2 Chronicles 27
The second Book of Chronicles
܀ ܒ ܕܘܒܪ ܝܘܡ̈ܬܐ ܟܙ ܀
1 ܒܰܪ ܥܶܣܪܺܝܢ ܘܚܰܡܶܫ ܫܢܺܝ̈ܢ ܝܽܘܬܳܡ. ܟܰܕ ܩܳܡ ܒܡܰܠܟܽܘܬܳܐ. ܘܫܶܬܬܰܥܶܣܖ̈ܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܫܡܳܐ ܕܶܐܡܶܗ. ܝܶܪܽܘܫܳܐ ܒܰܪܬ ܨܳܕܽܘܩ.
2 ܘܰܥܒܰܕ ܕܫܰܦܺܝܪ ܩܕܳܡ ܡܳܪܝܳܐ. ܐܰܝܟܰܢܳܐ ܕܰܥܒܰܕ ܥܽܘܙܺܝܳܐ ܐܰܒܽܘܗܝ ܒܰܠܚܽܘܕ ܠܳܐ ܥܰܠ ܠܒܰܝܬܶܗ ܕܡܳܪܝܳܐ. ܘܰܥܕܰܡܳܐ ܠܗܳܫܳܐ ܥܰܡܳܐ ܡܚܰܒܠܺܝܢ ܗܘܰܘ.
3 ܘܗܽܘ ܒܢܳܐ ܬܰܪܥܳܐ ܕܒܰܝܬܶܗ ܕܡܳܪܝܳܐ ܥܶܠܳܝܳܐ. ܘܳܐܦ ܒܫܽܘܪܳܐ ܕܶܐܬܓܡܰܪ. ܒܢܳܐ ܣܰܓܺܝ ܛܳܒ.
4 ܘܩܽܘܖ̈ܝܳܐ ܒܢܳܐ ܒܰܐܪܥܳܐ ܕܺܝܗܽܘܕܳܐ ܘܰܒܚܰܪܫܰܬ ܒܢܳܐ ܒܺܝܖ̈ܳܬܳܐ ܘܡܰܓ̈ܕܠܶܐ.
5 ܘܗܽܘ ܐܶܬܟܰܬܰܫ ܗܘܳܐ ܥܰܡ ܥܰܡܳܐ ܕܰܒܢܰܝ̈ ܥܰܡܽܘܢ. ܘܶܐܬܬܰܩܰܦ ܥܠܰܝܗܽܘܢ. ܘܝܰܗܒܘ ܠܶܗ ܒܢܰܝ̈ ܥܰܡܽܘܢ ܒܫܰܢ̱ܬܳܐ ܗܳܝ. ܡܳܐܐ ܟܰܟܖ̈ܺܝܢ ܕܟܶܣܦܳܐ. ܘܥܶܣܪܳܐ ܐܰܠܦܺܝ̈ܢ ܟܽܘܖ̈ܶܐ ܕܚ̈ܶܛܶܐ. ܘܥܶܣܪܳܐ ܐܰܠܦܺܝ̈ܢ ܟܽܘܖ̈ܶܐ ܕܰܣܥܳܖ̈ܶܐ. ܗܳܢܳܐ ܟܽܠܶܗ ܩܽܘܪܒܳܢܳܐ. ܚܫܰܒܘ ܘܩܰܪܶܒܘ ܠܶܗ ܒܢܰܝ̈ ܥܰܡܽܘܢ.
6 ܘܰܒܫܰܢ̱ܬܳܐ ܕܬܰܪܬܶܝܢ ܘܕܰܬܠܳܬ. ܐܶܬܥܰܫܰܢ ܝܽܘܬܳܡ. ܡܶܛܽܠ ܕܰܐܬܩܶܢ ܐܽܘܖ̈ܚܳܬܶܗ ܩܕܳܡ ܡܳܪܝܳܐ ܐܰܠܳܗܶܗ.
7 ܘܫܰܪܟܳܐ ܕܦܶܬܓܳܡܰܘ̈ܗܝ ܕܝܽܘܬܳܡ. ܘܟܽܠܗܽܘܢ ܩܖ̈ܳܒܰܘܗܝ ܐܘܖ̈ܚܳܬܶܗ. ܗܶܢܽܘܢ ܟܬܺܝܒܺܝܢ ܥܰܠ ܣܶܦܪܳܐ ܕܡܰܠ̈ܟܶܐ ܕܺܝܣܪܳܐܶܝܠ ܘܕܺܝܗܽܘܕܳܐ.
8 ܘܰܫܟܶܒ ܝܽܘܬܳܡ ܥܰܡ ܐܰܒܳܗܰܘ̈ܗܝ. ܘܶܐܬܩܒܰܪ ܒܰܩܪܺܝܬܳܐ ܕܕܰܘܺܝܕ. ܘܰܐܡܠܶܟ ܐܳܚܳܙ ܒܪܶܗ ܒܳܬܪܶܗ.