Amos 3
The Book of Amos
܀ ܥܡܘܣ ܓ ܀
1 ܫܡܰܥܘ ܡܶܠܬܳܐ ܗܳܕܶܐ ܕܶܐܡܰܪ ܡܳܪܝܳܐ ܥܠܰܝܟܽܘܢ ܒܢܰܝ̈ ܝܺܣܪܳܐܶܝܠ: ܥܰܠ ܟܽܠܶܗ ܫܰܪܒܬܳܐ ܕܰܐܣܩܶܬ ܡܶܢ ܐܰܪܥܳܐ ܕܡܶܨܪܶܝܢ.
2 ܘܶܐܡܪܶܬ ܕܰܠܟܽܘܢ ܒܰܠܚܽܘܕ ܝܶܕܥܶܬ ܡܶܢ ܟܽܠܗܽܘܢ ܥܰܡ̈ܡܶܐ: ܘܡܶܢ ܟܽܠܗܶܝܢ ܫܰܖ̈ܒܳܬܳܐ ܕܰܐܪܥܳܐ: ܡܶܛܽܠ ܗܳܢܳܐ ܐܶܦܩܽܘܕ ܥܠܰܝܟܽܘܢ ܟܽܠܗܽܘܢ ܚܰܘ̈ܒܰܝܟܽܘܢ.
3 ܕܰܠܡܳܐ ܐܳܙܺܠܝܢ ܬܪܶܝܢ: ܐܰܟܚܕܳܐ: ܐܶܠܳܐ ܐܶܢ ܐܶܬܘܰܥܰܕܘ.
4 ܕܰܠܡܳܐ ܢܳܗܶܡ ܐܰܪܝܳܐ ܒܥܳܒܳܐ: ܡܳܐ ܕܠܰܝܬ ܠܶܗ ܓܶܙܪܳܐ: ܐܰܘ ܕܰܠܡܳܐ ܡܪܺܝܡ ܩܳܠܶܗ ܐܰܪܝܳܐ ܡܶܢ ܡܰܪܒܽܘܥܺܝܬܶܗ: ܐܶܠܳܐ ܐܶܢ ܬܳܒܰܪ.
5 ܕܰܠܡܳܐ ܢܳܦܠܳܐ ܨܶܦܪܳܐ ܒܦܰܚܳܐ ܒܰܐܪܥܳܐ ܒܶܠܥܳܕ ܡܶܢ ܨܰܝܳܕܳܐ: ܐܰܘ ܕܰܠܡܳܐ ܫܳܘܰܪ ܦܰܚܳܐ ܡܶܢ ܐܰܪܥܳܐ ܘܳܐܚܶܕ.
6 ܕܰܠܡܳܐ ܡܶܬܩܪܶܐ ܫܺܝܦܽܘܪܳܐ ܒܰܡܕܺܝܢ̱ܬܳܐ: ܘܥܰܡܳܐ ܠܳܐ ܙܳܐܰܥ: ܐܰܘ ܕܰܠܡܳܐ ܗܳܘܝܳܐ ܒܺܝܫܬܳܐ ܒܰܡܕܺܝܢ̱ܬܳܐ ܕܡܳܪܝܳܐ ܠܳܐ ܥܳܒܶܕ.
7 ܡܶܛܽܠ ܕܠܳܐ ܥܳܒܶܕ ܡܳܪܶܐ ܡܳܖ̈ܰܘܳܬܳܐ ܡܶܕܶܡ: ܐܶܠܳܐ ܐܶܢ ܓܠܳܐ ܐ̱ܪܳܙܶܗ ܠܥܰܒܕܰܘ̈ܗܝ ܢܒܺܝ̈ܶܐ.
8 ܐܰܪܝܳܐ ܢܗܰܡ ܡܰܢ ܠܳܐ ܢܶܕܚܰܠ: ܡܳܪܶܐ ܡܳܖ̈ܰܘܳܬܳܐ ܡܰܠܶܠ ܡܰܢ ܠܳܐ ܢܶܬܢܰܒܶܐ.
9 ܐܰܫܡܰܥܘ ܥܰܠ ܣܳܚܖ̈ܳܬܳܗ̇ ܕܶܐܫܕܽܘܕ: ܘܥܰܠ ܣܳܚܖ̈ܳܬܳܗ̇ ܕܰܐܪܥܳܐ ܕܡܶܨܪܶܝܢ: ܘܶܐܡܰܪܘ ܐܶܬܟܰܢܰܫܘ ܟܽܠܟܽܘܢ ܠܛܽܘܪܳܐ ܕܫܳܡܪܺܝܢ: ܘܰܚܙܰܘ ܕܠܽܘܚܝܳܐ ܣܰܓܺܝܐܳܐ ܕܰܒܓܰܘܳܗ̇: ܘܰܥܫܽܘܩܝܳܐ ܕܒܳܗ̇.
10 ܘܠܳܐ ܝܳܕܥܺܝܢ ܠܡܶܥܒܰܕ ܡܰܟܣܳܢܽܘܬܳܐ ܐܳܡܰܪ ܡܳܪܝܳܐ: ܘܚܳܡܠܺܝܢ ܚܛܽܘܦܝܳܐ ܘܒܶܙܬܳܐ ܒܣܳܚܖ̈ܳܬܗܽܘܢ.
11 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܐܽܘܠܨܳܢܳܐ ܢܶܚܕܪܺܝܗ̇ ܠܰܐܪܥܳܐ: ܘܢܶܚܽܘܬ ܡܶܢܳܗ̇ ܥܽܘܫܢܳܗ̇ ܘܢܶܬܒܰܙ̈ܙܳܢ ܣܳܚܖ̈ܳܬܳܗ̇.
12 ܗܳܟܰܢܳܐ ܐܳܡܰܪ ܡܳܪܝܳܐ: ܐܰܝܟ ܕܡܰܥܕܶܐ ܪܳܥܝܳܐ ܡܶܢ ܦܽܘܡܳܐ ܕܰܐܪܝܳܐ: ܬܰܪܬܶܝܢ ܟܖ̈ܳܥܺܝܢ ܐܰܘ ܛܰܪܦܳܐ ܕܶܐܕܢܳܐ: ܗܳܟܰܢܳܐ ܢܶܬܦܰܨܽܘܢ ܒܢܰܝ̈ ܝܺܣܪܳܐܶܝܠ ܕܝܳܬܒܺܝܢ ܒܫܳܡܪܺܝܢ: ܒܚܽܘܛܪܳܐ ܕܡܶܢ ܫܶܠܝ: ܘܰܒܥܰܡܳܐ ܕܡܶܢ ܕܰܪܡܣܽܘܩ.
13 ܫܡܰܥܘ ܘܰܐܣܗܶܕܘ ܒܒܰܝܬܳܐ ܕܝܰܥܩܽܘܒ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ.
14 ܡܶܛܽܠ ܕܰܒܝܰܘܡܳܐ ܕܦܳܩܶܕ ܐ̱ܢܳܐ ܥܰܘܠܶܗ ܕܺܝܣܪܳܐܶܝܠ ܥܠܰܘܗܝ: ܐܶܦܩܽܘܕ ܥܰܠ ܡܰܕ̈ܒܚܶܐ ܕܒܶܝܬ ܐܶܝܠ: ܘܢܶܬܓܰܕ̈ܡܳܢ ܩܰܖ̈ܢܳܬܗܽܘܢ ܕܡܰܕ̈ܒܚܶܐ: ܘܢܶܦ̈ܠܳܢ ܥܰܠ ܐܰܪܥܳܐ.
15 ܘܰܐܘܒܶܕ ܒܶܝܬ ܣܰܬܘܳܐ ܥܰܡ ܒܶܝܬ ܩܰܝܛܳܐ: ܘܢܺܐܒܕܽܘܢ ܒ̈ܳܬܶܐ ܕܫܶܢܳܐ: ܘܰܢܣܽܘܦܽܘܢ ܒ̈ܳܬܶܐ ܣܰܓܺܝ̈ܐܶܐ ܐܳܡܰܪ ܡܳܪܝܳܐ.