Psalms 148
The Book of Psalms
܀ ܡܙܡܘܪܐ ܩܡܚ ܀
ܡܙܰܡܶܢ ܠܟܽܠܗܶܝܢ ܒܶܖ̈ܝܳܬܳܐ ܠܬܶܫܒܽܘܚܬܶܗ ܕܰܐܠܳܗܳܐ ܥܰܠ ܐܰܦܰܝ̈ ܥܳܒܽܘܕܽܘܬܶܗ ܕܰܠܘܳܬ ܟܽܠ
1 ܫܰܒܰܚܘ̱ ܠܡܳܪܝܳܐ ܡܶܢ ܫܡܰܝܳܐ. ܫܰܒܚܽܘܗ̱ܝ ܒܰܡܖ̈ܰܘܡܶܐ.
2 ܫܰܒܚܽܘܗ̱ܝ ܟܽܠܗܽܘܢ ܡܰܠܐܟܰܘ̈ܗܝ̱. ܫܰܒܚܽܘܗ̱ܝ ܟܽܠܗܽܘܢ ܚܰܝ̈ܠܰܘܳܬܶܗ.
3 ܫܰܒܚܽܘܗ̱ܝ ܫܶܡܫܳܐ ܘܣܰܗܪܳܐ. ܫܰܒܚܽܘܗ̱ܝ ܟܽܠ ܟܰܘ̈ܟܒܶܐ ܘܢܽܘܗܪܳܐ.
4 ܫܰܒܚܽܘܗ̱ܝ ܫܡܰܝ̈ ܫܡܰܝܳܐ. ܡܰܝ̈ܳܐ ܕܰܠܥܶܠ ܡܶܢ ܫܡܰܝܳܐ.
5 ܢܫܰܒܚܽܘܢ ܠܰܫܡܶܗ ܕܡܳܪܝܳܐ ܡܶܛܽܠ ܕܗܽܘ ܐܶܡܰܪ ܘܰܗܘܰܘ ܘܗܽܘ ܦܩܰܕ ܘܶܐܬܒܪܺܝܘ.
6 ܘܰܐܩܺܝܡ ܐܶܢܽܘܢ ܠܥܳܠܰܡ ܥܳܠܡܺܝܢ. ܢܳܡܽܘܣܳܐ ܝܰܗܒ ܘܠܳܐ ܥܳܒܰܪ.
7 ܫܰܒܰܚܘ ܠܡܳܪܝܳܐ ܡܶܢ ܐܰܪܥܳܐ ܬܰܢܺܝ̈ܢܶܐ ܘܟܽܠܗܽܘܢ ܬܗܽܘ̈ܡܶܐ.
8 ܢܽܘܪܳܐ ܘܒܰܪܕܳܐ ܘܬܰܠܓܳܐ ܘܰܓܠܺܝܕܳܐ ܖ̈ܽܘܚܶܐ ܘܥܰܠܥܳ̈ܠܳܐ ܥܒܳܕܳܐ ܕܡܶܠܬܶܗ.
9 ܛܽܘܖ̈ܶܐ ܘܟܽܠܗܶܝܢ ܖ̈ܳܡܳܬܳܐ ܐܺܝ̈ܠܳܢܶܐ ܕܦܺܐܖ̈ܶܐ ܘܟܽܠܗܽܘܢ ܐܰܖ̈ܙܶܐ.
10 ܚܰܝܽܘܬܳܐ ܘܟܽܠܳܗ̇ ܒܥܺܝܪܳܐ ܖ̈ܰܚܫܳܐ ܘܛܰܝܪܳܐ ܘܦܳܪܰܚܬܳܐ.
11 ܡܰܠܟ̈ܶܐ ܕܰܐܪܥܳܐ ܘܟܽܠܗܶܝܢ ܐܶܡܘ̈ܳܬܳܐ ܖ̈ܰܘܪܒܳܢܶܐ ܘܟܽܠܗܽܘܢ ܕܰܝ̈ܳܢܶܐ ܕܰܐܪܥܳܐ.
12 ܓܰܕܽܘ̈ܕܶܐ ܘܰܒܬܽܘ̈ܠܳܬܳܐ ܣܳܒ̈ܶܐ ܘܰܥܠܰܝ̈ܡܶܐ ܢܫܰܒܚܽܘܢ ܠܰܫܡܶܗ ܕܡܳܪܝܳܐ.
13 ܡܶܛܽܠ ܕܪܰܒ ܗܽܘ ܫܡܶܗ ܒܰܠܚܽܘܕܰܘܗ̱ܝ. ܫܽܘܒܚܶܗ ܒܰܐܪܥܳܐ ܘܒܰܫܡܰܝܳܐ.
14 ܡܪܺܝܡ ܩܰܪܢܳܐ ܕܥܰܡܶܗ ܘܬܶܫܒܽܘܚܬܳܐ ܠܟܽܠܗܽܘܢ ܙܰܕܺܝ̈ܩܰܘܗ̱ܝ ܘܠܰܒܢܰܝ̈ ܝܺܣܪܳܐܶܝܠ ܥܰܡܳܐ ܕܩܰܪܺܝܒ ܠܶܗ.