Nehemiah 6
The Book of Nehemiah
܀ ܢܚܡܝܐ ܘ ܀
1 ܗܳܝܕܶܝܢ ܐܶܫܬܰܡܥܰܬ ܡܶܠܬܳܐ ܠܣܰܡܒܠܳܛ: ܘܰܠܛܽܘܒܝܳܐ: ܘܠܰܓܫܽܘܡ ܥܰܪܒܳܝܳܐ: ܘܰܠܫܰܪܟܳܐ ܕܰܒܥܶܠܕܒܳܒܰܝ̈ܢ: ܕܰܒܢܰܝܢܳܝܗܝ ܠܫܽܘܪܳܐ. ܘܰܥܕܰܡܳܐ ܠܶܗ ܠܙܰܒܢܳܐ ܗܰܘ ܦܖ̈ܽܘܣܬܕܶܐ ܕܬܰܖ̈ܥܶܐ ܥܕܰܟܺܝܠ ܠܳܐ ܐܰܩܺܝܡܢ.
2 ܘܫܰܕܰܪܘ ܠܘܳܬܝ ܣܰܡܒܠܳܛ ܘܰܓܫܽܘܡ: ܘܳܐܡܪܺܝܢ ܠܺܝ: ܬܳܐ ܢܺܐܙܰܠ ܐܰܟܚܕܳܐ: ܘܢܶܫܪܶܐ ܐܰܝܟ ܓܰܝܳܣ̈ܶܐ ܒܰܦܩܰܥܬܳܐ ܕܺܐܝܢܽܘ ܘܗܶܢܽܘܢ ܡܶܬܪܰܥܶܝܢ ܗ̱ܘܰܘ ܠܡܶܥܒܰܕ ܠܰܢ ܒܺܝܫܬܳܐ.
3 ܘܫܰܕܪܶܬ ܠܘܳܬܗܽܘܢ ܡܰܠܰܐܟܳܐ: ܘܶܐܡܪܶܬ ܠܗܽܘܢ: ܥܒܳܕܳܐ ܪܰܒܳܐ ܥܳܒܶܕ ܐ̱ܢܳܐ. ܘܠܳܐ ܡܶܫܟܰܚ ܐ̱ܢܳܐ ܠܡܶܚܰܬ: ܕܰܠܡܳܐ ܢܶܒܛܰܠ ܟܰܕ ܐܰܪܦܶܐ ܘܶܐܚܽܘܬ ܠܘܳܬܟܽܘܢ.
4 ܘܫܰܕܰܪܘ ܠܘܳܬܝ ܐܰܝܟ ܦܶܬܓܳܡܳܐ ܗܳܢܳܐ: ܐܰܪܒܰܥ ܙܰܒ̈ܢܺܝܢ. ܘܰܐܬܺܝܒܶ݀ܬ ܐܶܢܽܘܢ ܐܰܝܟ ܦܶܬܓܳܡܳܐ ܗܳܢܳܐ.
5 ܘܫܰܕܰܪ ܠܘܳܬܝ ܣܰܡܒܠܳܛ ܐܰܝܟ ܦܶܬܓܳܡܳܐ ܗܳܢܳܐ: ܒܰܙܒܰܢ̱ܬܳܐ ܚܡܺܝܫܳܝܬܳܐ ܠܰܥܠܰܝܡܶܗ: ܘܶܐܓܰܪܬܳܐ ܒܺܐܝܕܶܗ.
6 ܘܰܟܬܺܝܒ ܒܳܗ̇: ܒܥܰܡ̈ܡܶܐ ܐܶܫܬܡܰܥ: ܘܰܓܫܽܘܡ ܐܶܡܰܪ: ܐܰܢ̱ܬ ܘܝܽܗܘ̈ܕܳܝܶܐ ܡܶܬܪܰܥܶܝܢ ܠܡܶܡܪܰܕ. ܡܶܛܽܠ ܗܳܢܳܐ ܐܰܢ̱ܬ ܒܳܢܶܐ ܫܽܘܪܳܐ. ܘܰܐܢ̱ܬ ܗܳܘܶܐ ܠܗܽܘܢ ܡܰܠܟܳܐ ܐܰܝܟ ܦܶܬܓܳܡ̈ܶܐ ܗܳܠܶܝܢ.
7 ܐܳܦ ܢܒܺܝ̈ܶܐ ܐܰܩܺܝܡܬ ܠܡܰܬܢܰܒܳܝܽܘ ܥܠܰܝܟ ܒܽܐܘܪܺܫܠܶܡ. ܘܳܐܡܪܺܝܢ ܕܗܳܐ ܐܰܡܠܶܟ ܒܰܝܗܽܘܕ. ܘܡܶܟܺܝܠ ܐܶܫܬܰܡܰܥ ܠܡܰܠܟܳܐ ܐܰܝܟ ܡ̈ܶܠܶܐ ܗܳܠܶܝܢ. ܡܶܟܺܝܠ ܬܰܘ ܢܶܬܡܰܠܰܟ ܐܰܟܚܕܳܐ.
8 ܘܫܰܕܪܶܬ ܠܘܳܬܶܗ ܘܶܐܡܪܶܬ ܠܶܗ: ܠܳܐ ܫܰܦܺܝܪ ܕܢܶܗܘ̈ܝܳܢ ܐܰܝܟ ܡ̈ܶܠܶܐ ܕܰܐܢ̱ܬ ܐܳܡܰܪ ܐܰܢ̱ܬ. ܡܶܛܽܠ ܕܡܶܢ ܠܶܒܳܟ ܐܳܡܰܪ ܐܰܢ̱ܬ ܠܶܗܝܢ.
9 ܡܶܛܽܠ ܕܟܽܠܗܽܘܢ ܡܕܰܚܠܺܝܢ ܠܰܢ: ܘܳܐܡܪܺܝܢ: ܡܶܬܖ̈ܰܦܝܳܢ ܐܺܝܕܰܝ̈ܗܽܘܢ ܡܶܢ ܥܒܺܝܕܬܳܐ. ܘܳܐܡܪܺܝܢ ܠܰܢ ܠܳܐ ܬܶܥܒܕܽܘܢ. ܡܶܟܺܝܠ ܐܰܥܫܶܢ ܐܺܝ̈ܕܰܝ.
10 ܘܶܐܢܳܐ ܥܶܠܶܬ ܠܘܳܬ ܫܡܰܥܝܳܐ ܒܰܪ ܕܰܠܝܳܐ ܒܰܪ ܡܰܗܛܒܳܐܶܝܠ: ܘܗܽܘ ܟܳܠܶܐ ܗ̱ܘܳܐ ܠܺܝ: ܘܶܐܡܰܪ ܠܺܝ: ܬܳܐ ܢܶܬܘܰܥܰܕ ܠܒܰܝܬܶܗ ܕܡܳܪܝܳܐ ܠܓܰܘ ܗܰܝܟܠܳܐ: ܘܢܶܐܚܽܘܕ ܬܰܖ̈ܥܶܐ ܕܗܰܝܟܠܳܐ. ܡܶܛܽܠ ܕܳܐܬܶܝܢ ܠܡܶܩܛܠܳܟ: ܘܰܒܠܺܠܝܳܐ ܐܳܬܶܝܢ ܠܡܶܩܛܠܳܟ.
11 ܘܶܐܡܪܶܬ: ܠܓܰܒܪܳܐ ܕܰܐܟܘܳܬܳܟ: ܢܶܥܪܽܘܩ. ܚܳܣ ܠܺܝ ܕܶܐܥܪܽܘܩ: ܘܶܐܥܽܘܠ ܠܶܗܝܟܠܳܐ.
12 ܚܳܟܶܡ ܐ̱ܢܳܐ ܕܠܳܐ ܗ̱ܘܳܐ ܐܰܠܳܗܳܐ ܫܰܕܪܶܗ ܥܠܰܝ: ܘܳܐܦܠܳܐ ܒܝܰܕ ܢܒܺܝܳܐ ܐܶܬܐܡܰܪ ܠܺܝ ܕܩܳܛܶܠ ܠܺܝ ܛܽܘܒܝܳܐ ܘܣܰܡܒܠܳܛ ܘܚܰܒܖ̈ܰܘܗܝ: ܐܰܓܪܽܘܗܝ ܘܫܰܕܪܽܘܗܝ ܥܠܰܝ ܠܡܶܩܛܠܰܢܝ.
13 ܡܶܛܽܠ ܕܰܐܓܪܳܐ ܗ̱ܘ: ܡܶܛܽܠ ܕܶܐܕܚܰܠ ܘܶܐܥܒܶܕ ܗܳܟܰܢܳܐ: ܘܶܐܚܛܶܐ: ܘܰܗܘܳܐ ܠܗܽܘܢ ܠܰܫܡܳܐ ܒܺܝܫܳܐ: ܡܶܛܽܠ ܕܰܢܚܰܣܕܽܘܢܳܢܝ.
14 ܐܶܬܕܰܟܪ ܐܰܠܳܗܝ ܠܛܽܘܒܝܳܐ ܘܰܠܣܰܡܒܠܳܛ ܘܰܠܚܰܒܖ̈ܰܘܗܝ: ܐܰܝܟ ܥܒܳܕܰܝ̈ܗܽܘܢ ܗܳܠܶܝܢ ܣܢܰܝ̈ܳܐ: ܐܳܦ ܠܝܽܘܕܰܥܝܳܐ ܢܒܺܝܳܐ: ܐܳܦ ܠܫܰܪܟܳܐ ܕܰܢܒܺܝ̈ܶܐ: ܕܰܗܘܰܘ ܡܕܰܚܠܺܝܢ ܠܺܝ ܡܶܢܗܽܘܢ.
15 ܘܰܫܠܶܡ ܫܽܘܪܳܐ ܒܚܰܡܫܳܐ ܘܥܶܣܪܺܝܢ ܒܺܐܝܠܽܘܠ: ܠܚܰܡܫܺܝܢ ܘܰܬܪܶܝܢ ܝܰܘ̈ܡܺܝܢ.
16 ܗܳܝܕܶܝܢ ܟܰܕ ܫ̣ܡܰܥܘ ܟܽܠܗܽܘܢ ܒܥܶܠܕܒܳܒܰܝ̈ܢ: ܕܚ̣ܶܠܘ. ܘܟܽܠܗܽܘܢ ܥܰܡ̈ܡܶܐ ܕܰܚܕܳܖ̈ܰܝܢ: ܘܙܳܥܘ ܛܳܒ ܡܶܢ ܩܕܳܡܝܢ ܘܺܝܕܰܥܘ ܕܡܶܢ ܐܰܠܳܗܳܐ ܐܶܬܥܰܒܕܬ ܥܒܺܝܕܬܳܐ ܗܳܕܶܐ.
17 ܐܳܦ ܒܝܰܘ̈ܡܳܬܳܐ ܗܳܢܽܘܢ: ܡܰܣܓܶܝܢ ܗ̱ܘܰܘ ܪܰܘܖ̈ܒܳܢܶܐ ܕܺܝܗܽܘܕܳܐ ܐܶܓܖ̈ܳܬܗܽܘܢ. ܘܳܐܙܳܠ̱ܢ ܗ̱ܘܰܝ̈ ܠܘܳܬ ܛܽܘܒܝܳܐ. ܘܶܐܓܖ̈ܳܬܶܗ ܕܛܽܘܒܝܳܐ ܐܳܬܝ̈ܳܢ ܗ̱ܘܰܝ̈ ܠܘܳܬܗܽܘܢ.
18 ܡܶܛܽܠ ܕܣܰܓܺܝ̈ܐܶܐ ܗ̱ܘܰܘ ܒܰܝܗܽܘܕ: ܕܺܝܡܺܝܘ ܠܶܗ ܕܠܳܐ ܢܰܗܪܽܘܢܶܗ. ܡܶܛܽܠ ܕܚܰܬܢܳܐ ܗ̱ܘܳܐ ܕܰܫܒܰܢܝܳܐ ܒܰܪ ܐܳܪܳܚ. ܘܝܽܘܚܰܢܳܢ ܒܪܶܗ: ܢܣܰܒ ܠܒܰܪܬ ܡܰܫܠܽܘܡ ܒܰܪ ܒܪܰܟܝܳܐ.
19 ܐܳܦ ܡܶܠܰܘ̈ܗܝ ܛܳܒ̈ܳܬܳܐ ܐܳܡܪܺܝܢ ܗ̱ܘܰܘ ܩܕܳܡܝ. ܘܡܶܠܬܳܐ ܕܳܐܡܰܪ ܗ̱ܘܺܝܬ: ܐܳܡܪܺܝܢ ܗ̱ܘܰܘ ܠܶܗ. ܘܶܐܓܖ̈ܳܬܳܐ ܡܫܰܕܰܪ ܗ̱ܘܳܐ ܗܽܘ ܛܽܘܒܝܳܐ ܠܰܡܕܰܚܳܠܽܘܬܰܢܝ.