2 Chronicles 11
The second Book of Chronicles
܀ ܒ ܕܘܒܪ ܝܘܡ̈ܬܐ ܝܐ ܀
1 ܘܶܐܬܳܐ ܪܚܰܒܥܰܡ ܠܽܐܘܪܺܫܠܶܡ. ܘܟܰܢܶܫ ܠܰܕܒܶܝܬ ܝܺܗܽܘܕܳܐ. ܘܰܠܫܰܒܛܳܐ ܕܒܶܢܝܳܡܶܝܢ. ܡܳܐܐ ܘܰܬܡܳܢܺܝܢ ܐܰܠܦܺܝ̈ܢ. ܓܰܒܖ̈ܶܐ ܫܳܡܛܰܝ̈ ܣܰܝܦܳܐ. ܘܥܳܒܕܰܝ̈ ܩܪܳܒܳܐ. ܠܡܶܬܟܰܬܳܫܽܘ ܥܰܡ ܝܺܣܪܳܐܶܝܠ. ܠܡܰܗܦܳܟܽܘ ܡܰܠܟܽܘܬܳܐ ܠܰܪܚܰܒܥܰܡ ܒܪܶܗ ܕܰܫܠܶܝܡܽܘܢ.
2 ܘܰܗܘܳܐ ܦܶܬܓܳܡܳܐ ܕܡܳܪܝܳܐ ܥܰܠ ܫܡܰܥܝܳܐ. ܘܶܐܡܰܪ ܠܶܗ.
3 ܐܶܡܰܪ ܠܰܪܚܰܒܥܰܡ ܒܪܶܗ ܕܰܫܠܶܝܡܽܘܢ ܡܰܠܟܳܐ ܕܺܝܗܽܘܕܳܐ. ܘܥܰܠ ܒܶܝܬ ܒܶܢܝܳܡܶܝܢ. ܘܥܰܠ ܟܽܠܶܗ ܝܺܣܪܳܐܶܝܠ. ܘܥܰܠ ܫܰܪܟܳܐ ܕܥܰܡܳܐ. ܐܶܡܰܪ ܠܗܽܘܢ.
4 ܗܳܟܰܢܳܐ ܐܳܡܰܪ ܡܳܪܝܳܐ. ܠܳܐ ܬܶܣܩܽܘܢ. ܘܠܳܐ ܬܶܬܟܰܬܫܽܘܢ. ܗܦܽܘܟܘ ܓܒܰܪ ܠܒܰܝܬܶܗ. ܡܶܛܽܠ ܕܡܶܢ ܩܕܳܡܰܝ ܗܘܳܐ ܦܶܬܓܳܡܳܐ ܗܳܢܳܐ. ܘܰܫܡܰܥܘ ܡܶܠܬܶܗ ܕܡܳܪܝܳܐ. ܘܰܗܦܰܟܘ ܠܡܺܐܙܰܠ ܐ̱ܢܳܫ ܠܒܰܝܬܶܗ.
5 ܘܰܒܢܳܐ ܝܽܘܪܰܒܥܰܡ ܠܰܫܟܺܝܡ. ܒܛܽܘܪܳܐ ܕܫܰܒܛܳܐ ܕܒܶܝܬ ܐܰܦܪܶܝܡ. ܘܺܝܬܶܒ ܒܳܗ̇. ܘܰܢܦܰܩ ܡܶܢ ܬܰܡܳܢ. ܘܰܒܢܳܐ ܠܰܦܢܽܘܐܶܝܠ.
6 ܘܶܐܡܰܪ ܝܽܘܪܰܒܥܰܡ ܒܠܶܒܶܗ. ܗܳܦܟܳܐ ܠܳܗ̇ ܡܰܠܟܽܘܬܳܐ ܠܒܶܝܬ ܕܰܘܺܝܕ.
7 ܐܶܢܗܽܘ ܕܣܳܠܩܺܝܢ ܥܰܡܳܐ ܗܳܢܳܐ. ܠܡܶܥܒܰܕ ܕܶܒܚ̈ܶܐ ܒܒܰܝܬܶܗ ܕܡܳܪܝܳܐ. ܒܽܐܘܪܺܫܠܶܡ ܘܗܳܦܶܟ ܠܶܒܶܗ ܕܥܰܡܳܐ ܗܳܢܳܐ ܠܘܳܬ ܡܳܪܗܽܘܢ. ܘܩܳܛܠܺܝܢ ܠܺܝ. ܘܡܰܗܦܟܺܝܢ ܠܳܗ̇ ܡܰܠܟܽܘܬܳܐ ܠܰܪܚܰܒܥܰܡ ܒܰܪ ܫܠܶܝܡܽܘܢ.
8 ܘܶܐܬܪܰܥܺܝ ܡܰܠܟܳܐ. ܘܰܥܒܰܕ ܬܪܶܝܢ ܥܶܓ̈ܠܺܝܢ ܕܕܰܗܒܳܐ. ܘܶܐܡܰܪ ܠܗܽܘܢ. ܣܰܓܺܝ ܠܟܽܘܢ ܠܡܶܣܰܩ. ܡܳܢܳܐ ܣܳܠܩܺܝܢ ܐܢ̱ܬܽܘܢ. ܘܢܳܚܬܺܝܢ ܠܽܐܘܪܺܫܠܶܡ. ܗܳܠܶܝܢ ܐܶܢܽܘܢ ܐܰܠܳܗܰܝ̈ܟ ܝܺܣܪܳܐܶܝܠ. ܕܰܐܣܩܽܘܟ ܡܶܢ ܐܰܪܥܳܐ ܕܡܶܨܪܶܝܢ.
9 ܘܣܳܡ ܚܰܕ ܒܶܝܬ ܐܺܝܠ. ܘܐ̱ܚܪܺܢܳܐ ܣܳܡ ܒܕܳܢ.
10 ܘܰܗܘܳܬ ܡܶܠܬܳܐ ܗܳܕܶܐ ܠܰܚܛܺܝܬܳܐ. ܘܶܐܙܰܠܘ ܥܰܡܳܐ ܩܕܳܡ ܥܶܓܠܳܐ ܥܕܰܡܳܐ ܠܕܳܢ. ܘܰܗܘܳܐ ܦܶܬܓܳܡܳܐ ܗܳܢܳܐ ܠܰܚܛܺܝܬܳܐ. ܠܟܽܠ ܒܶܝܬ ܝܽܘܪܰܒܥܰܡ. ܠܡܶܥܩܰܪ ܘܰܠܡܰܘܒܳܕܽܘ ܡܶܢ ܐܰܪܥܳܐ.
11 ܒܶܗ ܒܙܰܒܢܳܐ ܗܳܢܳܐ. ܐܶܬܟܪܰܗ ܐܰܒܺܝܰܡ ܒܪܶܗ ܕܝܽܘܪܰܒܥܰܡ. ܘܶܐܡܰܪ ܝܽܘܪܰܒܥܰܡ ܠܰܐܢ̱ܬܬܶܗ. ܩܽܘܡܝ ܢܺܐ ܘܶܐܫܬܰܓܢܳܝ ܐܰܝܟ ܐܰܢ̱ܬܬܳܐ ܗܶܕܝܽܘܛܬܳܐ. ܘܠܳܐ ܢܶܕܥܽܘܢ ܕܰܐܢ̱ܬܝ ܗܺܝ ܐܰܢ̱ܬܬܶܗ ܕܝܽܘܪܰܒܥܰܡ. ܘܬܺܐܙܺܠܝܢ ܠܫܺܝܠܽܘ. ܘܗܳܐ ܐܺܝܬ ܬܰܡܳܢ ܐܰܚܺܝܳܐ ܢܒܺܝܳܐ. ܕܗܽܘ ܐܶܡܰܪ ܠܺܝ ܟܰܕ ܩܳܐܶܡ ܗܘܺܝܬ ܥܰܠ ܥܰܡܳܐ ܗܳܢܳܐ.
12 ܘܬܺܐܙܺܠܝܢ ܠܘܳܬܶܗ. ܓܳܠܶܐ ܠܶܟܝ ܡܶܕܶܡ ܕܗܳܘܶܐ ܠܶܗ ܠܛܰܠܝܳܐ ܗܳܢܳܐ.
13 ܘܡܶܢ ܩܕܳܡ ܡܳܪܝܳܐ ܐܶܬܶܐܡܰܪ ܠܰܐܚܺܝܳܐ. ܕܗܳܐ ܐܰܢ̱ܬܬܶܗ ܕܝܽܘܪܰܒܥܰܡ ܐܳܬܝܳܐ ܠܡܶܫܐܰܠ ܦܶܬܓܳܡܳܐ ܡܶܢܳܟ ܥܰܠ ܒܪܳܗ̇ ܕܰܟܪܺܝܗܽ ܗ̱ܘ. ܗܳܟܰܢܳܐ ܘܗܳܟܰܢܳܐ ܬܺܐܡܰܪ ܠܳܗ̇. ܘܢܶܗܘܶܐ ܒܡܰܥܠܳܗ̇. ܘܗܺܝ ܡܶܫܬܰܓܢܝܳܐ.
14 ܘܰܗܘܳܐ ܕܟܰܕ ܫܡܰܥ ܐܰܚܺܝܳܐ ܩܳܠܳܐ ܕܖ̈ܶܓܠܶܝܗ̇ ܟܰܕ ܥܳܐܠܳܐ ܒܬܰܪܥܳܐ. ܘܶܐܡܰܪ ܠܳܗ̇. ܥܽܘܠܝ ܐܰܢ̱ܬܬܶܗ ܕܝܽܘܪܰܒܥܰܡ ܠܡܳܢܳܐ ܡܶܫܬܰܓܢܝܰܬܝ. ܘܶܐܢܳܐ ܡܫܰܕܰܪ ܐ̱ܢܳܐ ܕܺܐܡܰܪ ܥܠܰܝܟܝ ܡ̈ܶܠܶܐ ܩܰܫ̈ܝܳܬܳܐ.
15 ܙܶܠܝ ܐܶܡܰܪܝ ܠܝܽܘܪܰܒܥܰܡ. ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܐܶܢܳܐ ܐܰܪܺܝܡܬܳܟ ܡܶܢ ܥܰܡܳܐ. ܘܝܰܗܒܬܳܟ ܡܰܠܟܳܐ ܥܰܠ ܥܰܡܝ ܝܺܣܪܳܐܶܝܠ.
16 ܘܰܢܣܰܒܬܳܗ̇ ܡܰܠܟܽܘܬܳܐ ܡܶܢ ܒܶܝܬ ܕܰܘܺܝܕ. ܘܝܶܗܒܶܬ ܠܳܟ. ܘܠܳܐ ܗܘܰܝܬ ܐܰܝܟ ܕܰܘܺܝܕ ܥܰܒܕܝ. ܕܰܢܛܰܪ ܦܽܘܩܕܳܢܰܝ̈. ܘܗܰܠܶܟ ܒܢܳܡܽܘܣܰܝ̈ ܒܟܽܠܶܗ ܠܶܒܶܗ. ܠܡܶܥܒܰܕ ܕܫܰܦܺܝܪ ܩܕܳܡܰܝ.
17 ܘܰܐܢ̱ܬ ܐܰܒܐܶܫܬ ܠܡܶܥܒܰܕ ܡܶܢ ܟܽܠ ܡܰܠ̈ܟܶܐ ܕܰܗܘܰܘ ܩܕܳܡܰܝܟ. ܘܶܐܙܰܠܬ ܥܒܰܕܬ ܠܳܟ ܦܬܰܟܖ̈ܶܐ ܕܥܰܡ̈ܡܶܐ. ܘܨܰܠ̈ܡܶܐ ܠܰܡܓܰܕܳܦܽܘ ܩܕܳܡܰܝ. ܘܕܶܚܠܰܬܝ ܫܕܰܝܬ ܒܶܣܬܰܪ ܨܰܘܪܳܟ.