Psalms 55
The Book of Psalms
܀ ܡܙܡܘܪܐ ܢܗ ܀
ܐܰܡܺܝܪ ܠܕܰܘܺܝܕ ܡܶܢ ܦܰܪܨܽܘܦ ܚܽܘܢܝܳܐ ܟܰܕ ܩܳܒܶܠ ܗܘܳܐ ܠܰܐܠܳܗܳܐ ܥܰܠ ܢܶܟܠܳܐ ܕܩܰܖ̈ܺܝܒܰܘܗ̱ܝ ܕܰܠܘܳܬܶܗ
1 ܨܽܘܬ ܐܰܠܳܗܳܐ ܨܠܽܘܬܝ̱ ܘܠܳܐ ܬܰܗܡܶܐ ܡܶܢ ܒܳܥܽܘܬܝ̱.
2 ܫܡܰܥܰܝܢܝ̱ ܘܰܥܢܺܝܢܝ̱ ܘܶܐܬܦܰܢ ܠܰܓܥܳܬܝ̱ ܘܰܫܡܰܥܰܝܢܝ̱.
3 ܡܶܛܽܠ ܒܥܶܠܕ̈ܒܳܒܰܝ ܘܡܶܛܽܠ ܐܽܘܠܨܳܢܶܗ ܕܥܰܘܳܠܳܐ.
4 ܡܶܛܽܠ ܕܰܨܠܰܘ ܥܠܰܝ ܥܰܘ̈ܳܠܶܐ ܘܣܰܩܪܽܘܢܝ̱.
5 ܘܢܶܦܠܰܬ ܒܺܝ ܕܶܚܠܬܳܐ. ܘܟܰܣܝܽܘܢܝ̱ ܛܶܠܳܠܰܝ̈ ܡܰܘܬܳܐ.
6 ܘܶܐܡܪܶܬ ܡܰܢ ܕܶܝܢ ܝܰܗܒ ܠܺܝ ܓܶܦ̈ܶܐ ܐܰܝܟ ܕܝܰܘܢܳܐ.
7 ܘܦܶܪܚܶܬ ܘܫܶܟܢܶܬ ܘܰܐܪܚܩܶܬ. ܘܦܶܪܚܶܬ ܘܰܫܪܺܝܬ ܒܡܰܕܒܪܳܐ.
8 ܘܟܰܬܪܶܬ ܠܡܰܢ ܕܰܡܦܰܨܶܐ ܠܺܝ ܡܶܢ ܪܽܘܚܳܐ ܕܥܰܠܥܳܠܳܐ.
9 ܛܰܒܰܥ ܡܳܪܝ ܗܽܘܦܳܟܳܐ ܕܠܶܫܳܢܰܝ̈ܗܽܘܢ. ܡܶܛܽܠ ܕܰܚܙܺܝܬ ܚܶܪܝܳܢܳܐ ܘܕܺܝܢܳܐ ܒܰܩܪܺܝܬܳܐ.
10 ܒܺܐܝܡܳܡܳܐ ܘܰܒܠܺܠܝܳܐ ܟܪܺܝܟܺܝܢ ܠܫܽܘܖ̈ܶܝܗ̇. ܥܰܘܠܳܐ ܘܫܽܘܩܪܳܐ ܒܓܰܘܳܗ̇ ܘܥܶܬܳܐ.
11 ܘܠܳܐ ܥܳܢܶܕ ܡܶܢ ܫܽܘ̈ܩܶܝܗ̇ ܬܽܘܟܳܐ ܘܢܶܟܠܳܐ.
12 ܠܳܐ ܗܘܳܐ ܓܶܝܪ ܒܥܶܠܕܒܳܒܝ̱ ܚܰܣܕܰܢܝ̱ ܕܶܐܣܰܝܒܰܪ. ܐܳܦܠܳܐ ܣܳܢܐܝ ܐܶܬܬܪܺܝܡ ܥܠܰܝ ܕܶܐܛܫܶܐ ܡܶܢܶܗ.
13 ܐܰܢ̱ܬ ܗܽܘ ܒܰܪܢܳܫܳܐ ܕܰܐܟܘܳܬܝ̱. ܩܰܪܺܝܒܝ̱ ܘܪܳܚܡܝ̱.
14 ܕܰܐܟܚܕܳܐ ܠܥܶܣܢ ܫܳܪܽܘܬܳܐ ܒܒܰܝܬܶܗ ܕܰܐܠܳܗܳܐ. ܟܰܕ ܡܗܰܠܟܺܝܢ ܗ̱ܘܰܝܢ ܒܰܐܘܝܽܘܬܳܐ.
15 ܐܰܝܬܳܐ ܥܠܰܝܗܽܘܢ ܡܰܘܬܳܐ. ܘܢܶܚܬܽܘܢ ܟܰܕ ܚܰܝܺܝ̈ܢ ܠܰܫܝܽܘܠ. ܡܶܛܽܠ ܕܒܺܝܫܬܳܐ ܐܺܝܬ ܒܓܰܘܗܽܘܢ.
16 ܐܶܢܳܐ ܕܶܝܢ ܠܰܐܠܳܗܳܐ ܐܶܩܪܶܐ. ܘܰܐܠܳܗܳܐ ܢܶܦܪܩܰܢܝ̱.
17 ܒܪܰܡܫܳܐ ܘܰܒܨܰܦܪܳܐ ܘܰܒܛܰܗܪܳܐ ܐܶܪܢܶܐ ܘܺܐܡܰܪ ܘܰܐܫܡܰܥ ܩܳܠܝ̱.
18 ܦܰܨܳܗ̇ ܠܢܰܦܫܝ̱ ܡܶܢ ܐܰܝܠܶܝܢ ܕܚܳܟܡܺܝܢ ܠܺܝ. ܡܶܛܽܠ ܕܰܒܚܶܪܝܳܢܳܐ ܗܘܰܘ ܥܰܡܝ̱.
19 ܢܶܫܡܰܥ ܐܰܠܳܗܳܐ ܘܰܢܡܰܟܶܟ ܐܶܢܽܘܢ. ܗܰܘ ܕܺܐܝܬܰܘܗ̱ܝ ܡܶܢ ܩܕܳܡ ܥܳܠܡ̈ܶܐ. ܠܰܝܬ ܠܗܽܘܢ ܬܰܚܠܽܘܦܳܐ ܘܠܳܐ ܕܚܶܠܘ ܡܶܢ ܐܰܠܳܗܳܐ.
20 ܐܰܘܫܶܛܘ ܐܺܝܕܳܐ ܥܰܠ ܩܰܪܺܝܒܶܗ ܘܛܰܘܶܫܘ ܩܝܳܡܶܗ.
21 ܐܶܬܕܰܠܰܚܘ ܡܶܢ ܪܽܘܓܙܳܐ ܕܰܐܦܰܘ̈ܗܝ̱ ܘܡܶܢ ܚܶܡܬܳܐ ܕܠܶܒܶܗ. ܖ̈ܰܟܺܝܟܳܢ ܡܶܠܰܘ̈ܗܝ̱ ܡܶܢ ܡܶܫܚܳܐ ܘܗܶܢܶܝܢ ܠܽܘ̈ܠܝܳܬܳܐ.
22 ܫܕܺܝ ܨܶܦܬܳܟ ܥܰܠ ܡܳܪܝܳܐ ܘܗܽܘ ܢܬܰܪܣܶܝܟ. ܘܠܳܐ ܢܶܬܶܠ ܠܥܳܠܰܡ ܙܰܘܥܬܳܐ ܠܙܰܕܺܝ̈ܩܰܘܗ̱ܝ.
23 ܐܰܢ̱ܬ ܕܶܝܢ ܐܰܠܳܗܳܐ ܐܰܚܶܬ ܐܶܢܽܘܢ ܠܓܽܘܒܳܐ ܕܰܐܒܕܳܢܳܐ ܠܓܰܒܖ̈ܶܐ ܐܳܫ̈ܕܰܝ ܕܡܳܐ ܘܢܳܟ̈ܠܰܝ ܢܶܟܠܳܐ. ܘܠܳܐ ܢܫܰܠܡܽܘܢ ܝܰܘ̈ܡܳܬܗܽܘܢ. ܘܶܐܢܳܐ ܐܶܣܰܒܰܪ ܒܳܟ.