰܝܒܽܘܬܳܐ ܢܶܦܪܥܺܝܘܗܝ ܠܫܶܡܥܽܘܢ ܪܰܒ ܟܳܗ̈ܢܶܐ ܘܠܰܒܢܰܘ̈ܗܝ.
26 ܕܶܐܬܚܰܝܠܘ ܓܶܝܪ ܗܽܘ ܘܰܐܚܰܘ̈ܗܝ ܘܟܽܠܶܗ ܒܶܝܬ ܐܰܒܽܘܗܝ: ܘܰܐܩܪܶܒܘ ܥܰܡ ܒܥܶܠܕܒܳܒܰܘ̈ܗܝ ܕܺܝܣܪܳܐܶܝܠ. ܘܰܕܚܰܩܘ ܐܶܢܽܘܢ ܡܶܢܗܽܘܢ: ܘܺܝܪܶܬܘ ܐܶܢܽܘܢ. ܘܰܐܩܺܝܘܡܘ ܠܫܶܡܥܽܘܢ ܚܺܐܪܽܘܬܳܐ. ܘܰܟܬܰܒܘ ܒܦܰܢܩܺܝܬܳܐ ܕܰܢܚܰܫܳܐ: ܘܣܳܡܘ ܥܰܠ ܐܶܣܛܽܘܢܳܐ ܒܛܽܘܪܳܐ ܕܨܶܗܝܽܘܢ.
27 ܘܗܳܢܰܘ ܦܶܚܡܶܗ ܕܰܟܬܳܒܳܐ. ܒܰܬܡܳܢܥܶܣܪܳܐ ܒܰܐܝܠܽܘܠ ܒܰܫܢܰܬ ܡܳܐܐ ܘܫܰܒܥܺܝܢ ܘܬܰܪܬܶܝܢ. ܗܳܕܶܐ ܫܰܢܬܳܐ ܕܰܬܠܳܬ ܠܫܶܡܥܽܘܢ ܪܰܒ ܟܳܗ̈ܢܶܐ ܪܰܒܳܐ.
28 ܒܺܝܣܪܳܐܶܝܠ: ܒܰܟܢܽܘܫܬܳܐ ܪܰܒܬܳܐ ܕܟܳܗ̈ܢܶܐ ܘܰܕܥܰܡܳܐ: ܘܪ̈ܺܝܫܰܝ ܥܰܡܳܐ ܘܰܕܣܰܒ̈ܶܐ ܕܰܐܪܥܳܐ: ܐܰܘܕܰܥܢܳܟܽܘܢ.
29 ܡܶܛܽܠ ܕܣܰܓܺܝ ܙܰܒ̈ܢܳܬܳܐ ܗܘܰܘ ܩܪ̈ܳܒܶܐ ܒܰܐܪܥܳܐ. ܫܶܡܥܽܘܢ ܕܶܝܢ ܒܶܪܗ ܕܡܰܬܺܝܬܳܐ: ܡܶܢ ܒܢܰܘ̈ܗܝ ܕܝܽܘܢܳܕܳܒ ܘܰܐܚܰܘ̈ܗܝ: ܐܰܫܠܶܡܘ ܢܰܦܫܗܽܘܢ ܠܩܽܘܢܕܺܝܢܳܘܣ. ܘܩܳܡܘ ܠܽܘܩܒܰܠ ܒܥܶܠܕܒܳܒ̈ܶܐ ܕܥܰܡܗܽܘܢ. ܕܰܐܝܟܰܢܳܐ ܢܩܽܘܡ ܢܳܡܽܘܣܗܽܘܢ ܘܒܶܝܬ ܡܰܩܕܫܗܽܘܢ. ܘܰܒܬܶܫܒܽܘܚܬܳܐ ܪܰܒܬܳܐ ܫܰܒܚܽܘܗܝ ܠܥܰܡܗܽܘܢ.
30 ܘܟܰܢܶܫ ܝܽܘܢܳܬܳܢ ܠܥܰܡܶܗ ܘܰܗܘܳܐ ܠܗܽܘܢ ܪܰܒ ܟܳܗ̈ܢܶܐ: ܘܶܐܬܰܟܰܢܰܫ ܠܘܳܬ ܥܰܡܶܗ.
31 ܘܶܐܬܚܰܫܰܒܘ ܒܥܶܠܕܒܳܒܰܝ̈ܗܽܘܢ ܠܡܶܐܬܳܐ ܠܰܐܪܥܗܽܘܢ ܕܰܢܓܰܡܪܽܘܢܳܗ̇ ܘܰܠܡܰܘܫܳܛܽܘ ܐܺܝܕܳܐ ܥܰܠ ܒܶܝܬ ܡܰܩܕܫܗܽܘܢ.
32 ܗܳܝܕܶܝܢ ܩܳܡ ܫܶܡܥܽܘܢ ܘܰܐܩܪܶܒ ܥܰܠ ܐܰܦܰܝ̈ ܥܰܡܶܗ. ܘܰܐܦܶܩ ܢܰܦ̈ܩܳܬܳܐ ܣܰܓܺܝ̈ܐܳܬܳܐ ܡܶܢ ܕܺܝܠܶܗ. ܘܝܰܗܒ ܙܰܝܢܳܐ ܠܓܰܒܖ̈ܶܐ ܕܚܰܝܠܳܐ ܒܢܰܝ̈ ܥܰܡܶܗ. ܘܝܰܗܒ ܠܗܽܘܢ ܡܰܘ̈ܗܒܳܬܳܐ.
33 ܘܰܐܥܫܶܢ ܡܕܺܝ̈ܢܳܬܳܐ ܕܺܝܗܽܘܕܳܐ: ܘܰܠܒܶܝܬ ܫܽܘܖ̈ܶܐ ܕܥܰܠ ܬܚܽܘ̈ܡܶܝܗ̇ ܕܺܝܗܽܘܕܳܐ: ܐܰܝܟܳܐ ܕܣܺܝܡ ܗܘܳܐ ܡܶܢ ܩܕܺܝܡ ܙܰܝܢܳܐ ܕܰܡܕܺܝ̈ܢܳܬܳܐ. ܘܰܐܩܺܝܡ ܬܰܡܳܢ ܢܳܛܽܘܖ̈ܶܐ ܓܰܒܖ̈ܶܐ ܕܺܝܗܽܘܕܳܐ.
34 ܘܰܐܥܫܶܢ ܒܚܶܣ̈ܢܶܐ ܠܝܽܘܦܺܐ ܕܥܰܠ ܝܰܡܳܐ. ܘܠܰܓܙܳܪ ܕܥܰܠ ܬܚܽܘܡܳܐ ܕܙܽܘܛܳܘܣ. ܐܰܝܟܳܐ ܕܥܳܡܪܺܝܢ ܗܘܰܘ ܠܽܘܩܕܰܡ ܒܥܶܠܕܒܳܒ̈ܶܐ. ܘܰܐܥܡܰܪ ܬܰܡܳܢ ܝܺܗܽܘܕܳܝ̈ܶܐ. ܘܟܽܠܡܶܕܶܡ ܕܳܐܙܶܠ ܗܘܳܐ ܠܗܽܘܢ ܠܬܽܘܪܣܳܝܳܐ ܘܰܠܩܽܘܝܳܡܳܐ ܣܳܡ ܠܗܽܘܢ ܬܰܡܳܢ.
35 ܘܰܚܙܳܐ ܥܰܡܳܐ ܥܒܳܕܰܘ̈ܗܝ ܕܫܶܡܥܽܘܢ: ܘܬܶܫܒܽܘܚܬܳܐ ܕܨܳܒܶܐ ܗܘܳܐ ܠܡܶܥܒܰܕ ܠܥܰܡܶܗ: ܘܣܳܡܽܘܗܝ ܠܗܽܘܢ ܡܕܰܒܪܳܢܳܐ ܘܪܰܒ ܟܳܗ̈ܢܶܐ. ܡܶܛܽܠ ܕܗܽܘ ܗܳܠܶܝܢ ܟܽܠܗܶܝܢ ܥܳܒܶܕ ܗܘܳܐ: ܘܙܰܕܺܝܩܽܘܬܳܐ ܘܗܰܝܡܳܢܽܘܬܳܐ ܕܰܢܛܰܪ ܠܥܰܡܶܗ. ܘܰܒܟܽܠܡܶܕܶܡ ܕܺܐܝܬ ܨܒܳܐ ܕܰܢܪܰܡܪܶܡ ܠܥܰܡܶܗ.
36 ܘܰܒܝܰܘ̈ܡܳܬܶܗ ܬܶܩܢܰܬ ܐܽܘܪܚܳܐ ܒܺܐܝܕܶܗ. ܕܰܢܓܰܡܰܪ ܠܥܰܡ̈ܡܶܐ ܡܶܢ ܐܰܪܥܗܽܘܢ. ܘܠܰܐܝܠܶܝܢ ܕܺܐܝܬ ܗܘܰܘ ܒܰܡܕܺܝܢܬܶܗ ܕܕܰܘܺܝܕ ܒܽܐܘܪܺܫܠܶܡ: ܐܳܦ ܠܗܽܘܢ ܥܛܳܐ: ܘܰܐܪܺܝܡ ܐܶܢܽܘܢ ܡܶܢ ܬܰܡܳܢ. ܗܳܢܽܘܢ ܕܰܥܒܰܕܘ ܠܢܰܦܫܗܽܘܢ ܡܶܪܕܳܐ ܡܶܢ ܐܰܝܟܳܐ ܕܢܳܦܩܺܝܢ ܗܘܰܘ ܘܰܡܛܰܡܐܺܝܢ ܚܕܳܖ̈ܰܝ ܒܶܝܬ ܡܰܩܕܫܳܐ. ܘܥܳܒܕܺܝܢ ܗܘܰܘ ܡܚܽܘܬܳܐ ܪܰܒܬܳܐ ܒܶܝܬ ܡܰܩܕܫܳܐ.
37 ܘܰܐܥܡܰܪ ܒܶܗ ܫܶܡܥܽܘܢ ܓܰܒܖ̈ܶܐ ܝܺܗܽܘ̈ܕܳܝܶܐ. ܘܰܐܥܫܢܶܗ ܒܚܶܣ̈ܢܶܐ ܕܢܶܗܘܶܐ ܒܶܝܬ ܡܶܪܕܳܐ ܠܰܡܕܺܝܢܬܳܐ ܘܠܰܐܬܪܳܐ. ܘܰܐܪܺܝܡ ܘܥܰܠܺܝ ܫܽܘܪܳܗ̇ ܕܽܐܘܪܺܫܠܶܡ.
38 ܘܕܺܡܰܛܪܺܝܳܘܣ ܡܰܠܟܳܐ: ܐܰܩܺܝܡ ܠܶܗ ܠܫܶܡܥܽܘܢ ܪܰܒܽܘܬ ܟܳܗܢܽܘܬܳܐ.
39 ܘܥܰܒܕܶܗ ܡܶܢ ܪ̈ܳܚܡܰܘܗܝ ܕܡܰܠܟܳܐ. ܘܫܰܒܚܶܗ ܒܬܶܫܒܽܘܚܬܳܐ ܪܰܒܳܬܳܐ.
40 ܐܶܫܬܡܰܥ ܓܶ݀ܪ ܕܶܐܬܩܪܺܝܘ ܝܺܗܽܘ̈ܕܳܝܶܐ ܡܶܢ ܪ̈ܽܗܘܡܳܝܶܐ ܐܰܚ̈ܶܐ ܘܪ̈ܳܚܡܶܐ ܘܰܡܥܰܕܪ̈ܳܢܶܐ. ܘܕܰܐܪܰܥܘ ܠܺܐܝܙ̈ܓܰܕܰܘܗܝ ܕܫܶܡܥܽܘܢ ܒܬܶܫܒܽܘܚܬܳܐ.
41 ܘܕܰܨܒܰܘ ܝܺܗܽܘ̈ܕܳܝܶܐ ܘܟܳܗ̈ܢܶܐ ܕܢܶܗܘܶܐ ܡܕܰܒܪܳܢܳܐ ܘܪܰܒ ܟܳܗ̈ܢܶܐ ܠܥܳܠܰܡ. ܥܕܰܡܳܐ ܕܰܢܩܽܘܡ ܢܒܺܝܳܐ ܡܗܰܝܡܢܳܐ.
42 ܗܽܘ ܢܶܗܘܶܐ ܠܗܽܘܢ ܡܕܰܒܪܳܢܳܐ. ܘܢܺܐܨܰܦ ܕܒܶܝܬ ܡܰܩܕܫܳܐ: ܠܰܡܩܳܡܽܘ ܐܶܢܽܘܢ ܥܰܠ ܥܒܳܕܰܝ̈ܗܽܘܢ ܘܥܰܠ ܙܰܝܢܗܽܘܢ ܘܥܰܠ ܚܶܣܢܰܝ̈ܗܽܘܢ.
43 ܘܰܕܢܶܗܘܶܐ ܝܳܨܶܦ ܥܰܠ ܒܶܝܬ ܡܰܩܕܫܳܐ. ܘܕܰܗܘܰܘ ܡܶܫܬܰܡܥܺܝܢ ܠܶܗ ܟܽܠܢܳܫ. ܘܕܰܗܘܰܘ ܡܶܬܟܰܬܒܺܝܢ ܒܰܫܡܶܗ: ܟܽܠܗܽܘܢ ܟܬܳܒ̈ܶܐ: ܕܡܰܣܒܳܐ ܘܰܕܡܰܬܠܳܐ ܕܒܰܐܪܥܶܗ. ܘܰܕܢܶܗܘܶܐ ܡܟܰܣܰܝ ܐܰܪ̈ܓܘܳܢܶܐ ܕܕܰܗܒܳܐ.
44 ܘܠܳܐ ܢܶܗܘܶܐ ܫܰܠܺܝܛ: ܠܳܐ ܠܟܳܗ̈ܢܶܐ ܘܠܳܐ ܠܐ̱ܢܳܫ ܡܶܢ ܥܰܡܳܐ: ܕܢܶܫܪܶܐ ܚܕܳܐ ܡܶܢ ܗܳܠܶܝܢ: ܐܰܘ ܕܰܢܩܽܘܡ ܠܽܘܩܒܰܠ ܟܽܠ ܦܽܘܩܕܳܢܰܘ̈ܗܝ: ܐܰܘ ܕܢܶܥܒܶܕ ܐ̱ܢܳܫ ܨܒܽܘ ܒܶܠܥܳܕܰܗܝ. ܘܰܕܢܶܗܘܶܐ ܡܟܰܣܰܝ ܐܰܪ̈ܓܘܳܢܶܐ: ܘܣܺܝܡ ܦܺܝܒܠܳܐ ܕܕܰܗܒܳܐ.
45 ܟܽܠ ܕܢܶܥܒܰܪ ܐܰܘ ܕܶܢܫܪܶܐ ܚܕܳܐ ܡܶܢ ܗܳܠܶܝܢ: ܢܶܗܘܶܐ ܡܚܰܝܰܒ.
46 ܘܳܐܨܛܒܺܝ ܟܽܠܶܗ ܥܰܡܳܐ ܗܳܠܶܝܢ ܟܽܠܶܗܝܢ ܢܶܗ̈ܘܝܳܢ ܠܫܶܡܥܽܘܢ.
47 ܘܰܕܢܶܥܒܕܽܘܢ ܐܰܝܟ ܗܳܠܶܝܢ ܦܶܬܓ̈ܳܡܶܐ. ܘܩܰܒܶܠ ܫܶܡܥܽܘܢ: ܘܶܐܨܛܒܺܝ ܕܢܶܗܘܶܐ ܪܰܒ ܟܳܗ̈ܢܶܐ ܘܰܡܕܰܒܪܳܢܳܐ ܘܪܺܝܫ ܥܰܡܳܐ ܕܺܝܗܽܘ̈ܕܳܝܶܐ ܘܰܕܟܳܗ̈ܢܶܐ: ܘܝܳܨܽܘܦܳܐ ܕܟܽܠܗܽܘܢ.
48 ܘܶܐܡܰܪܘ. ܕܢܶܬܟܬܶܒ ܗܳܢܳܐ ܟܬܳܒܳܐ ܒܦܰܢ̈ܩܝܳܬܳܐ ܕܰܢܚܳܫܳܐ: ܘܕܰܢܣܺܝܡܽܘܢ ܐܶܢܶܝܢ ܒܶܝܬ ܡܰܩܕܫܳܐ ܒܰܐܬܪܳܐ ܝܺܕܺܝܥܳܐ.
49 ܦܶܚܡܗܶܝܢ ܕܶܝܢ ܢܶܬܬܣܺܝܡ ܒܶܝܬ ܓܰܙܳܐ. ܘܰܕܢܶܗܘ̈ܝܳܢ ܠܫܶܡܥܽܘܢ ܘܠܰܒܢܰܘ̈ܗܝ.