Psalms 19
The Book of Psalms
܀ ܡܙܡܘܪܐ ܝܛ ܀
ܥܰܠ ܥܳܒܽܘܕܽܘܬܳܐ ܘܰܡܠܰܚܡܽܘܬܳܐ ܕܒܶܖ̈ܝܳܬܶܗ ܕܰܐܠܳܗܳܐ: ܘܥܰܠ ܡܕܰܒܪܳܢܽܘܬܶܗ
1 ܫܡܰܝܳܐ ܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ. ܘܰܥܒܳܕ ܐܺܝ̈ܕܰܘܗ̱ܝ ܡܚܰܘܶܐ ܪܩܺܝܥܳܐ.
2 ܝܰܘܡܳܐ ܠܝܰܘܡܳܐ ܡܰܒܰܥ ܡܺܐܡܪܳܐ. ܘܠܺܠܝܳܐ ܠܠܺܠܝܳܐ ܡܚܰܘܶܐ ܡܰܕܥܳܐ.
3 ܠܰܝܬ ܡܺܐܡܪܳܐ. ܐܳܦܠܳܐ ܡ̈ܶܠܶܐ. ܕܠܳܐ ܢܶܫܬܡܰܥ ܒܩܳܠܗܽܘܢ.
4 ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ. ܘܰܒܣܰܘ̈ܦܶܝܗ̇ ܕܬܺܒܶܝܠ ܡܶܠܰܝ̈ܗܽܘܢ. ܘܥܰܠ ܫܶܡܫܳܐ ܢܩܰܫ ܡܰܫܟܢܶܗ ܒܗܽܘܢ.
5 ܘܗܽܘ ܐܰܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ. ܢܕܽܘܨ ܐܰܝܟ ܓܰܢ̱ܒܳܪܳܐ ܠܡܶܪܗܰܛ ܐܽܘܪܚܶܗ.
6 ܡܶܢ ܣܰܘ̈ܦܰܝ ܫܡܰܝܳܐ ܡܰܦܩܶܗ. ܘܡܰܣܡܟܶܗ ܥܰܠ ܣܰܘ̈ܦܰܝ ܫܡܰܝܳܐ. ܘܠܰܝܬ ܕܛܳܫܶܐ ܡܶܢ ܠܰܗܓܶܗ.
7 ܢܳܡܽܘܣܶܗ ܕܡܳܪܝܳܐ ܕܠܳܐ ܡܽܘܡ ܘܡܰܦܢܶܐ ܢܰܦܫܳܐ. ܣܳܗܕܽܘܬܶܗ ܕܡܳܪܝܳܐ ܡܗܰܝܡܢܳܐ ܘܰܡܚܰܟܡܳܐ ܝܰܠܽܘ̈ܕܶܐ.
8 ܦܽܘܩܕܳܢܰܘ̈ܗܝ̱ ܕܡܳܪܝܳܐ ܬܪܺܝܨܺܝܢ ܘܰܡܚܰܕܶܝܢ ܠܶܒܐ. ܦܽܘܩܕܳܢܶܗ ܕܡܳܪܝܳܐ ܓܒܶܐ ܘܡܰܢܗܰܪ ܥܰܝ̈ܢܶܐ.
9 ܕܶܚܠܬܶܗ ܕܡܳܪܝܳܐ ܕܰܟܝܳܐ ܘܩܰܝܳܡܳܐ ܠܥܳܠܰܡ. ܕܺܝܢܰܘ̈ܗܝ ܕܡܳܪܝܳܐ ܒܩܽܘܫܬܳܐ ܘܟܺܐܢܺܝ̈ܢ ܒܟܽܠ ܡܶܕܶܡ.
10 ܘܰܪܓܺܝܓܺܝܢ ܡܶܢ ܕܰܗܒܳܐ ܘܡܶܢ ܟܺܐܦ̈ܶܐ ܛܳܒ̈ܳܬܳܐ. ܘܰܚܠܶܝܢ ܡܶܢ ܕܶܒܫܳܐ ܘܡܶܢ ܟܰܟܳܪܺܝܬܳܐ.
11 ܘܳܐܦ ܥܰܒܕܳܟ ܢܶܙܕܗܰܪ ܒܗܽܘܢ. ܐܶܢ ܢܶܛܰܪ ܐܶܢܽܘܢ ܢܶܬܦܪܰܥ ܣܰܓܺܝ.
12 ܒܫܳܖ̈ܥܳܬܳܐ ܡܰܢܽܘ ܡܶܣܬܰܟܰܠ. ܘܡܶܢ ܛܰܫ̈ܝܳܬܳܐ ܙܰܟܳܢܝ̱.
13 ܐܳܦ ܡܶܢ ܥܰܘܠܳܐ ܚܣܽܘܟܳܝܗܝ̱ ܠܥܰܒܕܳܟ. ܕܠܳܐ ܢܶܫܬܰܠܛܽܘܢ ܒܺܝ ܒܺܝ̈ܫܶܐ. ܘܶܐܬܕܰܟܶܐ ܡܶܢ ܚܛܳܗ̈ܰܝ.
14 ܢܶܗܘ̈ܝܳܢ ܠܨܶܒܝܳܢܳܟ ܡܶܠܰܘ̈ܗܝ̱ ܕܦܽܘܡܝ̱. ܘܪܶܢܝܶܗ ܕܠܶܒܝ̱ ܩܕܳܡܰܝܟ ܡܳܪܝܳܐ ܥܳܕܽܘܪܝ̱ ܘܦܳܪܽܘܩܝ̱.