Psalms 24
The Book of Psalms
܀ ܡܙܡܘܪܐ ܟܕ ܀
ܡܰܪܬܝܳܢܽܘܬܳܐ ܕܰܠܘܳܬ ܥܰܡܳܐ ܕܰܒܒܳܒܶܠ
1 ܕܡܳܪܝܳܐ ܗ̱ܝ ܐܰܪܥܳܐ ܒܰܡܠܳܐܳܗ̇. ܬܺܒܶܝܠ ܘܟܽܠܗܽܘܢ ܥܳܡܽܘܖ̈ܶܝܗ̇.
2 ܡܶܛܽܠ ܕܗܽܘ ܒܝܰܡܳܐ ܣܳܡ ܫܶܬܶܐܣܶܝ̈ܗ̇. ܘܰܒܢܰܗܖ̈ܰܘܳܬܳܐ ܐܰܬܩܢܳܗ̇. ܡܰܢܽܘ ܢܶܣܰܩ ܠܛܽܘܪܶܗ ܕܡܳܪܝܳܐ.
3 ܘܡܰܢܽܘ ܢܩܽܘܡ ܒܛܽܘܪܶܗ ܩܰܕܺܝܫܳܐ.
4 ܐܰܝܢܳܐ ܕܕܰܟ̈ܝܳܢ ܐܺܝܕܰܘ̈ܗܝ ܘܰܓܒܶܐ ܒܠܶܒܶܗ. ܘܠܳܐ ܝܳܡܶܐ ܒܢܰܦܫܶܗ ܒܕܰܓܳܠܽܘܬܳܐ ܘܠܳܐ ܝܳܡܶܐ ܒܢܶܟܠܳܐ.
5 ܗܳܢܳܐ ܢܩܰܒܶܠ ܒܽܘܪܟܬܳܐ ܡܶܢ ܡܳܪܝܳܐ. ܘܙܰܕܺܝܩܽܘܬܳܐ ܡܶܢ ܐܰܠܳܗܳܐ ܦܳܪܽܘܩܰܢ.
6 ܗܳܢܰܘ ܕܳܪܳܐ ܕܒܳܥܶܐ ܘܰܡܣܰܒܰܪ. ܠܦܰܪܨܽܘܦܳܐ ܕܰܐܦܰܝ̈ܟ ܐܰܠܳܗܶܗ ܕܝܰܥܩܽܘܒ.
7 ܐܰܪܺܝܡܘ ܬܰܖ̈ܥܶܐ ܖ̈ܺܝܫܰܝܟܽܘܢ. ܐܶܬܬܪܺܝܡܘ ܬܰܖ̈ܥܶܐ ܕܡܶܢ ܥܳܠܰܡ. ܢܶܥܽܘܠ ܡܰܠܟܳܐ ܕܺܐܝܩܳܖ̈ܶܐ.
8 ܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܖ̈ܶܐ. ܡܳܪܝܳܐ ܥܰܫܺܝܢܳܐ ܘܓܰܢ̱ܒܳܪܳܐ ܡܳܪܝܳܐ ܓܰܢ̱ܒܳܪܳܐ ܘܰܩܪܰܒܬܳܢܳܐ.
9 ܐܰܪܺܝܡܘ ܬܰܖ̈ܥܶܐ ܖ̈ܺܝܫܰܝܟܽܘܢ. ܐܶܬܬܪܺܝܡܘ ܬܰܖ̈ܥܶܐ ܕܡܶܢ ܥܳܠܰܡ. ܢܶܥܽܘܠ ܡܰܠܟܳܐ ܕܺܐܝܩܳܖ̈ܶܐ.
10 ܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܖ̈ܶܐ. ܡܳܪܝܳܐ ܚܰܝܠܬܳܢܳܐ ܗܽܘܝܽܘ ܡܰܠܟܳܐ ܡܝܰܩܪܳܐ ܠܥܳܠܰܡ.