Ezra 7
The Book of Ezra
܀ ܥܙܪܐ ܙ ܀
1 ܒܳܬܰܪ ܗܳܠܶܝܢ ܟܽܠܗܶܝܢ ܡ̈ܶܠܶܐ: ܒܡܰܠܟܽܘܬܳܐ ܕܰܐܪܛܰܚܫܶܫܬ ܡܰܠܟܳܐ ܕܦܳܪܶܣ: ܥܰܙܪܳܐ ܒܰܪ ܣܰܪܝܳܐ: ܒܰܪ ܥܰܙܰܪܝܳܐ: ܒܰܪ ܚܶܠܰܩܝܳܐ.
2 ܒܰܪ ܫܳܠܽܘܡ: ܒܰܪ ܨܳܕܽܘܩ: ܒܰܪ ܐܰܚܺܝܛܽܘܒ.
3 ܒܰܪ ܐܳܡܰܪܝܳܐ: ܒܰܪ ܥܰܙܰܪܝܳܐ: ܒܰܪ ܡܰܪܝܽܘܬ.
4 ܒܰܪ ܙܪܰܚܝܳܐ: ܒܰܪ ܓܰܕܺܝ: ܒܰܪ ܒܰܩܺܝ.
5 ܒܰܪ ܐܰܒܝܶܫܽܘܥ: ܒܰܪ ܦܺܝܢܚܶܣ: ܒܰܪ ܐܶܠܺܝܥܳܙܰܪ: ܒܰܪ ܐܰܗܪܽܘܢ ܟܳܗܢܳܐ.
6 ܪܺܝܫܐ ܗܘܳܐ ܥܰܙܪܳܐ: ܕܰܣܠܶܩ ܡܶܢ ܒܳܒܶܠ. ܗܽܘ ܗܘܳܐ ܣܳܦܪܳܐ ܚܰܟܺܝܡܳܐ ܒܢܳܡܽܘܣܳܐ ܕܡܽܘܫܶܐ: ܕܝܰܗܒ ܠܶܗ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܝܰܗܒ ܠܶܗ ܡܰܠܟܳܐ ܡܰܘܗܰܒܬܳܐ: ܕܰܐܝܟܰܢܳܐ ܕܨܳܒܶܐ ܢܗܰܠܶܟ ܒܢܳܡܽܘܣܶܗ ܕܡܳܪܝܳܐ.
7 ܘܰܣܠܶܩܘ ܡܶܢ ܒܢܰܝ̈ ܝܺܣܪܳܐܶܝܠ: ܘܡܶܢ ܟܽܘܡܖ̈ܶܐ ܘܠܶܘ̈ܳܝܶܐ: ܗܳܢܽܘܢ ܡܫܰܡܫܳܢ̈ܶܐ: ܘܡܶܢ ܬܰܖ̈ܥܶܐ ܘܢܳܬܢܳܝ̈ܶܐ: ܘܡܶܢ ܐܰܝܠܶܝܢ ܕܰܣܠܶܩܘ ܠܽܐܘܪܺܫܠܶܡ: ܒܰܫܢܰܬ ܫܒܰܥ ܠܰܐܪܛܰܚܫܶܫܬ ܡܰܠܟܳܐ.
8 ܘܶܐܬܘ ܠܽܐܘܪܺܫܠܶܡ ܒܝܰܪܚܳܐ ܕܚܰܡܫܳܐ. ܗܺܝ ܫܢܰܬ ܫܒܰܥ ܠܡܰܠܟܳܐ.
9 ܡܶܛܽܠ ܕܰܒܝܰܪܚܳܐ ܩܰܕܡܳܝܳܐ ܫܰܪܺܝܘ ܠܡܶܣܰܒ ܡܶܢ ܒܳܒܶܠ. ܘܰܒܚܰܕ ܒܝܰܪܚܳܐ ܕܚܰܡܫܳܐ: ܐܶܬܘ ܠܽܐܘܪܺܫܠܶܡ: ܐܰܝܟ ܐܺܝܕܳܐ ܕܰܐܠܳܗܳܐ ܕܰܐܛܐܒܰܬ ܠܗܽܘܢ.
10 ܡܶܛܽܠ ܕܥܰܙܪܳܐ ܐܰܬܩܶܢ ܠܶܒܶܗ ܠܡܶܥܒܰܕ ܢܳܡܽܘܣܶܗ ܕܡܳܪܝܳܐ: ܘܰܠܡܶܥܒܰܕ ܘܰܠܡܰܠܳܦܽܘ ܒܺܝܣܪܳܐܶܝܠ ܢܳܡܽܘ̈ܣܶܐ ܘܕܺܝܢ̈ܶܐ.
11 ܘܗܳܢܳܐ ܦܰܪܫܰܓܢܳܐ ܕܶܐܓܰܪܬܳܐ ܕܝܰܗܒ ܡܰܠܟܳܐ ܐܰܪܛܰܚܫܶܫܬ ܠܥܰܙܪܳܐ ܟܽܘܡܪܳܐ: ܣܳܦܪܳܐ ܕܦܶܬܓܳܡ̈ܶܐ ܘܦܽܘܩܕܳܢܰܘ̈ܗܝ ܕܡܳܪܝܳܐ ܘܢܳܡܽܘܣܰܘ̈ܗܝ ܥܰܠ ܟܽܠܶܗ ܝܺܣܪܳܐܶܝܠ.
12 ܐܰܪܛܰܚܫܶܫܬ ܡܰܠܟܳܐ ܡܠܶܟ ܡܰܠ̈ܟܶܐ: ܠܥܰܙܪܳܐ ܟܽܘܡܪܳܐ ܘܣܳܦܪܳܐ: ܣܳܦܰܪ ܢܳܡܽܘܣܳܐ ܕܰܐܠܳܗ ܫܡܰܝܳܐ: ܫܠܳܡ.
13 ܐܶܢܳܐ ܦܶܩܕܶܬ ܘܣܳܡܶ݀ܬ ܢܳܡܽܘܣܳܐ: ܕܟܽܠܡܰܢ ܕܨܳܒܶܐ ܒܡܰܠܟܽܘܬܝ ܡܶܢ ܥܰܡܳܐ ܕܺܝܣܪܳܐܶܝܠ: ܘܡܶܢ ܟܽܘܡܖ̈ܶܐ ܘܡܶܢ ܠܶܘ̈ܳܝܶܐ: ܕܢܺܐܙܽܠܘܢ ܥܰܡܳܟ: ܢܺܐܙܽܠܘܢ.
14 ܐܶܢܳܐ ܦܶܩܕܶܬ ܘܣܳܡܶ݀ܬ ܢܳܡܽܘܣܳܐ: ܘܫܰܕܪܶܬ ܡܶܢ ܩܰܖ̈ܺܝܒܰܝ ܠܰܡܫܰܐܳܠܽܘ ܥܰܠ ܝܺܗܽܘܕ ܘܥܰܠ ܐܽܘܪܺܫܠܶܡ: ܘܳܐܦ ܠܰܡܫܰܐܳܠܽܘ ܥܰܠ ܢܳܡܽܘܣܳܐ ܕܰܐܠܳܗܳܟ ܕܒܺܐܝܕܰܝ̈ܟ.
15 ܘܰܠܡܰܘܒܳܠܽܘ ܟܶܣܦܳܐ ܘܕܰܗܒܳܐ ܕܡܰܠܟܳܐ. ܕܶܐܢܳܐ ܡܶܢ ܨܒܽܘܬ ܪܶܥܝܳܢܝ ܩܰܪܒܶ݀ܬ ܠܒܰܝܬܳܐ ܕܡܳܪܝܳܐ: ܒܽܐܘܪܺܫܠܶܡ ܡܰܫܟܢܳܐ ܗ̱ܘ.
16 ܟܽܠ ܟܶܣܦܳܐ ܘܕܰܗܒܳܐ ܕܬܶܫܟܰܚ ܒܟܽܠ ܡܕܺܝܢܰܬ ܒܳܒܶܠ: ܥܰܡܳܟ ܢܺܐܙܰܠ. ܘܟܽܘܡܖ̈ܶܐ ܘܠܶܘ̈ܳܝܶܐ: ܘܰܐܝܠܶܝܢ ܕܨܳܒܶܝܢ ܠܡܺܐܙܰܠ ܥܰܡܳܟ: ܢܺܐܙܽܠܘܢ ܠܒܰܝܬܳܐ ܕܰܐܠܶܗܐ ܕܒܽܐܘܪܺܫܠܶܡ.
17 ܘܡܶܟܺܝܠ ܝܰܨܺܝܦܳܐܺܝܬ ܬܶܙܒܶܢ ܒܟܶܣܦܳܐ ܗܳܢܳܐ: ܬܰܘܖ̈ܶܐ: ܘܕܶܟܖ̈ܶܐ: ܘܶܐܡܖ̈ܶܐ: ܩܽܘܖ̈ܒܳܢܰܝܗܽܘܢ ܘܢܽܘܩܳܝܗܽܘܢ ܘܰܬܩܰܪܶܒ ܐܶܢܽܘܢ ܥܰܠ ܡܰܕܒܚܳܐ ܕܰܐܠܳܗܳܟܽܘܢ ܒܽܐܘܪܺܫܠܶܡ.
18 ܘܡܶܕܶܡ ܕܫܳܦܰܪ ܠܳܟ ܘܠܰܐܚܰܝ̈ܟ: ܒܫܰܪܟܳܐ ܕܟܶܣܦܳܐ ܗܳܢܳܐ ܠܡܶܥܒܰܕ: ܐܰܝܟ ܨܶܒܝܳܢܶܗ ܕܰܐܠܳܗܳܟ: ܬܶܥܒܕܽܘܢ.
19 ܘܡܳܐܢ̈ܶܐ ܕܡܶܬܝܰܗܒܺܝܢ ܠܳܟ ܠܦܽܘܠܚܳܢܳܐ ܕܒܰܝܬܶܗ ܕܰܐܠܳܗܳܟ: ܐܰܫܠܶܡ ܩܕܳܡ ܐܰܠܳܗܳܐ ܕܒܽܐܘܪܺܫܠܶܡ.
20 ܘܫܰܪܟܳܐ ܕܡܳܐܢ̈ܶܐ ܕܡܶܬܒܥܶܝܢ ܠܳܟ ܠܬܶܫܡܶܫܬܳܐ ܕܒܶܝܬ ܐܰܠܳܗܳܟ ܬܶܣܰܒ ܘܬܶܬܶܠ ܡܶܢ ܓܰܙܶܗ ܕܡܰܠܟܳܐ.
21 ܐܶܢܳܐ ܐܰܪܛܰܚܫܶܫܬ ܡܰܠܟܳܐ ܣܳܡܶ݀ܬ ܢܳܡܽܘܣܳܐ ܠܟܽܠܗܽܘܢ ܓܺܙܰܒܖ̈ܶܐ ܕܺܐܝܬ ܒܰܥܒܰܪ ܢܰܗܪܳܐ. ܕܟܽܠ ܡܶܕܶܡ ܕܢܶܫܐܰܠܟܽܘܢ ܥܰܙܪܳܐ ܟܽܘܡܪܳܐ: ܣܳܦܪܳܐ ܣܳܦܰܪ ܢܳܡܽܘܣܳܐ ܕܰܐܠܳܗ ܫܡܰܝܳܐ: ܚܦܺܝܛܳܐܺܝܬ ܬܶܥܒܕܽܘܢ.
22 ܥܕܰܡܳܐ ܠܟܶܣܦܳܐ ܟܰܟܖ̈ܶܐ ܡܳܐܐ: ܥܕܰܡܳܐ ܠܚܶܛ̈ܶܐ ܟܽܘܡܖ̈ܶܐ ܡܳܐܐ: ܥܕܰܡܳܐ ܠܚܰܡܪܳܐ ܖ̈ܶܒܥܶܐ ܡܳܐܐ: ܥܕܰܡܳܐ ܠܡܶܫܚܳܐ ܖ̈ܶܒܥܶܐ ܡܳܐܐ: ܘܡܶܠܚܳܐ ܕܠܳܐ ܟܬܳܒ.
23 ܘܟܽܠ ܡܶܕܶܡ ܒܦܶܬܩܳܐ ܢܶܬܺܝܗܶܒ ܘܗܰܒܘ ܠܶܗ ܐܰܝܟ ܢܳܡܽܘܣܳܐ ܕܰܐܠܳܗ ܫܡܝܳܐ. ܢܶܣܰܒ ܘܢܶܥܒܶܕ ܘܠܳܐ ܢܶܗܘܶܐ ܪܽܘܓܙܳܐ ܥܰܠ ܡܰܠܟܽܘܬ ܡܰܠܟܳܐ ܘܰܒܢܰܘ̈ܗܝ.
24 ܘܰܠܟܽܘܢ ܡܰܘܕܥܺܝܢܰܢ ܕܰܠܟܽܠ ܟܽܘܡܖ̈ܶܐ ܘܠܶܘ̈ܳܝܶܐ: ܘܩܳܖ̈ܝܰܝ ܒܩܰܖ̈ܢܳܬܳܐ: ܘܰܠܦܳܠܚܰܝ̈ ܒܶܝܬ ܐܰܠܳܗܳܐ: ܠܳܐ ܫܰܠܺܝܛ ܠܟܽܘܢ ܠܡܺܐܡܰܪ ܠܗܽܘܢ ܡܶܕܶܡ.
25 ܘܰܐܢ̱ܬ ܥܰܙܪܳܐ ܣܳܦܪܳܐ: ܐܰܝܟ ܚܶܟܡܬܳܟ: ܕܰܐܠܳܗܳܟ ܝܰܗܒ ܠܳܟ: ܥܒܶܕ ܪܰܘܖ̈ܒܳܢܺܝܢ ܘܕܳܝܢܺܝܢ. ܕܢܶܗܘܽܘܢ ܕܳܝܢܺܝܢ ܠܟܽܠܶܗ ܥܰܡܳܐ ܕܺܐܝܬ ܒܰܥܒܰܪ ܢܰܗܪܳܐ: ܠܟܽܠ ܝܳܕܥܰܝ̈ ܢܳܡܽܘܣܳܐ ܕܰܐܠܳܗܳܟ ܘܡܰܢ ܕܠܳܐ ܝܳܕܰܥ: ܬܰܘܕܥܺܝܘܗܝ.
26 ܘܟܽܠ ܕܠܳܐ ܢܶܗܘܶܐ ܥܳܒܶܕ ܢܳܡܽܘܣܳܐ ܕܰܐܠܳܗܳܟ: ܘܢܳܡܽܘܣܳܐ ܕܡܰܠܟܳܐ: ܝܰܨܺܝܦܳܐܺܝܬ ܢܶܗܘܶܐ ܡܶܬܥܒܶܕ ܡܶܢܗ ܕܺܝܢܳܐ: ܐܶܢ ܠܡܰܘܬܳܐ ܘܶܐܢ ܠܚܰܝ̈ܶܐ: ܘܶܐܢ ܠܚܽܘܣܪܳܢܳܐ ܕܢܶܟܣ̈ܶܐ: ܘܶܐܢ ܠܒܶܝܬ ܐܰܣܺܝܖ̈ܶܐ.
27 ܒܪܺܝܟ ܐܰܢ̱ܬ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܢ: ܕܝܰܗܒܬ ܡܶܠܬܳܐ ܗܳܕܶܐ ܒܠܶܒܶܗ ܕܡܰܠܟܳܐ: ܠܰܡܫܰܒܳܚܽܘ ܒܰܝܬܳܐ ܕܡܳܪܝܳܐ ܒܽܐܘܪܺܫܠܶܡ.
28 ܘܰܥܠܰܝ ܐܰܪܡܺܝ ܚܶܣܕܳܐ ܩܕܳܡ ܡܰܠܟܳܐ: ܘܰܩܕܳܡ ܪܰܘܖ̈ܒܳܢܰܝ ܡܰܠܟܳܐ ܓܰܢ̱ܒܳܖ̈ܶܐ. ܘܶܐܢܳܐ ܐܶܬܥܰܫܢܶ݀ܬ ܐܰܝܟܰܢܳܐ ܕܰܗܘܳܬ ܥܠܰܝ ܪܽܘܚܶܗ ܕܡܳܪܝܳܐ ܐܰܠܳܗܝ. ܘܰܓܒܶܝ݀ܬ ܡܶܢ ܝܺܣܪܳܐܶܝܠ ܐ̱ܢܳܫ̈ܳܐ ܖ̈ܺܝܫܶܐ ܕܢܶܣܩܽܘܢ ܥܰܡܝ.