Nehemiah 5
The Book of Nehemiah
܀ ܢܚܡܝܐ ܗ ܀
1 ܘܗܳܝܕܶܝܢ ܐܰܝܠܶܠܘ ܥܰܡܳܐ ܘܢܶܫܰܝ̈ܗܽܘܢ ܝܺܠܰܠܬܳܐ ܪܰܒܬܳܐ: ܥܰܠ ܐܰܚܰܝ̈ܗܽܘܢ ܝܽܗ̱ܘܕܳܝ̈ܶܐ.
2 ܘܺܐܝܬ ܕܳܐܡܪܺܝܢ: ܒܢܰܝ̈ܢ ܘܰܒ̈ܢܳܬܰܢ ܘܰܐܚܰܝ̈ܢ: ܣܰܓܺܝܐܺܝܢ ܢܶܣܰܒ ܥܒܽܘܪܳܐ: ܘܢܶܐܟܽܘܠ ܘܢܺܚܶܐ.
3 ܘܺܐܝܬ ܕܳܐܡܪܺܝܢ: ܚܰܩ̈ܠܳܬܰܢ ܘܒܳܬܰܝ̈ܢ ܘܟܰܖ̈ܡܰܝܢ ܡܙܰܒܢܺܝܢܰܢ ܘܢܳܣܒܺܝܢܰܢ ܥܒܽܘܪܳܐ ܒܟܰܦܢܳܐ: ܘܚܳܐܶܝܢܰܢ.
4 ܘܺܐܝܬ ܕܳܐܡܪܺܝܢ ܢܺܐܙܰܦ ܟܶܣܦܳܐ ܡܶܢ ܡܰܕܰܐܬܳܐ ܕܡܰܠܟܳܐ. ܘܢܶܦܠܽܘܚ ܚܰܩ̈ܠܳܬܰܢ ܘܟܰܖ̈ܡܰܝܢ: ܘܢܺܚܶܐ.
5 ܘܺܐܝܬ ܕܳܐܡܪܺܝܢ: ܡܶܟܺܝܠ ܐܰܝܟ ܒܶܣܪܳܐ ܕܰܐܚܰܝ̈ܢ: ܗܳܟܰܢܳܐ ܐܳܦ ܒܶܣܪܰܢ. ܘܰܐܝܟ ܒܢܰܝ̈ܗܽܘܢ: ܗܳܟܰܢܳܐ ܐܳܦ ܒܢܰܝ̈ܢ ܗܳܐ ܡܶܟܺܝܠ ܟܳܒܫܺܝܢ ܚܢܰܢ ܒܢܰܝ̈ܢ ܘܰܒ̈ܢܳܬܰܢ ܠܥܰܒ̈ܕܺܝܢ. ܘܺܐܝܬ ܡܶܢ ܒ̈ܢܳܬܰܢ ܕܡܶܬܟܰܒ̈ܫܳܢ ܠܰܐܡ̈ܗܳܬܳܐ. ܘܠܳܐ ܡܪܺܝܡܺܝܢ ܩܕܳܡ ܐܰܠܳܗܳܐ ܐܺܝ̈ܕܰܝܗܽܘܢ. ܘܚܰܩ̈ܠܳܬܰܢ ܘܟܰܖ̈ܡܰܝܢ ܘܢܶܟܣܰܝ̈ܢ ܡܶܬܝܰܗܒܺܝܢ ܠܰܐ̱ܚܖ̈ܳܢܶܐ.
6 ܘܟܶܪܝܰܬ ܠܺܝ ܛܳܒ ܟܰܕ ܫܶܡܥܶ݀ܬ ܝܺܠܰܠܬܗܽܘܢ ܘܡ̈ܶܠܶܐ ܗܳܠܶܝܢ.
7 ܘܶܐܬܬܒܰܪ ܠܶܒܝ ܒܓܰܘܝ. ܘܰܐܓܪܶܬ ܪܽܘܚܝ: ܘܡܰܠܠܶܬ ܥܰܡ ܩܰܫܺܝ̈ܫܶܐ ܘܥܰܡ ܪܰܘܖ̈ܒܳܢܶܐ.
8 ܘܶܐܡܪܶܬ ܠܗܽܘܢ: ܕܰܚܢܰܢ ܩܢܰܝܢܰܢ ܠܰܐܚܰܝ̈ܢ ܝܽܗ̱ܘܕܳܝ̈ܶܐ: ܕܡܶܙܕܰܒܢܺܝܢ ܠܥܰܡ̈ܡܶܐ: ܗܶܢܽܘܢ ܘܰܒܢܰܝ̈ܗܽܘܢ ܓܰܒܪܳܐ ܠܰܐܚܽܘܗܝ ܫܳܩܠܺܝܢ ܐܢ̱ܬܽܘܢ ܡܶܛܽܠ ܗܳܢܳܐ ܝܶܗܒܶ݀ܬ ܥܠܰܝܗܽܘܢ ܩܳܠܳܐ. ܘܶܐܡܪܶܬ ܠܗܽܘܢ: ܐܳܦ ܐܰܢ̱ܬܽܘܢ ܬܙܰܒܢܽܘܢ ܠܰܐܚܰܝ̈ܟܽܘܢ ܘܰܫܬܶܩܘ: ܘܠܳܐ ܝܰܗܒܘ ܠܺܝ ܦܶܬܓܳܡ.
9 ܘܶܐܡܪܶܬ ܠܗܽܘܢ: ܠܳܐ ܫܰܦܺܝܪ ܦܶܬܓܳܡܳܐ ܕܰܐܢ̱ܬܽܘܢ ܥܳܒܕܺܝܢ. ܡܶܟܺܝܠ ܒܕܶܚܠܬܳܐ ܕܰܐܠܳܗܰܢ ܠܳܐ ܡܗܰܠܟܺܝܢ ܐܢ̱ܬܽܘܢ. ܡܶܛܽܠ ܕܥܳܒܕܺܝܢ ܐܢ̱ܬܽܘܢ ܐܰܝܟ ܥܒ̈ܳܕܶܐ ܕܥܰܡ̈ܡܶܐ ܕܒܰܚܕܳܖ̈ܰܝܢ.
10 ܘܳܐܦ ܐܶܢܳܐ ܘܰܒܢܰܝ̈ ܘܰܐܚܰܝ̈ ܢܶܣܰܒ ܟܶܣܦܳܐ: ܘܢܶܙܒܰܢ ܥܒܽܘܪܳܐ: ܘܢܶܫܒܽܘܩ ܠܡܶܣܟܺܢ̈ܶܐ ܕܺܐܝܬ ܒܥܰܡܰܢ.
11 ܘܢܰܦܢܶܐ ܠܗܽܘܢ ܒܝܰܘܡܳܐ ܗܳܢܳܐ: ܟܰܖ̈ܡܰܝܗܽܘܢ ܘܙܰܝܬܰܝ̈ܗܽܘܢ ܘܚܰܩ̈ܠܳܬܗܽܘܢ ܘܒܳܬܰܝ̈ܗܽܘܢ. ܘܟܶܣܦܳܐ ܘܰܥܒܽܘܪܳܐ ܘܚܰܡܪܳܐ ܘܡܶܫܚܳܐ ܢܶܫܒܽܘܩ ܠܫܰܪܟܳܐ ܕܥܰܡܳܐ.
12 ܘܳܐܡܪܺܝܢ ܠܺܝ: ܗܳܟܰܢܳܐ ܢܶܥܒܶܕ: ܐܰܝܟ ܕܰܐܢ̱ܬ ܐܶܡܰܪܬ ܘܰܩܪܺܝ݀ܬ ܠܟܽܘܡܖ̈ܶܐ: ܘܶܐܡܪܶܬ ܠܗܽܘܢ: ܕܗܳܟܰܢܳܐ ܘܳܠܶܐ ܠܡܶܥܒܰܕ. ܘܰܐܘܡܺܝܬ ܐܶܢܽܘܢ ܠܡܶܥܒܰܕ ܐܰܝܟ ܦܶܬܓܳܡܳܐ ܗܳܢܳܐ. ܘܳܐܦ ܠܰܛܠܳܝ̈ܶܐ ܕܰܩܕܩ̈ܶܐ.
13 ܘܳܐܡܪܺܝܢܰܢ: ܕܗܳܟܰܢܳܐ ܢܙܺܝܥ ܐܰܠܳܗܳܐ ܠܟܽܠ ܓܒܰܪ ܕܠܳܐ ܢܩܺܝܡ ܥܰܠ ܡܶܠܬܳܐ ܗܳܕܶܐ: ܡܶܢ ܒܰܝܬܶܗ ܘܡܶܢ ܠܶܐܘܬܶܗ. ܗܳܟܰܢܳܐ ܢܶܗܘܶܐ ܡܙܳܥ ܘܝܰܪܩܳܢ. ܘܳܐܡܪܺܝܢ ܥܰܡܳܐ ܟܽܠܶܗ: ܐܰܡܺܝܢ. ܘܩ̣ܳܡܘ ܥܰܡܳܐ ܟܽܠܶܗ: ܘܫܰܒܰܚܘ ܠܡܳܪܝܳܐ. ܘܰܥܒܰܕܘ ܟܽܠܶܗ ܥܰܡܳܐ ܐܰܝܟ ܦܶܬܓܳܡܳܐ ܗܳܢܳܐ.
14 ܘܳܐܦ ܡܶܢ ܝܰܘܡܳܐ ܕܦܰܩܕܰܢܝ ܠܡܶܗܘܳܐ ܫܰܠܺܝܛܳܐ ܒܰܐܪܥܳܐ ܕܰܝܗܽܘܕ: ܡܶܢ ܫܢܰܬ ܥܶܣܪܺܝܢ: ܘܰܥܕܰܡܳܐ ܠܰܫܢܰܬ ܬܠܳܬܺܝܢ ܘܬܰܪܬܶܝܢ ܠܰܐܪܛܰܚܫܶܫܬ ܡܰܠܟܳܐ: ܫܢܺܝ̈ܢ ܬܰܪܬܰܥܶܣܖ̈ܶܐ ܐܶܢܳܐ ܘܰܐܚܰܝ̈ ܗܘܺܝܬ ܠܗܽܘܢ ܪܺܝܫܐ. ܘܠܳܐ ܚܡܳܪܳܐ ܕܚܰܕ ܡܶܢܗܽܘܢ ܕܶܒܪܶܬ: ܘܳܐܦܠܳܐ ܐܰܗܪܶܬ ܠܐ̱ܢܳܫ ܡܶܢܗܽܘܢ.
15 ܫܰܠܺܝܛܳܢ̈ܶܐ ܕܰܩܕܳܡܝ ܫܰܥܒܕܽܘܗܝ ܠܥܰܡܳܐ. ܘܰܢܣܰܒܘ ܡܶܢܗܽܘܢ ܚܰܡܪܳܐ: ܘܠܰܚܡܳܐ: ܘܟܶܣܦܳܐ ܣܰܓܺܝܐܳܐ ܠܡܰܕܰܐܬܳܐ: ܥܕܰܡܳܐ ܠܣܶܠ̈ܥܺܝܢ ܐܰܪܒܥܺܝܢ. ܐܳܦ ܥܰܒܕܰܝ̈ܗܽܘܢ ܐܰܫܠܶܛܘ ܥܰܠ ܥܰܡܳܐ. ܘܶܐܫܬܰܠܰܛܘ ܥܠܰܝ̈ܗܽܘܢ: ܘܶܐܫܬܰܢܰܕܘ ܒܗܽܘܢ. ܘܶܐܢܳܐ ܠܳܐ ܥܶܒܕܶܬ ܗܳܟܰܢܳܐ: ܡܶܢ ܩܕܳܡ ܕܶܚܠܬܶܗ ܕܰܐܠܳܗܳܐ.
16 ܐܳܦ ܒܰܥܒܳܕܳܐ ܕܫܽܘܪܳܐ ܗܳܢܳܐ: ܛܳܒ ܐܶܬܥܰܫܢܶ݀ܬ ܘܚܰܩ̈ܠܳܬܳܐ ܠܳܐ ܙܰܒܢܶ݀ܬ ܘܟܽܠܗܽܘܢ ܛܠܳܝ̈ܳܐ ܒܢܰܝ̈ ܝܽܗܘܕܳܝܳܐ ܐܶܬܟܰܢܰܫܘ: ܘܩ̣ܳܡܘ ܬܰܡܳܢ ܥܰܠ ܥܒܳܕܳܐ.
17 ܘܪܰܘܖ̈ܒܳܢܶܐ ܫܰܠܺܝܛܳܢ̈ܶܐ ܡܳܐܐ ܘܚܰܡܫܺܝܢ ܓܰܒܖ̈ܺܝܢ: ܘܕܶܐܬܶܝܢ ܠܘܳܬܰܢ ܡܶܢ ܥܰܡ̈ܡܶܐ ܕܰܚܕܳܖ̈ܰܝܢ: ܐܳܬܶܝܢ ܗ̱ܘܰܘ ܐ̱ܢܳܫ ܒܦܳܬܽܘܪܶܗ.
18 ܘܓܰܒܪܳܐ ܕܥܳܒܶܕ ܗ̱ܘܳܐ ܠܰܚܡܳܐ: ܡܰܝܬܶܐ ܗ̱ܘܳܐ ܠܥܰܒ̈ܕܶܐ ܕܥܳܒܕܺܝܢ: ܬܰܘܪܳܐ ܚܰܕ: ܘܥܳܢ̈ܳܐ ܫܶܬ ܫܰܡܺܝ̈ܢܳܬܳܐ. ܘܨܶܦܖ̈ܳܝܶܐ ܐܶܬܥܒܶܕܘ ܠܰܢ. ܘܰܚܕܳܐ ܠܥܶܣܪܳܐ ܝܰܘ̈ܡܺܝܢ: ܚܰܡܪܳܐ ܣܰܓܺܝ ܘܥܰܡ ܗܳܕܶܐ: ܠܰܚܡܳܐ ܕܫܰܠܺܝܛܽܘܬܳܐ ܠܳܐ ܒܥܺܝ݀ܬ: ܡܶܛܽܠ ܕܰܥܫܶܢ ܥܒܳܕܳܐ ܥܰܠ ܥܰܡܳܐ ܗܳܢܳܐ.
19 ܐܶܬܕܰܟܪ ܠܺܝ ܐܰܠܳܗܝ ܠܛܳܒ: ܟܽܠ ܡܶܕܶܡ ܕܥܶܒܕܶܬ ܚܠܳܦ ܥܰܡܳܐ ܗܳܢܳܐ.