Judith 3
The Book of Judith
܀ ܝܗ̱ܘܕܝܬ ܓ ܀
1 ܘܢܶܦܠܰܬ ܕܶܚܠܬܳܐ ܘܰܪܬܺܝܬܳܐ ܥܰܠ ܟܽܠ ܕܥܳܡܪܺܝܢ ܥܰܠ ܓܶܢܒ ܝܰܡܳܐ. ܘܰܒܨܽܘܪ ܘܰܒܨܰܝܕܳܢ: ܘܥܰܠ ܥܳܡܽܘܪ̈ܶܝܗ̇ ܕܣܽܘܪܺܝ: ܘܥܰܠ ܟܽܠ ܕܥܳܡܪܺܝܢ ܒܠܶܒܢܳܐ: ܘܥܰܠ ܥܳܡܽܘܪ̈ܶܝܗ̇ ܕܰܐܫܕܽܘܕ ܘܕܰܐܫܩܳܠܽܘܢ ܘܰܕܥܶܐܙܳܐ. ܘܰܕܚܶܠܘ ܡܶܢܶܗ ܛܳܒ. ܘܫܰܕܰܪܘ ܠܘܳܬܶܗ ܐܺܝܙܓܰܕ̈ܶܐ ܒܡ̈ܶܠܶܐ ܕܰܫܠܳܡܳܐ ܘܶܐܡܰܪܘ.
2 ܐܳܡܪܺܝܢܰܢ: ܚܢܰܢ ܥܰܒ̈ܕܶܐ ܚܢܰܢ ܕܢܒܽܘܟܰܕܢܳܨܰܪ ܡܰܠܟܳܐ ܪܰܒܳܐ.
3 ܗܳܐ ܩܳܝܡܺܝܢܰܢ ܩܕܳܡܰܝܟ.
4 ܥܒܶܕ ܠܰܢ ܐܰܝܟ ܕܫܰܦܺܝܪ ܠܳܟ.
5 ܘܗܳܐ ܡܕܺܝ̈ܢܳܬܰܢ ܘܥܳܡܽܘܖ̈ܰܝܗܶܝܢ ܥܰܒ̈ܕܰܝܟ ܐܶܢܽܘܢ.
6 ܬܳܐ ܘܦܰܠܶܓ ܒܰܢ ܐܰܝܟ ܕܛܳܒ ܒܥܰܝܢܰܝ̈ܟ.
7 ܘܶܐܬܰܘ ܐܺܝܙ̈ܓܰܕܶܐ: ܘܶܐܡܰܪ ܠܶܐܠܦܰܪܢܳܐ ܐܰܝܟ ܡ̈ܶܠܶܐ ܗܳܠܶܝܢ. ܘܰܢܚܶܬ ܠܘܳܬ ܡܕܺܝܢܬܳܐ ܕܥܰܠ ܓܶܢܒ ܝܰܡܳܐ ܗܽܘ ܘܚܰܝܠܶܗ. ܘܰܐܩܺܝܡ ܡܰܛܪ̈ܳܬܳܐ ܒܰܡܕܪܝ̈ܢܳܬܳܐ ܥܰܫܺܝ̈ܢܳܬܳܐ.
8 ܘܰܕܒܰܪ ܡܶܢܗܶܝܢ ܥܶܕܪܳܐ ܓܰܒܖ̈ܶܐ ܓܒܰܝ̈ܳܐ.
9 ܘܩܰܒܠܳܝ̈ܗܝ ܡܕܺܝ̈ܢܳܬܳܐ ܘܩܽܘܪ̈ܝܳܐ: ܒܰܟܠܺܝ̈ܠܶܐ ܘܒܰܦܠܰܓ̈ܶܐ ܘܒܰܪ̈ܒܺܝܥܶܐ.
10 ܘܰܥܩܰܪ ܟܽܠ ܗܰܝܟܠܰܝ̈ܗܽܘܢ. ܘܟܽܠܗܶܝܢ ܕܶܚ̈ܠܳܬܗܽܘܢ ܦܰܣܶܩ.
11 ܡܶܛܽܠ ܕܝܰܗܒ ܗܘܳܐ ܒܐ̱ܪܳܙ ܠܡܰܘܒܳܕܽܘ ܠܟܽܠܗܽܘܢ ܐܰܠܳܗ̈ܶܐ ܕܰܐܪܥܳܐ. ܐܰܝܟ ܕܠܶܗ ܠܢܒܽܘܟܳܕܢܳܨܰܪ ܢܶܦܠܚܽܘܢ ܘܢܶܣܓܕܽܘܢ ܟܽܠܗܽܘܢ ܥܰܡ̈ܡܶܐ ܘܠܶܫܳܢ̈ܶܐ: ܘܢܶܩܪܽܘܢܶܗ ܐܰܠܳܗ.
12 ܘܶܐܬܳܐ ܠܺܐܝܙܰܪܥܺܝܠ ܕܥܰܠ ܓܶܢܒ ܕܳܘܬܰܢ. ܠܽܘܩܒܰܠ ܡܰܣܪܳܐ ܪܰܒܳܐ ܕܺܝܗܽܘܕ. ܘܰܫܪܳܐ ܒܶܝܬ ܓܒܰܥ ܠܒܰܝܫܳܢ.
13 ܘܰܥܒܰܕ ܬܰܡܳܢ ܝܺܪܰܚ ܝܰܘ̈ܡܺܝܢ: ܠܡܰܬܩܳܢܽܘ ܟܽܠܗܶܝܢ ܥܒܺܝ̈ܕܳܬܳܐ ܕܚܰܝܠܶܗ.