Amos 5
The Book of Amos
܀ ܥܡܘܣ ܗ ܀
1 ܫܡܰܥܘ ܡܶܠܬܳܐ ܗܳܕܶܐ: ܕܶܐܢܳܐ ܫܳܩܶܠ ܥܠܰܝܟܽܘܢ ܐܽܘܠܺܝܬܳܐ ܒܶܝܬ ܝܺܣܪܳܐܶܝܠ.
2 ܢܶܦܠܰܬ ܘܠܳܐ ܬܰܘܣܶܦ ܠܰܡܩܳܡ ܒܬܽܘܠܬܳܐ ܕܺܝܣܪܳܐܶܝܠ: ܐܶܫܬܰܒܩܰܬ ܥܰܠ ܐܰܪܥܳܐ ܘܠܰܝܬ ܕܰܡܩܺܝܡ ܠܶܗ.
3 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܕܺܝܢ̱ܬܳܐ ܕܢܳܦܩܺܝܢ ܗ̱ܘܰܘ ܡܶܢܳܗ̇ ܐܳܠܶܦ: ܢܶܫܬܰܚܪܽܘܢ ܒܳܗ̇ ܡܳܐܐ: ܘܰܕܢܳܦܩܺܝܢ ܗ̱ܘܰܘ ܡܶܢܳܗ̇ ܡܳܐܐ: ܢܶܫܬܰܚܪܽܘܢ ܒܳܗ̇ ܥܶܣܪܳܐ ܠܰܕܒܶܝܬ ܝܺܣܪܳܐܶܝܠ.
4 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܠܰܕܒܶܝܬ ܝܺܣܪܳܐܶܝܠ: ܒܥܳܐܽܘܢܝ ܠܺܝ ܘܰܚܝܰܘ.
5 ܘܠܳܐ ܬܶܒܥܽܘܢ ܠܒܶܝܬ ܐܶܝܠ: ܘܰܠܓܰܠܓܳܠܳܐ ܠܳܐ ܬܶܥܠܽܘܢ: ܘܰܠܒܺܪܫܒܰܥ ܠܳܐ ܬܶܥܒܪܽܘܢ: ܡܶܛܽܠ ܕܓܰܠܓܳܠܳܐ ܡܶܫܬܒܳܝܽܘ ܬܶܫܬܒܶܐ: ܘܒܶܝܬ ܐܶܝܠ ܢܶܗܘܶܐ ܐܰܝܟ ܕܠܳܐ ܐܺܝܬܰܘܗܝ.
6 ܒܥܰܘ ܠܡܳܪܝܳܐ ܘܰܚܝܰܘ: ܕܠܳܐ ܢܺܐܩܰܕ ܐܰܝܟ ܢܽܘܪܳܐ ܒܶܝܬ ܝܰܘܣܶܦ. ܘܢܶܐܟܽܘܠ ܠܒܶܝܬ ܐܶܝܠ ܘܠܰܝܬ ܕܰܡܕܰܥܶܟ.
7 ܕܗܳܦܟܺܝܢ ܕܺܝܢܳܐ ܠܰܡܪܳܖ̈ܶܐ: ܘܙܰܕܺܝܩܽܘܬܳܐ ܠܰܐܪܥܳܐ.
8 ܫܒܰܩܘ ܠܡܰܢ ܕܰܥܒܰܕ ܟܺܝܡܳܐ ܘܥܺܝܽܘܬܳܐ: ܘܰܗܦܰܟ ܠܨܰܦܪܳܐ ܛܶܠܳܠܰܝ̈ ܡܰܘܬܳܐ: ܘܺܐܝܡܳܡܳܐ ܠܺܠܝܳܐ ܐܰܚܫܶܟ: ܕܰܩ̣ܪܳܐ ܠܡܰܝ̈ܳܐ ܕܝܰܡܳܐ: ܘܶܐܫܰܕ ܐܶܢܽܘܢ ܥܰܠ ܐܰܦܶܝ̈ܗ̇ ܕܰܐܪܥܳܐ ܡܳܪܝܳܐ ܫܡܶܗ.
9 ܕܰܡܫܰܠܶܛ ܚܰܠܳܫܳܐ ܥܰܠ ܥܰܫܺܝܢܳܐ: ܘܡܰܟܺܝܟܳܐ ܥܰܠ ܪܳܡܳܐ ܡܥܰܠܶܐ.
10 ܕܣܳܢܶܝܢ ܒܬܰܪܥܳܐ ܠܡܶܣܟܺܢܳܐ: ܘܰܠܡܰܢ ܕܰܡܡܰܠܶܠ ܬܖ̈ܺܝܨܳܬܳܐ ܡܰܣܠܶܝܢ.
11 ܡܶܛܽܠ ܗܳܢܳܐ ܚܠܳܦ ܕܩܰܦܶܚܬܽܘܢ ܠܡܶܣܟܺܢܳܐ: ܘܩܽܘܖ̈ܒܳܢܶܐ ܓܒܰܝ̈ܳܐ ܢܣܰܒܬܽܘܢ ܡܶܢܗ: ܒ̈ܳܬܶܐ ܕܰܦܣܺܝܠܬܳܐ ܕܰܒܢܰܝܬܽܘܢ ܠܳܐ ܬܶܬܒܽܘܢ ܒܗܽܘܢ. ܘܟܰܖ̈ܡܶܐ ܕܪܶܓܬܳܐ ܕܰܢܨܰܒܬܽܘܢ ܠܳܐ ܬܶܫܬܽܘܢ ܚܰܡܪܗܽܘܢ.
12 ܡܶܛܽܠ ܕܝܳܕܰܥ ܐ̱ܢܳܐ ܕܣܰܓܺܝܐܺܝܢ ܚܰܘܒܰܝ̈ܟܽܘܢ: ܘܥܰܫܺܝܢܺܝܢ ܚܛܳܗܰܝ̈ܟܽܘܢ: ܐܳܠܽܘܨܰܘ̈ܗܝ ܕܙܰܕܺܝܩܳܐ ܢܣܰܒܘ ܫܽܘܚܕܳܐ: ܘܰܠܡܶܣܟܺܢܳܐ ܒܬܰܪܥܳܐ ܨܠܰܘ.
13 ܡܶܛܽܠ ܗܳܢܳܐ ܡܰܢ ܕܡܶܣܬܰܟܽܠ ܒܙܰܒܢܳܐ ܗܰܘ ܢܶܫܬܽܘܩ ܠܶܗ: ܡܶܛܽܠ ܕܙܰܒܢܰܐ ܗ̱ܘ ܕܒܺܝܫܬܳܐ.
14 ܒܥܰܘ ܛܳܒ̈ܳܬܳܐ ܘܠܳܐ ܒܺܝ̈ܫܳܬܳܐ ܕܺܬܚܽܘܢ: ܘܢܶܗܘܶܐ ܗܳܟܰܢܳܐ ܡܳܪܝܳܐ ܚܰܝܠܬܳܢܳܐ ܥܰܡܟܽܘܢ: ܐܰܝܟ ܕܶܐܡܰܪܬܽܘܢ.
15 ܣܢܰܘ ܒܺܝ̈ܫܳܬܳܐ ܘܰܪܚܰܡܘ ܛܳܒ̈ܳܬܳܐ: ܘܰܐܩܺܝܡܘ ܒܬܰܪܥܳܐ ܕܺܝܢܳܐ: ܟܒܰܪ ܢܪܰܚܶܡ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܥܰܠ ܫܰܪܟܶܗ ܕܝܰܘܣܶܦ.
16 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܒܟܽܠܗܽܘܢ ܫܽܘ̈ܩܶܐ ܡܰܖ̈ܩܕܳܬܳܐ: ܘܰܒܟܽܠܗܶܝܢ ܒܶܖ̈ܝܳܬܳܐ ܢܺܐܡܪܽܘܢ ܗܘܳܝ: ܗܘܳܝ: ܘܢܶܩܪܽܘܢ ܠܰܐܟܳܖ̈ܶܐ ܠܶܐܒܠܳܐ: ܘܰܠܡܰܖ̈ܩܕܳܬܳܐ ܠܝܳܕܥܰܝ̈ ܐܽܘܠ̈ܝܳܬܳܐ.
17 ܘܰܒܟܽܠܗܽܘܢ ܟܰܖ̈ܡܶܐ ܡܰܖ̈ܩܕܳܬܳܐ: ܡܶܛܽܠ ܕܥܳܒܰܪ ܐ̱ܢܳܐ ܒܓܰܘܶܟܝ ܐܳܡܰܪ ܡܳܪܝܳܐ.
18 ܘܳܝ ܠܰܕܪܳܓܺܝܢ ܠܝܰܘܡܶܗ ܕܡܳܪܝܳܐ: ܠܡܳܢܳܐ ܗܳܘܶܐ ܝܰܘܡܶܗ ܕܡܳܪܝܳܐ: ܕܚܶܫܽܘܟܽ ܗ̱ܘ ܘܠܳܐ ܢܰܗܺܝܪ.
19 ܐܰܝܟ ܕܥܳܪܶܩ ܓܰܒܪܳܐ ܡܶܢ ܩܕܳܡ ܐܰܪܝܳܐ: ܘܦܳܓܥܳܐ ܒܶܗ ܕܶܒܳܐ: ܘܥܳܐܶܠ ܠܒܰܝܬܳܐ ܘܣܳܡܶܟ ܐܺܝܕܶܗ ܥܰܠ ܐܶܣܬܳܐ: ܘܢܳܟܶܬ ܠܶܗ ܚܶܘܝܳܐ.
20 ܗܳܟܰܢܰܐ ܗ̱ܘ ܝܰܘܡܶܗ ܕܡܳܪܝܳܐ: ܚܶܫܽܘܟܽ ܗ̱ܘ ܘܠܳܐ ܢܰܗܺܝܪ: ܥܰܡܽܘܛܽ ܗ̱ܘ ܘܠܰܝܬ ܒܶܗ ܙܰܗܪܳܐ.
21 ܣܢܺܝܬ ܘܰܐܣܠܺܝܬ ܥܰܕܥܺܕܰܝ̈ܟܽܘܢ: ܘܠܳܐ ܐܰܪܺܝܚ ܒܶܥܨܳܖ̈ܳܬܟܽܘܢ.
22 ܐܳܦܶܢ ܬܰܣܩܽܘܢ ܠܺܝ ܝܰܩ̈ܕܶܐ ܫܰܠ̈ܡܶܐ: ܒܩܽܘܖ̈ܒܳܢܰܝܟܽܘܢ ܠܳܐ ܐܶܨܛܒܶܐ: ܘܰܒܫܽܘܦܪܳܐ ܕܰܡܦܰܛܡܰܝ̈ܟܽܘܢ ܠܳܐ ܐܶܚܽܘܪ.
23 ܐܰܥܒܰܪ ܡܶܢܝ ܩܳܠܳܐ ܕܰܙܡܳܪܳܟ: ܘܰܙܡܺܝܪܬܳܐ ܕܟܶܢܳܪܳܟ ܬܽܘܒ ܠܳܐ ܐܶܫܡܰܥ.
24 ܘܢܶܬܓܠܶܐ ܕܺܝܢܳܐ ܐܰܝܟ ܡܰܝ̈ܳܐ: ܘܙܰܕܺܝܩܽܘܬܳܐ ܐܰܝܟ ܪܓܶܠܬܳܐ ܥܰܫܺܝܢܬܳܐ.
25 ܕܰܠܡܳܐ ܕܶܒܚ̈ܶܐ ܘܩܽܘܖ̈ܒܳܢܶܐ ܩܰܪܶܒܬܽܘܢ ܠܺܝ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ ܒܶܝܬ ܝܺܣܪܳܐܶܝܠ.
26 ܐܶܠܳܐ ܫܩܰܠܬܽܘܢ ܡܰܫܟܢܶܗ ܕܡܰܠܟܽܘܡ: ܘܟܶܐܽܘܢ ܨܰܠܡܟܽܘܢ: ܟܰܘܟܒܳܐ ܕܰܥܒܰܕܬܽܘܢ ܠܟܽܘܢ ܐܰܠܳܗܳܐ.
27 ܐܶܫܒܶܝܟܽܘܢ ܠܶܗܠ ܡܶܢ ܕܰܪܡܣܽܘܩ: ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܫܡܶܗ.