Ezra 5
The Book of Ezra
܀ ܥܙܪܐ ܗ ܀
1 ܘܶܐܬܢܰܒܺܝ ܚܰܓܰܝ ܢܒܺܝܳܐ: ܘܰܙܟܰܪܝܳܐ ܒܰܪ ܥܰܕܽܘ ܢܒܺܝܳܐ: ܥܰܠ ܝܽܗܘܕܳܝ̈ܶܐ ܕܺܐܝܬ ܒܽܐܘܪܺܫܠܶܡ: ܘܒܺܝܗܽܘܕ: ܒܰܫܡܳܐ ܕܰܐܠܳܗܳܐ ܕܺܝܣܪܳܐܶܝܠ ܥܰܠܝܗܽܘܢ.
2 ܘܗܳܝܕܶܝܢ ܩܳܡ ܙܽܘܪܒܳܒܶܠ ܒܰܪ ܫܶܠܰܬܐܶܝܠ: ܘܝܶܫܽܘܥ ܒܰܪ ܝܽܘܙܳܕܳܩ ܘܫܰܪܺܝܘ ܠܡܶܒܢܳܐ ܒܰܝܬܳܐ ܕܰܐܠܳܗܳܐ ܕܒܽܐܘܪܺܫܠܶܡ: ܘܥܰܡܗܽܘܢ ܢܒܺܝ̈ܶܐ ܕܰܐܠܳܗܳܐ: ܡܥܰܕܪܺܝܢ ܠܗܽܘܢ.
3 ܒܶܗ ܕܶܝܢ ܒܙܰܒܢܳܐ ܗܰܘ: ܐܶܬܳܐ ܥܠܰܝܗܽܘܢ ܬܰܬܢܰܝ ܫܰܠܺܝܛܳܐ ܕܒܰܥܒܰܪ ܢܰܗܪܳܐ. ܘܶܐܫܬܰܢܒܽܘܙܳܢ ܘܕܰܐܟܘܳܬܗܽܘܢ. ܘܗܳܟܰܢܳܐ ܐܳܡܪܺܝܢ ܠܗܽܘܢ ܘܰܠܫܰܪܟܳܐ: ܡܰܢܽܘ ܦ̣ܩܰܕ ܠܟܽܘܢ ܒܰܝܬܳܐ ܗܳܢܳܐ ܠܡܶܒܢܳܐ: ܘܫܽܘܪܳܐ ܗܳܢܳܐ ܠܰܡܪܳܡܽܘ.
4 ܘܗܳܝܕܶܝܢ ܐܰܝܟ ܢܳܡܽܘܣܳܐ ܐܶܡܰܪܘ ܠܗܽܘܢ. ܡܰܢ ܐܶܢܽܘܢ ܫܡܳܗ̈ܶܐ ܕܓܰܒܖ̈ܶܐ ܗܳܠܶܝܢ: ܕܗܳܢܳܐ ܒܶܢܝܳܢܳܐ ܒܳܢܶܝܢ.
5 ܘܥܰܝܢܳܐ ܕܰܐܠܳܗܳܐ ܗܘܳܬ ܥܰܠ ܫܒܺܝܬܳܐ ܕܺܝܗܽܘܕܳܐ. ܘܠܳܐ ܒܛܶܠܘ ܥܕܰܡܳܐ ܕܦܶܬܓܳܡܳܐ ܠܕܳܪܺܝܘܳܫ ܢܺܐܙܰܠ. ܘܗܳܝܕܶܝܢ ܢܬܺܝܒܽܘܢ ܦܶܬܓܳܡܳܐ ܥܰܠ ܗܳܕܶܐ.
6 ܦܰܪܫܰܓܢܳܐ ܕܶܐܓܰܪܬܳܐ ܕܫܰܕܰܪ ܬܰܬܢܰܝ ܫܰܠܺܝܛܳܐ ܕܒܰܥܒܰܪ ܢܰܗܪܳܐ: ܘܶܐܫܬܰܢܒܽܘܙܳܢ ܘܚܰܒܖ̈ܰܘܗܝ ܕܒܰܥܒܰܪ ܢܰܗܪܳܐ: ܠܘܳܬ ܕܳܪܺܝܳܘܫ ܡܰܠܟܳܐ.
7 ܦܶܬܓܳܡܳܐ ܫܰܕܰܪܘ ܠܘܳܬܶܗ. ܘܗܳܟܰܢܳܐ ܟܬܺܝܒ ܒܶܗ. ܠܕܳܪܺܝܳܘܫ ܡܰܠܟܳܐ: ܫܠܳܡ.
8 ܢܶܗܘܶܐ ܕܶܝܢ ܝܳܕܰܥ ܡܰܠܟܳܐ: ܕܶܐܙܰܠܢܰܢ ܠܰܝܗܽܘܕ ܠܰܡܕܺܝܢ̱ܬܳܐ ܕܰܐܠܳܗܳܐ ܪܰܒܳܐ. ܘܗܺܝ ܡܶܬܒܰܢܝܳܐ ܒܟܺܐܦ̈ܶܐ ܪܰܘܖ̈ܒܳܬܳܐ. ܘܥܰܖ̈ܩܶܐ ܣܽܘܓܳܐܐ ܩܛܺܝܖ̈ܳܢ ܒܶܐܣܶܝ̈ܗ̇. ܘܰܥܒܺܝܕܳܬܳܐ ܪܰܘܖ̈ܒܳܬܳܐ ܡܶܬܥܰܒ̈ܕܳܢ ܬܰܡܳܢ. ܘܰܥܒܳܕܳܐ ܪܰܒܳܐ ܣܳܠܶܩ ܘܳܐܙܶܠ ܠܪܺܝܫ ܒܺܐܝܕܰܝ̈ܗܽܘܢ.
9 ܘܗܳܝܕܶܝܢ ܫܰܐܶܠܢ ܐܶܢܽܘܢ ܠܩܰܫܺܝ̈ܫܶܐ ܗܳܢܽܘܢ: ܘܗܳܟܰܢܳܐ ܐܶܡܰܪܢ ܠܗܽܘܢ: ܡܰܢܽܘ ܦ̣ܩܰܕ ܠܟܽܘܢ ܒܰܝܬܳܐ ܗܳܢܳܐ ܠܡܶܒܢܳܐ: ܘܫܽܘܪܳܐ ܗܳܢܳܐ ܠܰܡܪܳܡܽܘ.
10 ܘܳܐܦ ܫܡܳܗܰܝ̈ܗܽܘܢ ܫܰܐܶܠܢ ܐܶܢܽܘܢ: ܕܢܰܘܕܥܳܟ ܘܰܕܢܶܟܬܽܘܒ ܫܡܳܗ̈ܶܐ ܕܓܰܒܖ̈ܶܐ ܕܰܒܖ̈ܺܝܫܰܝܗܽܘܢ.
11 ܘܗܳܟܰܢܳܐ ܐܰܬܺܝܒܽܘܢ ܦܶܬܓܳܡܳܐ ܘܳܐܡܪܺܝܢ: ܚܢܰܢ ܐܶܢܽܘܢ ܥܰܒܕܰܘ̈ܗܝ ܕܰܐܠܳܗ ܫܡܰܝܳܐ. ܘܒܶܢܝܳܢܳܐ ܕܒܰܝܬܳܐ ܗܳܢܳܐ ܕܒܳܢܶܝܢܰܢ: ܒܢܶܐ ܗ̱ܘܳܐ ܡܶܢ ܩܕܳܡ ܫܢܰܝ̈ܳܐ ܣܰܓܺܝ̈ܐܳܬܳܐ. ܘܡܰܠܟܳܐ ܕܺܝܣܪܳܐܶܝܠ ܘܪܰܘܖ̈ܒܳܢܰܘܗܝ ܫܰܟܠܠܽܘܗܝ.
12 ܐܶܠܳܐ ܡܶܛܽܠ ܕܰܐܪܓܶܙܘ ܐܰܒܳܗܰܝ̈ܢ ܠܰܐܠܳܗ ܫܡܰܝܳܐ: ܝܰܗܒ ܐܶܢܽܘܢ ܒܺܐܝܕܳܐ ܕܰܢܒܽܘܟܰܕܢܳܨܰܪ ܡܰܠܟܳܐ ܟܽܠܕܳܝܳܐ. ܗܳܢܳܐ ܣܰܬܪܶܗ. ܘܥܰܡܳܐ ܫܒܳܐ ܠܒܳܒܶܠ.
13 ܒܪܰܡ ܒܰܫܢܰܬ ܚܕܳܐ ܠܟܽܘܪܳܫ ܡܰܠܟܳܐ ܕܦܳܪܶܣ: ܟܽܘܪܳܫ ܡܰܠܟܳܐ ܣܳܡ ܢܳܡܽܘܣܳܐ: ܕܒܶܝܬ ܐܰܠܳܗܳܐ ܗܳܢܳܐ ܠܡܶܒܢܳܐ.
14 ܘܳܐܦ ܡܳܐܢ̈ܶܐ ܕܕܰܗܒܳܐ ܘܰܕܣܺܐܡܳܐ ܕܒܶܝܬ ܐܰܠܳܗܳܐ: ܕܰܐܦܶܩ ܗ̱ܘܳܐ ܢܒܽܘܟܰܕܢܳܨܰܪ ܡܰܠܟܳܐ ܡܶܢ ܗܰܝܟܠܳܐ ܕܒܽܐܘܪܺܫܠܶܡ: ܘܰܐܘܒܶܠ ܐܶܢܽܘܢ ܠܒܳܒܶܠ ܠܗܰܝܟܠܶܗ. ܘܰܐܦܶܩ ܐܶܢܽܘܢ ܟܽܘܪܳܫ ܡܰܠܟܳܐ ܡܶܢ ܗܰܝܟܠܳܐ ܕܒܳܒܶܠ: ܘܝܰܗܒ ܐܶܢܽܘܢ ܠܫܶܫܡܳܨܰܪ ܫܡܶܗ: ܡܶܛܽܠ ܕܫܰܠܺܝܛܳܐ ܥܰܒܕܶܗ.
15 ܘܶܐܡܰܪ ܠܶܗ: ܕܗܳܠܶܝܢ ܡܳܐܢ̈ܶܐ ܫܩܽܘܠ: ܙܠ ܘܰܐܘܒܶܠ: ܣܺܝܡ ܐܶܢܽܘܢ ܒܗܰܝܟܠܳܐ ܕܒܽܐܘܪܺܫܠܶܡ. ܘܗܽܘ ܗܽܘ ܒܰܝܬܳܐ: ܒܰܐܬܪܶܗ ܢܶܬܒܢܶܐ.
16 ܗܽܘ ܕܶܝܢ ܫܶܫܡܳܨܰܪ ܐܶܬܳܐ: ܘܰܐܪܡܺܝ ܫܶܬܶܐܣ̈ܶܐ ܕܒܰܝܬܳܐ ܗܳܢܳܐ ܕܒܽܐܘܪܺܫܠܶܡ ܘܡܶܢ ܗܳܝܕܶܝܢ ܘܰܥܕܰܡܳܐ ܠܶܗܫܳܐ ܡܶܬܒܢܶܐ: ܘܠܳܐ ܓܳܡܰܪ.
17 ܡܶܟܺܝܠ ܐܶܢ ܫܰܦܺܝܪܳܐ ܩܕܳܡ ܡܰܠܟܳܐ: ܢܶܒܨܶܐ ܒܰܟܬܒ̈ܶܐ: ܕܺܐܝܬ ܒܶܝܬ ܓܰܙܳܐ ܕܡܰܠ̈ܟܶܐ ܕܒܳܒܶܠ ܐܶܢ ܐܺܝܬܰܘܗܝ: ܘܡܶܢ ܟܽܘܪܳܫ ܡܰܠܟܳܐ ܦܩܺܝܕ: ܕܢܶܬܒܢܶܐ ܒܰܝܬܳܐ ܗܳܢܳܐ ܕܰܐܠܳܗܳܐ ܕܒܽܐܘܪܺܫܠܶܡ ܘܨܶܒܝܳܢܶܗ ܕܡܰܠܟܳܐ ܥܰܠ ܗܳܕܶܐ ܢܶܫܬܰܕܰܪ ܠܘܳܬܰܢ.