2 Chronicles 25
The second Book of Chronicles
܀ ܒ ܕܘܒܪ ܝܘܡ̈ܬܐ ܟܗ ܀
1 ܒܰܪ ܥܶܣܪܺܝܢ ܗܘܳܐ ܘܚܰܡܶܫ ܫܢܺܝ̈ܢ ܐܰܡܽܘܨܺܝܳܐ. ܟܰܕ ܩܳܡ ܒܡܰܠܟܽܘܬܳܐ. ܘܥܶܣܪܺܝܢ ܘܰܬܫܰܥ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܫܡܳܐ ܕܶܐܡܶܗ ܝܳܗܽܘܥܰܕܳܢ ܡܶܢ ܐܽܘܪܺܫܠܶܡ.
2 ܘܰܥܒܰܕ ܕܫܰܦܺܝܪ ܩܕܳܡ ܡܳܪܝܳܐ. ܒܰܠܚܽܘܕ ܠܳܐ ܒܠܶܒܳܐ ܫܰܠܡܳܐ.
3 ܘܰܗܘܳܐ ܕܟܰܕ ܥܶܫܢܰܬ ܡܰܠܟܽܘܬܳܐ ܒܺܐܝܕܶܗ. ܩܰܛܶܠ ܠܥܰܒܕܰܘ̈ܗܝ ܕܰܩܛܰܠܘ ܠܡܰܠܟܳܐ ܐܰܒܽܘܗܝ.
4 ܘܠܰܒܢܰܝ̈ܗܽܘܢ ܕܩܳܛܽܘ̈ܠܶܐ ܠܳܐ ܩܰܛܶܠ ܡܶܛܽܠ ܕܗܳܟܰܢܳܐ ܟܬܺܝܒ ܒܣܶܦܪܳܐ ܕܢܳܡܽܘܣܶܗ ܕܡܽܘܫܶܐ. ܕܦܰܩܶܕ ܡܳܪܝܳܐ. ܘܶܐܡܰܪ. ܕܠܳܐ ܢܡܽܘܬܽܘܢ ܐܰܒܳܗ̈ܶܐ ܥܰܠ ܐܰܦܰܝ̈ ܒܢܰܝ̈ܳܐ ܘܰܒܢܰܝ̈ܳܐ ܠܳܐ ܢܡܽܘܬܽܘܢ ܥܰܠ ܐܰܦܰܝ̈ ܐܰܒܳܗ̈ܶܐ. ܐ̱ܢܳܫ ܒܰܚܛܳܗܰܘ̈ܗܝ ܢܡܽܘܬ.
5 ܘܟܰܢܶܫ ܐܰܡܽܘܨܺܝܳܐ ܠܰܕܒܶܝܬ ܝܺܗܽܘܕܳܐ. ܘܰܐܩܺܝܡ ܐܶܢܽܘܢ ܠܒܶܝܬ ܐܰܒܳܗܰܝ̈ܗܽܘܢ. ܠܪܰܘܖ̈ܒܳܢܰܝ ܐܰܠܦ̈ܶܐ. ܘܰܠܪܰܘܖ̈ܒܳܢܰܝ ܡܰܐܘ̈ܳܬܳܐ. ܘܰܠܟܽܠܶܗ ܝܺܗܽܘܕܳܐ ܘܒܶܢܝܳܡܶܝܢ. ܘܰܡܢܳܐ ܐܶܢܽܘܢ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܘܶܐܫܟܰܚ ܐܶܢܽܘܢ ܬܠܳܬܡܳܐܐ ܐܰܠܦܺܝ̈ܢ ܓܰܒܖ̈ܶܐ. ܥܠܰܝ̈ܡܶܐ ܢܳܦܩܰܝ̈ ܠܰܩܪܳܒܳܐ. ܫܳܡܛܰܝ̈ ܣܰܝ̈ܦܶܐ. ܘܰܐܚܺܝ̈ܕܰܝ ܣܰܟܖ̈ܶܐ.
6 ܘܶܐܓܰܪ ܡܶܢ ܝܺܣܪܳܐܶܝܠ. ܡܳܐܐ ܐܰܠܦܺܝ̈ܢ ܓܰܒܖ̈ܶܐ ܓܰܢ̱ܒܳܖ̈ܰܝ ܚܰܝܠܳܐ. ܒܰܡܳܐܐ ܟܰܟܖ̈ܺܝܢ ܟܶܣܦܳܐ.
7 ܘܰܢܒܺܝܶܗ ܕܡܳܪܝܳܐ ܐܶܬܳܐ ܠܘܳܬܶܗ. ܘܶܐܡܰܪ ܠܶܗ ܡܰܠܟܳܐ. ܠܳܐ ܢܶܥܽܘܠ ܥܰܡܳܟ ܟܽܠܶܗ ܚܰܝܠܳܐ ܕܺܝܣܪܳܐܶܝܠ. ܡܶܛܽܠ ܕܠܳܐ ܐܺܝܬ ܡܳܪܝܳܐ ܥܰܡ ܟܽܠܶܗ ܝܺܣܪܳܐܶܝܠ. ܘܠܳܐ ܥܰܡ ܟܽܠܗܽܘܢ ܕܒܶܝܬ ܐܰܦܪܶܝܡ.
8 ܡܶܛܽܠ ܕܰܐܢ̱ܬ ܥܳܐܶܠ ܠܡܶܥܒܰܕ ܩܪܳܒܳܐ. ܪܳܡܶܐ ܠܳܟ ܡܳܪܝܳܐ ܩܕܳܡ ܒܥܶܠܕܒܳܒܰܝ̈ܟ. ܡܶܛܽܠ ܕܠܳܐ ܫܰܒܰܚܬ ܠܡܳܪܝܳܐ. ܕܗܽܘܝܽܘ ܥܳܕܽܘܪܳܐ ܘܰܡܪܺܝܡܳܢܳܐ.
9 ܘܶܐܡܰܪ ܐܰܡܽܘܨܺܝܳܐ ܠܰܢܒܺܝܶܗ ܕܡܳܪܝܳܐ. ܡܳܢܳܐ ܥܶܒܕܶܬ ܣܰܟܠܽܘܬܳܐ. ܕܗܳܠܶܝܢ ܡܳܐܐ ܟܰܟܖ̈ܺܝܢ ܝܶܗܒܶܬ ܠܓܰܒܖ̈ܶܐ ܕܺܝܣܪܳܐܶܝܠ. ܘܶܐܡܰܪ ܠܶܗ ܢܒܺܝܶܗ ܕܰܐܠܳܗܳܐ. ܐܺܝܬ ܠܡܳܪܳܟ ܐܰܠܳܗܳܐ. ܠܡܶܬܰܠ ܠܳܟ ܣܰܓܺܝ ܡܶܢ ܗܳܢܳܐ. ܐܰܥܦܳܐ ܥܰܠ ܡܶܕܶܡ ܕܝܰܗܒܬ.
10 ܘܰܦܪܰܫ ܐܶܢܽܘܢ ܐܰܡܽܘܨܺܝܳܐ ܠܓܰܒܖ̈ܶܐ ܕܶܐܬܰܘ ܠܘܳܬܶܗ ܡܶܢ ܒܶܝܬ ܐܰܦܪܶܝܡ. ܠܡܺܐܙܰܠ ܠܕܽܘܟܰܬܗܽܘܢ. ܘܶܐܬܬܰܩܦܰܬ ܚܶܡܬܶܗ ܛܳܒ. ܒܰܕܒܶܝܬ ܝܺܣܪܳܐܶܝܠ. ܘܰܐܗܦܶܟ ܐܶܢܽܘܢ ܠܕܽܘܟܰܬܗܽܘܢ ܒܚܶܡܬܳܐ ܕܪܽܘܓܙܶܗ.
11 ܐܰܡܽܘܨܺܝܳܐ ܐܶܬܓܰܢ̱ܒܰܪ. ܘܰܕܒܰܪ ܥܰܡܶܗ. ܘܶܐܙܰܠ ܠܢܰܚܠܳܐ ܕܡܶܠܚܳܐ. ܘܩܰܛܶܠ ܘܰܚܪܰܒ ܠܰܒܢܰܝ̈ ܛܽܘܪܳܐ ܕܰܓܒܶܠ. ܥܶܣܪܳܐ ܐܰܠܦܺܝ̈ܢ.
12 ܘܥܶܣܪܳܐ ܐܰܠܦܺܝ̈ܢ ܟܰܕ ܚܰܝܺܝܢ. ܐܶܚܰܕܘ ܐܶܢܽܘܢ ܒܢܰܝ̈ ܝܺܗܽܘܕܳܐ. ܘܰܐܝܬܺܝܘ ܐܶܢܽܘܢ ܠܪܺܝܫ ܟܺܐܦ̈ܶܐ. ܘܟܽܠܗܽܘܢ ܐܶܬܰܘ ܟܰܕ ܐܰܣܺܝܪܺܝܢ ܒܫܺܫ̈ܠܳܬܳܐ.
13 ܘܰܒܢܰܝ̈ ܓܰܢ̱ܒܳܖ̈ܶܐ ܕܰܫܒܳܐ ܐܰܡܽܘܨܺܝܳܐ. ܟܰܕ ܐܶܙܰܠ ܠܰܩܪܳܒܳܐ. ܐܰܫܠܶܛ ܐܶܢܽܘܢ ܒܩܽܘܖ̈ܝܳܐ ܕܺܝܗܽܘܕܳܐ. ܘܰܒܫܳܡܖ̈ܝܶܐ ܕܥܰܡ̈ܡܶܐ. ܘܰܚܪܰܒܘ ܡܶܢܗܶܝܢ ܡܶܢ ܩܽܘܖ̈ܝܳܐ ܬܠܳܬܳܐ ܐܰܠܦܺܝ̈ܢ ܘܒܰܙܘ ܒܶܙܬܳܐ ܣܰܓܺܝܐܬܳܐ.
14 ܘܰܗܘܳܐ ܡܶܢ ܒܳܬܰܪ ܕܶܐܬܳܐ ܐܰܡܽܘܨܺܝܳܐ ܟܰܕ ܗܦܰܟ ܠܡܶܚܪܰܒ ܠܰܐܕܽܘܡܳܝ̈ܶܐ. ܐܰܝܬܺܝܘ ܠܶܗ ܐܰܠܳܗ̈ܶܐ ܕܰܒܢܰܝ̈ ܛܽܘܪܳܐ ܕܰܓܒܶܠ. ܘܰܐܩܺܝܡ ܐܶܢܽܘܢ ܩܕܳܡܰܘܗܝ. ܘܰܩܕܳܡܰܝܗܽܘܢ ܣܓܶܕ ܘܰܠܗܽܘܢ ܐܰܣܶܩ ܩܰܛܖ̈ܽܘܩܶܐ ܕܒܶܣ̈ܡܶܐ.
15 ܘܶܐܬܚܰܡܰܬ ܡܳܪܝܳܐ ܥܰܠ ܐܰܡܽܘܨܺܝܳܐ. ܘܫܰܕܰܪ ܠܘܳܬܶܗ ܢܒܺܝܳܐ. ܘܶܐܡܰܪ ܠܶܗ. ܠܡܳܢܳܐ ܨܰܠܺܝܬ ܩܕܳܡ ܐܰܠܳܗ̈ܶܐ ܕܥܰܡ̈ܡܶܐ. ܕܠܳܐ ܐܶܫܟܰܚܘ ܠܰܡܦܰܨܳܝܽܘ ܕܳܚܠܰܝ̈ܗܽܘܢ ܡܶܢ ܐܺܝܕܰܝ̈ܟ.
16 ܘܰܗܘܳܐ ܕܟܰܕ ܡܰܠܶܠ ܥܰܡܶܗ ܢܒܺܝܳܐ. ܐܶܡܰܪ ܠܶܗ. ܣܶܓܕܬܳܐ ܕܩܰܝ̈ܣܶܐ ܠܡܰܠ̈ܟܶܐ ܐܶܬܝܰܗܒܰܬ ܘܰܦܪܰܩ ܠܶܗ ܢܒܺܝܳܐ ܡܶܢܶܗ ܘܶܐܡܰܪ ܠܶܗ. ܘܳܝ ܠܳܟ. ܕܗܳܐ ܐܶܬܡܰܠܰܟ ܥܠܰܝܟ ܡܳܪܝܳܐ ܡܶܠܟܳܐ ܒܺܝܫܳܐ ܠܡܰܘܒܳܕܽܘܬܳܟ. ܘܠܳܐ ܫܡܰܥܬ ܒܩܳܠܝ.
17 ܘܶܐܬܡܰܠܰܟ ܐܰܡܽܘܨܺܝܳܐ ܡܰܠܟܳܐ ܕܒܶܝܬ ܝܺܗܽܘܕܳܐ. ܘܫܰܕܰܪ ܠܘܳܬ ܝܽܘܐܳܫ ܒܰܪ ܝܳܗܽܘܐܳܚܳܙ ܒܰܪ ܝܳܗܽܘ ܡܰܠܟܳܐ ܕܺܝܣܪܳܐܶܝܠ. ܘܶܐܡܰܪ ܠܶܗ. ܬܳܐ ܢܶܚܙܶܐ ܐܰܦ̈ܶܐ ܚܰܕ ܕܚܰܕ.
18 ܘܫܰܕܰܪ ܝܽܘܐܳܫ ܡܰܠܟܳܐ ܕܺܝܣܪܳܐܶܝܠ. ܠܘܳܬ ܐܰܡܽܘܨܺܝܳܐ ܡܰܠܟܳܐ ܕܺܝܗܽܘܕܳܐ ܘܶܐܡܰܪ ܠܶܗ. ܚܰܘܚܳܐ ܕܺܐܝܬ ܒܠܶܒܢܳܢ ܫܰܕܰܪ ܠܘܳܬ ܐܰܪܙܳܐ ܕܺܐܝܬ ܒܠܶܒܢܳܢ. ܘܶܐܡܰܪ ܠܶܗ. ܗܰܒ ܒܰܪܬܳܟ ܠܒܶܪܝ ܐܰܢ̱ܬܬܳܐ. ܘܥܶܒܪܰܬ ܚܰܝܽܘܬܳܐ ܕܺܐܝܬ ܒܠܶܒܢܳܢ. ܘܕܳܫܬܶܗ ܠܚܰܘܚܳܐ.
19 ܡܶܚܪܰܒ ܚܪܰܒܬ ܠܰܐܕܽܘܡܳܝ̈ܶܐ. ܡܶܛܽܠ ܗܳܢܳܐ ܝܺܪܶܒ ܠܶܒܳܟ. ܐܶܬܝܰܩܪ. ܘܬܶܒ ܒܒܰܝܬܳܟ. ܘܰܠܡܳܢܳܐ ܡܶܬܓܰܪܰܓ ܐܰܢ̱ܬ ܥܰܠ ܒܺܝܫܬܳܐ. ܕܬܶܦܶܠ ܐܰܢ̱ܬ ܘܟܽܠܶܗ ܝܺܗܽܘܕܳܐ ܥܰܡܳܟ.
20 ܘܠܳܐ ܫܡܰܥ ܐܰܡܽܘܨܺܝܳܐ. ܘܰܣܠܶܩ ܝܽܘܐܳܫ ܡܰܠܟܳܐ ܕܺܝܣܪܳܐܶܝܠ. ܘܰܐܡܽܘܨܺܝܳܐ ܡܰܠܟܳܐ ܕܺܝܗܽܘܕܳܐ.
21 ܘܰܣܠܶܩܘ. ܘܰܚܙܰܘ ܐܰܦ̈ܶܐ ܚܰܕ ܕܚܰܕ. ܒܒܶܝܬ ܫܡܶܫ ܩܪܺܝܬܳܐ. ܕܺܐܝܬ ܒܰܬܚܽܘܡ ܐܰܪܥܳܐ ܕܒܶܝܬ ܝܺܗܽܘܕܳܐ.
22 (ܠܝܬ)
23 ܘܶܐܚܰܕ ܝܽܘܐܳܫ ܡܰܠܟܳܐ ܕܺܝܣܪܳܐܶܝܠ. ܠܰܐܡܽܘܨܺܝܳܐ ܡܰܠܟܳܐ ܕܺܝܗܽܘܕܳܐ. ܒܒܶܝܬ ܫܡܶܫ ܩܪܺܝܬܳܐ. ܘܰܐܝܬܝܽܘܗܝ ܠܽܐܘܪܺܫܠܶܡ. ܘܰܬܪܰܥ ܒܫܽܘܪܳܐ ܕܽܐܘܪܺܫܠܶܡ. ܡܶܢ ܬܰܪܥܳܐ ܕܰܐܦܪܶܝܡ. ܘܰܥܕܰܡܳܐ ܠܬܰܪܥܳܐ ܕܙܳܘܺܝܬܳܐ. ܐܰܪܒܥܡܳܐܐ ܐܰܡܺܝ̈ܢ.
24 ܘܰܢܣܰܒ ܟܶܣܦܳܐ ܘܕܰܗܒܳܐ. ܘܡܳܐܢ̈ܶܐ ܕܶܐܫܬܟܰܚܘ ܒܒܰܝܬܶܗ ܕܡܳܪܝܳܐ. ܥܰܡ ܡܳܐܢܰܘ̈ܗܝ ܕܥܽܘܒܳܪ ܐܰܕܽܘܡ. ܘܠܰܐܘܨܖ̈ܶܐ ܕܒܶܝܬ ܡܰܠܟܳܐ. ܘܰܠܡܳܐܢ̈ܶܐ ܕܒܶܝܬ ܡܰܠܟܳܐ. ܘܰܠܡܳܐܢ̈ܶܐ ܕܕܰܗܒܳܐ. ܘܰܗܦܰܟ ܠܫܳܡܪܺܝܢ.
25 ܘܰܚܝܳܐ ܐܰܡܽܘܨܺܝܳܐ ܒܰܪ ܝܽܘܐܳܫ ܡܰܠܟܳܐ ܕܺܝܗܽܘܕܳܐ. ܡܶܢ ܒܳܬܰܪ ܕܡܺܝܬ ܝܽܘܐܳܫ ܒܰܪ ܝܳܗܘܐܳܚܳܙ ܡܰܠܟܳܐ ܕܺܝܣܪܳܐܶܝܠ. ܚܰܡܫܰܥܶܣܖ̈ܶܐ ܫܢܺܝ̈ܢ.
26 ܘܫܰܪܟܳܐ ܕܦܶܬܓܳܡܰܘ̈ܗܝ ܕܳܐܡܽܘܨܺܝܳܐ ܩܰܕܡܳܝ̈ܶܐ ܘܰܐܚܖ̈ܳܝܶܐ. ܗܳܐ ܗܶܢܽܘܢ ܟܬܺܝܒܺܝܢ ܥܰܠ ܣܶܦܪܳܐ ܕܡܰܠ̈ܟܶܐ ܕܺܝܗܽܘܕܳܐ ܘܕܺܝܣܪܳܐܶܝܠ.
27 ܘܡܶܢ ܒܳܬܰܪ ܕܰܥܒܰܪ ܐܰܡܽܘܨܺܝܳܐ ܡܶܢ ܕܶܚܠܬܶܗ ܕܡܳܪܝܳܐ. ܐܶܬܢܟܶܠܘ ܥܠܰܘܗܝ ܥܰܒܕܰܘ̈ܗܝ ܢܶܟܠܳܐ ܒܽܐܘܪܺܫܠܶܡ ܘܰܥܪܰܩ ܠܰܠܟܺܝܫ ܘܫܰܕܰܪܘ ܒܳܬܪܶܗ ܠܰܠܟܺܝܫ. ܘܩܰܛܠܽܘܗܝ ܬܰܡܳܢ.
28 ܘܫܰܩܠܽܘܗܝ ܥܰܠ ܖ̈ܰܟܫܳܐ. ܘܩܰܒܪܽܘܗܝ ܥܰܡ ܐܰܒܳܗ̈ܳܬܶܗ ܒܰܩܪܺܝܬܳܐ ܕܕܰܘܺܝܕ.