Psalms 12
The Book of Psalms
܀ ܡܙܡܘܪܐ ܝܒ ܀
ܡܰܟܣܳܢܽܘܬܳܐ ܕܠܽܘܩܒܰܠ ܐܰܝܠܶܝܢ ܕܡܰܒܐ̱ܫܺܝܢ ܘܢܳܟܠܺܝܢ ܠܖ̈ܳܚܡܰܝܗܽܘܢ
1 ܦܪܽܘܩ ܡܳܪܝܳܐ ܡܶܛܽܠ ܕܰܓܡܰܪ ܛܳܒܳܐ. ܘܒܶܛܠܰܬ ܗܰܝܡܳܢܽܘܬܳܐ ܡܶܢ ܐܰܪܥܳܐ.
2 ܒܢܰܝ̈ܢܳܫܳܐ ܣܪܺܝܩܽܘܬܳܐ ܡܡܰܠܠܺܝܢ. ܓܰܒܪܳܐ ܥܰܡ ܚܰܒܪܶܗ ܒܣܶܦ̈ܘܳܬܳܐ ܡܦܰܠܓ̈ܳܬܳܐ. ܒܠܶܒܳܐ ܘܰܒܠܶܒܳܐ ܡܡܰܠܠܺܝܢ.
3 ܢܰܘܒܶܕ ܡܳܪܝܳܐ ܟܽܠܗܶܝܢ ܣܶܦ̈ܘܳܬܳܐ ܡܦܰܠܓ̈ܳܬܳܐ. ܘܠܶܫ̈ܳܢܶܐ ܕܰܡܡܰܠܠܺܝܢ ܪܰܘܖ̈ܒܳܬܳܐ.
4 ܕܶܐܡܰܪܘ ܠܶܫܳܢܰܢ ܢܰܘܪܶܒ. ܣܶܦ̈ܘܳܬܳܐ ܕܺܝܠܰܢ ܐܶܢܶܝܢ ܡܰܢܽܘ ܡܳܪܰܢ.
5 ܡܶܛܽܠ ܒܶܙܬܳܐ ܕܡܶܣ̈ܟܺܢܶܐ ܘܶܐܢܰܩܬܳܐ ܕܒܳܝ̈ܫܶܐ ܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ. ܘܶܐܥܒܶܕ ܦܽܘܪܩܳܢܳܐ ܓܰܠܝܳܐܺܝܬ.
6 ܡܺܐܡܪܶܗ ܕܡܳܪܝܳܐ ܡܺܐܡܪܰܐ ܗ̱̇ܘ ܕܰܟܝܳܐ. ܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ. ܘܰܡܕܰܟܰܝ ܚܰܕ ܒܫܰܒܥܳܐ.
7 ܘܐܰܢ̱ܬ ܡܳܪܝܳܐ ܬܶܛܰܪ ܐܶܢܽܘܢ. ܫܰܘܙܶܒܰܝܢܝ̱ ܘܦܰܨܳܢܝ̱ ܡܶܢ ܕܳܪܳܐ ܗܳܢܳܐ ܠܥܳܠܰܡ.
8 ܕܟܪܺܝܟܺܝܢ ܖ̈ܰܫܺܝܥܶܐ ܘܰܡܗܰܠܟܺܝܢ. ܐܰܝܟ ܪܰܘܡܳܐ ܙܰܠܺܝܠܳܐ ܕܰܒܢܰܝ̈ ܐܰܕܽܘܡ.