2 Chronicles 26
The second Book of Chronicles
܀ ܒ ܕܘܒܪ ܝܘܡ̈ܬܐ ܟܘ ܀
1 ܘܰܕܒܰܪܘ ܟܽܠܶܗ ܥܰܡܳܐ ܕܺܝܗܽܘܕܳܐ ܠܥܽܘܙܺܝܳܐ ܒܪܶܗ. ܒܰܪ ܫܶܬܬܰܥܶܣܪܶܐ ܗܘܳܐ ܫܢܺܝ̈ܢ. ܘܰܐܩܺܝܡܽܘܗܝ ܒܡܰܠܟܽܘܬܳܐ. ܒܳܬܰܪ ܐܰܒܽܘܗܝ ܐܰܡܽܘܨܺܝܳܐ.
2 ܗܽܘ ܒܢܳܐ ܠܰܐܝܠܰܬ. ܘܦܰܢܝܳܗ̇ ܠܰܕܒܶܝܬ ܝܺܗܽܘܕܳܐ. ܡܶܢ ܒܳܬܰܪ ܕܰܫܟܶܒ ܡܰܠܟܳܐ ܥܰܡ ܐܰܒܳܗ̈ܳܬܶܗ.
3 ܥܽܘܙܺܝܳܐ ܒܰܪ ܫܶܬܬܰܥܶܣܖ̈ܶܐ ܗܘܳܐ ܫܢܺܝ̈ܢ. ܟܰܕ ܩܳܡ ܒܡܰܠܟܽܘܬܳܐ. ܘܚܰܡܫܺܝܢ ܘܬܰܪܬܶܝܢ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ. ܘܰܫܡܳܐ ܕܶܐܡܶܗ ܐܶܠܥܳܣܳܐ ܡܶܢ ܐܽܘܪܺܫܠܶܡ.
4 ܘܰܥܒܰܕ ܕܫܰܦܺܝܪ ܩܕܳܡ ܡܳܪܝܳܐ. ܐܰܝܟܰܢܳܐ ܕܰܥܒܰܕ ܕܰܘܺܝܕ ܐܰܒܽܘܗܝ.
5 ܘܰܗܘܳܐ ܡܨܰܠܶܐ ܩܕܳܡܰܘܗܝ. ܒܝܰܘ̈ܡܰܝ ܙܟܰܪܝܳܐ. ܕܰܗܘܳܐ ܡܦܺܝܣ ܠܶܗ ܒܕܶܚܠܬܶܗ ܕܡܳܪܝܳܐ. ܘܰܗܘܳܐ ܡܳܪܝܳܐ ܡܰܬܩܶܢ ܟܽܠܗܶܝܢ ܐܽܘܖ̈ܚܳܬܶܗ.
6 ܘܰܢܦܰܩ ܘܶܐܬܟܰܬܰܫ ܥܰܡ ܦܠܶܫܬܳܝ̈ܶܐ. ܘܰܬܪܰܥ ܫܽܘܪܳܐ ܕܓܳܬ ܘܰܕܥܳܐܙܳܐ ܘܕܰܐܫܕܽܘܕ.
7 (ܠܝܬ)
8 ܘܰܗܘܳܐ ܐܳܙܶܠ ܫܡܶܗ. ܥܕܰܡܳܐ ܠܰܐܪܥܳܐ ܕܡܶܨܪܶܝܢ. ܡܶܛܽܠ ܕܡܰܣܓܶܐ ܗܘܳܐ ܠܡܶܥܒܰܕ ܩܪܳܒܳܐ.
9 ܘܰܒܢܳܐ ܠܶܗ ܥܽܘܙܺܝܳܐ ܡܰܓ̈ܕܠܶܐ ܒܽܐܘܪܺܫܠܶܡ. ܥܰܠ ܬܰܪܥܳܐ ܕܙܳܘܺܝܬܳܐ. ܘܥܰܠ ܬܰܪܥܳܐ ܡܰܥܪܒܳܝܳܐ. ܘܰܚܙܰܩ ܐܶܢܽܘܢ ܒܩܰܖ̈ܢܳܬܗܽܘܢ ܒܰܩܠܺܝܕ̈ܶܐ ܕܦܰܪܙܠܳܐ.
10 ܘܰܒܢܳܐ ܡܰܓ̈ܕܠܶܐ ܣܰܓܺܝ̈ܐܶܐ ܒܩܽܘܖ̈ܝܳܐ ܕܰܗܘܰܝ̈ ܠܶܗ. ܘܰܥܒܰܕ ܠܶܗ ܒܺܝܖ̈ܳܬܳܐ ܣܰܓܺܝ ܡܶܛܽܠ ܕܢܶܟܣ̈ܶܐ ܣܰܓܺܝ̈ܐܶܐ ܐܺܝܬ ܗܘܰܘ ܠܶܗ. ܘܰܒܦܰܩ̈ܥܳܬܳܐ ܘܰܒܛܽܘܖ̈ܶܐ. ܐܰܟܳܖ̈ܶܐ ܘܦܰܠܳܚ̈ܶܐ ܗܘܰܘ ܠܶܗ. ܡܶܛܽܠ ܕܩܶܢܝܳܢܳܐ ܣܰܓܺܝ ܗܘܳܐ ܠܶܗ.
11 ܘܰܗܘܰܘ ܠܥܽܘܙܺܝܳܐ. ܓܰܒܖ̈ܶܐ ܓܰܢ̱ܒܳܖ̈ܰܝ ܚܰܝܠܳܐ ܥܳܒܕܰܝ̈ ܩܪܳܒܳܐ.
12 ܒܡܶܢܝܳܢܳܐ ܬܠܳܬܺܝܢ ܘܰܬܪܶܝܢ ܐܰܠܦܺܝ̈ܢ ܘܫܶܬܡܳܐܐ.
13 ܘܰܐ̱ܚܖ̈ܳܢܶܐ ܥܳܡܖ̈ܰܝ ܕܰܒܪܳܐ ܗܘܰܘ ܠܶܗ ܬܠܳܬܡܳܐܐ ܐܰܠܦܺܝ̈ܢ. ܘܓܰܒܖ̈ܶܐ ܐܳܣܖ̈ܰܝ ܣܰܝܦܳܐ. ܗܘܰܘ ܠܶܗ ܫܰܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ.
14 ܕܰܗܘܰܘ ܩܳܝܡܺܝܢ ܟܽܠ ܝܽܘܡ. ܘܢܳܛܪܺܝܢ ܠܡܰܠܟܳܐ.
15 ܘܰܢܦܰܩ ܫܡܶܗ ܒܟܽܠܗܶܝܢ ܡܕܺܝ̈ܢܳܬܳܐ. ܥܕܰܡܳܐ ܕܰܐܣܓܺܝ ܗܘܳܐ ܠܡܶܥܬܰܪ.
16 ܘܟܰܕ ܥܬܰܪ ܗܘܳܐ ܒܢܶܟܣ̈ܶܐ. ܐܶܬܬܪܺܝܡܰܬ ܪܽܘܚܶܗ ܛܳܒ. ܘܟܰܕܶܒ ܒܡܳܪܝܳܐ ܐܰܠܳܗܶܗ. ܘܥ̣ܰܠ ܗܘܳܐ ܠܗܰܝܟܠܳܐ ܕܡܳܪܝܳܐ ܠܡܰܣܳܩܽܘ ܩܰܛܖ̈ܽܘܩܶܐ ܕܒܶܣ̈ܡܶܐ.
17 ܘܥ̣ܰܠ ܗܘܳܐ ܒܳܬܪܶܗ ܥܽܘܙܺܝܳܐ ܟܳܗܢܳܐ. ܘܶܐܡܰܪ ܠܶܗ.
18 ܠܳܐ ܗܘܳܬ ܕܺܝܠܳܟ ܡܰܠܟܳܐ ܕܽܘܟܬܳܐ. ܘܳܐܦܠܳܐ ܘܳܠܶܐ ܠܳܟ ܕܬܰܣܶܩ ܒܶܣ̈ܡܶܐ ܥܰܠ ܡܰܕܒܚܳܐ.
19 ܘܒܳܗ̇ ܒܫܳܥܬܳܐ ܐܶܙܕܥܶܦ ܥܽܘܙܺܝܳܐ ܡܰܠܟܳܐ ܥܰܠ ܟܳܗ̈ܢܶܐ. ܘܰܦܩܰܕ ܕܢܰܦܩܽܘܢ ܐܶܢܽܘܢ ܡܶܢ ܒܶܝܬ ܡܰܩܕܫܳܐ. ܘܒܳܗ̇ ܒܫܳܥܬܳܐ ܗܳܝ. ܓܰܪܒܳܐ ܢܦܰܩ ܡܶܢ ܒܶܝܬ ܡܰܩܕܫܳܐ. ܘܰܢܦܰܠ ܥܰܠ ܒܶܝܬ ܥܰܝܢܰܘ̈ܗܝ ܕܡܰܠܟܳܐ ܥܽܘܙܺܝܳܐ. ܟܰܕ ܥܰܠ ܠܰܡܩܰܪܳܒܽܘ ܒܶܣ̈ܡܶܐ ܒܒܰܝܬܶܗ ܕܡܳܪܝܳܐ.
20 ܘܶܐܬܦܢܺܝ ܠܘܳܬܶܗ ܥܽܘܙܺܝܳܐ ܟܳܗܢܳܐ ܘܫܰܪܟܳܐ ܕܟܳܗ̈ܢܶܐ. ܘܰܚܙܰܘ ܕܡܶܣܬܰܪܗܰܒ ܗܘܳܐ ܠܡܶܦܰܩ. ܡܶܛܽܠ ܕܺܝܕܰܥ ܕܰܡܚܳܝܗܝ ܡܳܪܝܳܐ.
21 ܘܰܗܘܳܐ ܥܽܘܙܺܝܳܐ ܡܰܠܟܳܐ ܝܳܬܶܒ ܒܓܰܪܒܶܗ ܥܕܰܡܳܐ ܠܡܰܘܬܶܗ. ܘܝܳܬܶܒ ܗܘܳܐ ܒܒܰܝܬܳܐ ܕܰܚܕܳܝܽܘܬܳܐ ܟܰܕ ܓܪܶܒ. ܡܶܛܽܠ ܕܓܰܕܶܦ ܗܘܳܐ ܥܰܠ ܒܰܝܬܶܗ ܕܡܳܪܝܳܐ. ܘܝܽܘܬܳܡ ܒܪܶܗ ܫܰܠܺܝܛ ܗܘܳܐ ܥܰܠ ܒܰܝܬܶܗ ܕܡܰܠܟܳܐ. ܘܕܳܐܶܢ ܗܘܳܐ ܠܥܰܡܳܐ ܕܰܐܪܥܳܐ.
22 ܘܫܰܪܟܳܐ ܕܦܶܬܓܳܡܰܘ̈ܗܝ ܕܥܽܘܙܺܝܳܐ. ܩܰܕܡܳܝ̈ܶܐ ܘܰܐ̱ܚܖ̈ܳܝܶܐ. ܗܳܐ ܗܶܢܽܘܢ ܟܬܺܝܒܺܝܢ ܒܶܐܫܰܥܝܳܐ ܒܪܶܗ ܕܰܐܡܽܘܨ ܢܒܺܝܳܐ.
23 ܘܰܫܟܶܒ ܥܽܘܙܺܝܳܐ ܥܰܡ ܐܰܒܳܗ̈ܳܬܶܗ. ܘܩܰܒܪܽܘܗܝ ܒܶܝܬ ܩܒܽܘܖ̈ܶܐ. ܠܳܐ ܒܰܩܒܽܘܪܬܳܐ ܕܡܰܠ̈ܟܶܐ. ܡܶܛܽܠ ܕܳܐܡܪܺܝܢ ܕܓܰܪܒܰܐ ܗ̱ܘ. ܘܰܐܡܠܶܟ ܝܽܘܬܳܡ ܒܪܶܗ ܒܳܬܪܶܗ.