Psalms 57
The Book of Psalms
܀ ܡܙܡܘܪܐ ܢܙ ܀
ܬܰܘܕܺܝܬܳܐ ܕܒܶܝܬ ܡܰܩܒܰܝ. ܘܒܳܥܽܘܬܳܐ ܕܰܡܫܰܡܠܝܳܐܺܝܬ ܢܶܬܦܰܨܽܘܢ ܡܶܢ ܒܶܥܠܕܒܳܒܰܝ̈ܗܽܘܢ
1 ܪܰܚܶܡ ܥܠܰܝ ܐܰܠܳܗܳܐ ܡܶܛܽܠ ܕܒܳܟ ܗܽܘ ܡܣܰܒܪܳܐ ܢܰܦܫܝ̱. ܘܰܒܛܶܠܳܠܳܐ ܕܟܶܢܦܰܝ̈ܟ ܐܶܣܬܰܬܰܪ. ܥܕܰܡܳܐ ܕܢܶܥܒܰܪ ܕܠܽܘܚܝܳܐ.
2 ܐܶܩܪܶܐ ܠܰܐܠܳܗܳܐ ܡܪܰܝܡܳܐ ܘܠܰܐܠܳܗܳܐ ܦܳܪܽܘܩܝ̱.
3 ܕܫܰܕܰܪ ܡܶܢ ܫܡܰܝܳܐ ܘܦܰܪܩܰܢܝ̱. ܘܚܰܣܶܕ ܠܰܒܥܶܠܕ̈ܒܳܒܰܝ. ܫܰܕܰܪ ܐܰܠܳܗܳܐ ܛܰܝܒܽܘܬܶܗ ܘܩܽܘܫܬܶܗ.
4 ܘܰܦܪܰܩ ܢܰܦܫܝ̱ ܡܶܢ ܟܰܠܒ̈ܶܐ. ܘܕܶܡܟܶܬ ܟܰܕ ܕܠܺܝܚ ܐ̱ܢܳܐ. ܒܢܰܝ̈ܢܳܫܳܐ ܫܶܢܰܝ̈ܗܽܘܢ ܢܰܝ̈ܙܟܶܐ ܘܓܶܐܖ̈ܶܐ. ܘܠܶܫܳܢܗܽܘܢ ܐܰܝܟ ܣܰܝܦܳܐ ܚܰܪܺܝܦܳܐ.
5 ܐܶܬܬܪܺܝܡ ܥܰܠ ܫܡܰܝܳܐ ܐܰܠܳܗܳܐ. ܘܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ.
6 ܡܨܺܝܕܬܳܐ ܬܰܩܶܢܘ ܠܖ̈ܶܓܠܰܝ. ܘܓܽܘܡܳܨܳܐ ܚܦܰܪܘ ܠܢܰܦܫܝ̱ ܘܰܢܦܰܠܘ ܒܓܰܘܶܗ.
7 ܡܰܬܩܰܢ ܗܽܘ ܠܶܒܝ ܐܰܠܳܗܳܐ ܡܰܬܩܰܢ ܗܽܘ ܠܶܒܝ̱. ܐܶܫܰܒܰܚ ܘܶܐܙܰܡܰܪ.
8 ܐܶܬܬܥܺܝܪ ܟܶܢܳܪܝ̱ ܐܶܬܬܥܺܝܪ ܩܺܝܬܳܪܳܐ ܘܟܶܢܳܪܳܐ. ܘܶܐܢܳܐ ܐܶܬܬܥܺܝܪ ܒܨܰܦܪܳܐ.
9 ܐܰܘܕܶܐ ܠܳܟ ܒܥܰܡ̈ܡܶܐ ܐܰܠܳܗܳܐ. ܘܠܰܫܡܳܟ ܐܶܙܰܡܰܪ ܒܶܐܡ̈ܘܳܬܳܐ.
10 ܡܶܛܽܠ ܕܶܐܬܬܪܺܝܡܰܬ ܥܕܰܡܳܐ ܠܰܫܡܰܝܳܐ ܛܰܝܒܽܘܬܳܟ. ܘܰܥܕܰܡܳܐ ܠܰܫ̈ܡܰܝ ܫܡܰܝܳܐ ܗܰܝܡܳܢܽܘܬܳܟ.
11 ܐܶܬܬܪܺܝܡ ܥܰܠ ܫܡܰܝܳܐ ܐܰܠܳܗܳܐ. ܘܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ.