2 Chronicles 15
The second Book of Chronicles
܀ ܒ ܕܘܒܪ ܝܘܡ̈ܬܐ ܝܗ ܀
1 ܘܥܰܙܰܪܝܳܐ ܒܰܪ ܥܳܙܽܘܪ. ܫܪܳܬ ܥܠܰܘܗܝ ܪܽܘܚܳܐ ܡܶܢ ܩܕܳܡ ܡܳܪܝܳܐ.
2 ܘܰܢܦܰܩ ܩܕܳܡ ܐܳܣܳܐ. ܘܶܐܡܰܪ ܠܶܗ. ܫܡܰܥܰܝܢܝ ܐܳܣܳܐ ܘܟܽܠܶܗ ܝܺܗܽܘܕܳܐ. ܘܒܶܢܝܳܡܶܝܢ. ܡܳܪܝܳܐ ܥܰܡܟܽܘܢ ܗܽܘ ܠܥܳܠܰܡ ܥܳܠܡܺܝܢ. ܐܶܢ ܬܶܒܥܽܘܢܳܝܗܝ. ܢܶܫܬܟܰܚ ܠܟܽܘܢ ܘܶܐܢ ܬܶܫܒܩܽܘܢܶܗ. ܢܶܫܒܽܘܩܟܽܘܢ.
3 ܝܰܘ̈ܡܳܬܳܐ ܣܰܓܺܝ̈ܐܶܐ ܠܺܝܣܪܳܐܶܝܠ. ܕܠܳܐ ܦܠܰܚܘ ܠܰܐܠܳܗܗܽܘܢ ܒܩܽܘܫܬܳܐ. ܘܠܳܐ ܩܰܒܶܠܘ ܡܶܢ ܟܳܗܢܰܝ̈ܗܽܘܢ ܘܠܳܐ ܫܡܰܥܘ ܢܳܡܽܘܣܰܝ̈ܗܽܘܢ. ܘܶܐܫܬܠܶܡܘ ܠܺܐܝܕܳܐ ܕܰܒܥܶܠܕܒ̈ܳܒܶܐ.
4 ܘܟܰܕ ܥܳܩܰܬ ܠܗܽܘܢ. ܨܰܠܺܝܘ ܩܕܳܡ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܘܰܒܥܰܐܗܝ. ܘܶܐܫܬܟܰܚ ܠܗܽܘܢ.
5 ܘܰܒܙܰܒܢ̈ܳܬܐ ܗܳܠܶܝܢ ܩܰܕܡܳܝ̈ܳܬܳܐ. ܟܰܕ ܠܰܐܠܳܗܰܢ ܠܳܐ ܕܳܚܠܺܝܢ ܗܘܰܝܢ. ܠܳܐ ܐܺܝܬ ܗܘܳܐ ܫܠܳܡ. ܠܳܐ ܠܡܰܢ ܕܢܳܦܶܩ. ܘܠܳܐ ܠܡܰܢ ܕܥܳܐܶܠ. ܡܶܛܽܠ ܕܒܺܝܫܬܳܐ ܪܰܒܬܳܐ ܐܶܬܳܬ ܗܘܳܬ ܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ.
6 ܘܶܐܬܒܰܕܰܪܢ ܒܟܽܠ ܥܰܡ ܘܥܰܡ. ܘܒܰܝܢܳܬ ܩܽܘܖ̈ܝܳܐ. ܘܒܰܝܢܳܬ ܡܕܺܝ̈ܢܳܬܳܐ.
7 ܡܶܛܽܠ ܕܰܫܒܰܩܢ ܗܘܰܝܢ ܠܡܳܪܝܳܐ ܐܰܠܳܗܰܢ. ܘܠܳܐ ܨܳܒܶܝܢ ܗܘܰܝܢ ܠܡܶܫܡܰܥ ܒܩܳܠܳܐ ܕܥܰܒܕܰܘ̈ܗܝ ܢܒܺܝ̈ܶܐ. ܘܳܐܦ ܗܽܘ ܦܰܪܥܰܢ ܐܰܓܪܳܐ ܕܰܥܒܳܕܰܝ̈ܢ.
8 ܘܟܰܕ ܫܡܰܥ ܐܳܣܳܐ ܦܶܬܓܳܡ̈ܶܐ ܗܳܠܶܝܢ ܕܥܰܙܰܪܝܳܐ ܒܰܪ ܥܳܙܽܘܪ ܢܒܺܝܳܐ. ܐܶܬܥܰܫܰܢ. ܘܰܐܥܒܰܪ ܨܰܠ̈ܡܶܐ ܡܶܢ ܟܽܠܳܗ̇ ܐܰܪܥܳܐ ܕܺܝܗܽܘܕܳܐ ܘܰܕܒܶܢܝܳܡܶܝܢ. ܘܡܶܢ ܩܽܘܖ̈ܝܳܐ ܕܶܐܚܰܕ ܒܰܐܪܥܳܐ ܕܰܐܦܪܶܝܡ. ܘܚܰܕܶܬ ܡܰܕܒܚܳܐ ܕܡܳܪܝܳܐ ܕܰܗܘܳܐ ܩܕܳܡ ܣܪܽܘܓܳܐ.
9 ܘܟܰܢܶܫ ܟܽܠܗܽܘܢ ܕܒܶܝܬ ܝܺܗܽܘܕܳܐ ܘܰܒܢܰܝ̈ ܒܶܢܝܳܡܶܝܢ. ܘܡܶܢ ܩܽܘܖ̈ܝܳܐ ܕܶܐܚܰܕ ܒܰܐܪܥܳܐ ܕܰܐܦܪܶܝܡ. ܘܓܺܝܽܘܖ̈ܶܐ ܕܰܒܗܽܘܢ ܡܶܢ ܕܒܶܝܬ ܐܰܦܪܶܝܡ. ܘܡܶܢ ܕܒܶܝܬ ܡܢܰܫܶܐ. ܘܡܶܢ ܕܒܶܝܬ ܫܶܡܥܽܘܢ. ܡܶܛܽܠ ܕܶܐܬܟܰܢܰܫܘ ܘܶܐܬܰܘ ܠܘܳܬܶܗ ܡܶܢ ܒܶܝܬ ܝܺܣܪܳܐܶܝܠ. ܣܽܘܓܳܐܐ. ܟܰܕ ܚܙܰܘ ܕܡܳܪܝܳܐ ܐܰܠܳܗܶܗ ܥܰܡܶܗ.
10 ܘܶܐܬܟܰܢܰܫܘ ܒܽܐܘܪܺܫܠܶܡ ܒܝܰܪܚܳܐ ܬܠܺܝܬܳܝܳܐ ܒܰܫܢܰܬ ܚܰܡܫܰܥܶܣܖ̈ܶܐ ܕܡܰܠܟܽܘܬܶܗ ܕܳܐܣܳܐ.
11 ܘܕܰܒܰܚܘ ܕܶܒܚ̈ܶܐ ܠܡܳܪܝܳܐ ܒܝܰܘܡܳܐ ܗܰܘ. ܡܶܢ ܒܶܙܬܳܐ ܕܰܐܝܬܺܝܘ. ܬܰܘܖ̈ܶܐ ܫܒܰܥܡܳܐܐ. ܘܥܳܢ̈ܳܐ ܫܬܳܐ ܐܰܠܦܺܝ̈ܢ.
12 ܘܺܝܡܰܘ ܡܰܘܡܳܬܳܐ. ܕܰܢܨܰܠܽܘܢ ܩܕܳܡ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܗܽܘܢ. ܒܟܽܠܶܗ ܠܶܒܗܽܘܢ. ܘܰܒܟܽܠܳܗ̇ ܢܰܦܫܗܽܘܢ.
13 ܘܟܽܠܡܰܢ ܕܠܳܐ ܢܨܰܠܶܐ ܩܕܳܡ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܢܡܽܘܬ. ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ. ܘܡܶܢ ܓܰܒܖ̈ܶܐ ܘܰܥܕܰܡܳܐ ܠܢܶܫ̈ܶܐ.
14 ܘܺܝܡܰܘ ܠܡܳܪܝܳܐ ܒܩܳܠܳܐ ܪܳܡܳܐ. ܘܰܒܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ.
15 ܘܰܚܕܺܝܘ ܟܽܠܗܽܘܢ ܕܒܶܝܬ ܝܺܗܽܘܕܳܐ. ܥܰܠ ܛܶܒܳܐ ܗܳܢܳܐ ܕܰܫܡܰܥܘ. ܡܶܛܽܠ ܕܡܶܢ ܟܽܠܶܗ ܠܶܒܗܽܘܢ ܒܥܰܐܗܝ. ܘܡܶܢ ܟܽܠܳܗ̇ ܢܰܦܫܗܽܘܢ ܨܰܠܺܝܘ ܩܕܳܡܰܘܗܝ. ܘܶܐܫܬܟܰܚ ܠܗܽܘܢ. ܘܦܰܨܺܝ ܐܶܢܽܘܢ ܡܶܢ ܟܽܠܗܽܘܢ ܒܰܥ̈ܠܰܝ ܬܚܽܘܡܗܽܘܢ.
16 ܘܳܐܦ ܠܡܰܠܟܳܐ ܐܶܡܶܗ ܕܳܐܣܳܐ. ܐܰܥܒܪܳܗ̇ ܡܶܢ ܡܰܠܟܽܘܬܳܗ̇. ܥܰܠ ܕܥܶܒܕܰܬ ܥܺܐܕܳܐ ܠܨܰܠܡܶܝ̈ܗ̇ ܘܦܰܣܶܩ ܐܳܣܳܐ ܠܨܰܠܡܶܝ̈ܗ̇ ܘܰܐܘܩܶܕ ܐܶܢܽܘܢ ܒܢܰܚܠܳܐ ܕܩܶܕܪܽܘܢ.
17 ܘܡܰܕܒ̈ܚܶܐ ܠܳܐ ܦܪܰܩܘ ܡܶܢ ܝܺܣܪܳܐܶܝܠ. ܒܪܰܡ ܠܶܒܶܗ ܕܳܐܣܳܐ. ܫܠܶܡ ܗܘܳܐ ܠܕܶܚܠܬܶܗ ܕܡܳܪܝܳܐ ܐܰܠܳܗܶܗ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ.
18 ܘܰܐܝܬܺܝ ܩܽܘܕܫܳܐ ܕܰܐܒܽܘܗܝ. ܘܩܽܘܕܫܳܐ ܕܺܝܠܶܗ ܠܒܰܝܬܶܗ ܕܡܳܪܝܳܐ. ܟܶܣܦܳܐ ܘܕܰܗܒܳܐ ܘܡܳܐܢ̈ܶܐ.