2 Chronicles 17
The second Book of Chronicles
܀ ܒ ܕܘܒܪ ܝܘܡ̈ܬܐ ܝܙ ܀
1 ܘܩܳܡ ܒܡܰܠܟܽܘܬܶܗ ܝܳܗܽܘܫܳܦܳܛ ܒܪܶܗ ܒܳܬܪܶܗ. ܘܶܐܬܥܰܫܰܢ ܥܰܠ ܝܺܣܪܳܐܶܝܠ.
2 ܘܰܐܫܠܶܛ ܓܰܒܖ̈ܶܐ ܓܰܢ̱ܒܳܖ̈ܰܝ ܚܰܝܠܳܐ. ܒܟܽܠܗܶܝܢ ܩܽܘܖ̈ܝܳܐ ܕܒܶܝܬ ܝܺܗܽܘܕܳܐ ܥܰܫܺܝ̈ܢܳܬܳܐ. ܘܰܐܩܺܝܡ ܫܰܠܺܝ̈ܛܶܐ ܒܰܐܪܥܳܐ ܕܺܝܗܽܘܕܳܐ. ܘܒܰܐܪܥܳܐ ܕܰܐܦܪܶܝܡ ܕܶܐܚܰܕ ܐܳܣܳܐ ܐܰܒܽܘܗܝ.
3 ܘܰܗܘܳܐ ܡܳܪܝܳܐ ܥܰܡ ܝܳܗܽܘܫܳܦܳܛ. ܡܶܛܽܠ ܕܗܰܠܶܟ ܒܽܐܘܖ̈ܚܳܬܶܗ ܕܕܰܘܺܝܕ ܐܰܒܽܘܗܝ ܩܰܕܡܳܝ̈ܳܬܳܐ. ܘܠܳܐ ܨܰܠܺܝ ܠܨܰܠ̈ܡܶܐ.
4 ܡܶܛܽܠ ܕܰܠܡܳܪܝܳܐ ܐܰܠܳܗܳܐ ܕܰܐܒܽܘܗܝ ܨܰܠܺܝ. ܘܰܒܦܽܘܩܕܳܢܰܘ̈ܗܝ ܗܰܠܶܟ. ܘܢܳܡܽܘܣܰܘ̈ܗܝ ܢܛܰܪ. ܘܠܳܐ ܥܒܰܕ ܐܰܝܟ ܥܰܒܕ̈ܶܐ ܕܺܝܣܪܳܐܶܝܠ.
5 ܘܰܐܬܩܶܢ ܡܳܪܝܳܐ ܡܰܠܟܽܘܬܳܐ ܒܺܐܝܕܶܗ. ܘܝܰܗܒܘ ܠܶܗ ܟܽܠܗܽܘܢ ܕܒܶܝܬ ܝܺܗܽܘܕܳܐ. ܩܽܘܖ̈ܒܳܢܶܐ ܠܝܳܗܽܘܫܳܦܳܛ. ܘܰܗܘܳܐ ܠܶܗ ܥܽܘܬܪܳܐ ܘܺܐܝܩܳܪܳܐ. ܣܽܘܓܳܐܐ ܕܛܳܒ
6 ܘܶܐܬܚܰܝܰܠ ܠܶܒܶܗ ܒܽܐܘܖ̈ܚܳܬܶܗ ܕܡܳܪܝܳܐ. ܘܬܽܘܒ ܥܩܰܪ ܡܰܕܒܚ̈ܶܐ ܘܰܥܠܰܘ̈ܳܬܳܐ ܕܰܗܘܰܘ ܒܰܬܚܽܘܡܳܐ ܕܒܶܝܬ ܝܺܗܽܘܕܳܐ.
7 ܒܰܫܢܰܬ ܬܠܳܬ ܠܡܰܠܟܽܘܬܶܗ. ܫܰܕܰܪ ܩܪܳܐ ܠܪܰܘܖ̈ܒܳܢܰܘ̈ܗܝ. ܘܖ̈ܰܒܰܝ ܚܰܝ̈ܠܶܐ. ܠܥܽܘܒܰܕܝܳܐ. ܘܠܰܙܟܰܪܝܳܐ. ܘܰܠܢܰܬܰܢܰܐܶܝܠ. ܘܠܰܡܠܰܟܝܳܐ. ܠܡܰܠܳܦܽܘ ܒܩܽܘܖ̈ܝܳܐ ܕܺܝܗܽܘܕܳܐ.
8 ܘܥܰܡܗܽܘܢ ܗܘܰܘ ܠܶܘ̈ܳܝܶܐ. ܫܡܰܥܝܳܐ. ܢܬܰܢܝܳܐ. ܙܟܰܪܝܳܐ. ܥܫܳܐܶܝܠ. ܢܳܛܽܘܪܳܐ. ܝܽܘܢܳܬܳܢ. ܐܰܕܽܘܢܺܝܳܐ. ܛܽܘܒܺܝܳܐ. ܗܳܠܶܝܢ ܟܽܠܗܽܘܢ ܠܶܘ̈ܳܝܶܐ. ܘܥܰܡܗܽܘܢ ܗܘܰܘ ܐܶܠܺܝܫܡܰܥ. ܘܝܳܗܽܘܪܳܡ ܟܳܗ̈ܢܶܐ.
9 ܘܡܰܠܦܺܝܢ ܗܘܰܘ ܒܰܐܪܥܳܐ ܕܺܝܗܽܘܕܳܐ ܟܽܠܳܗ̇. ܘܥܰܡܗܽܘܢ ܗܘܳܐ ܣܶܦܪܳܐ ܕܢܳܡܽܘܣܶܗ ܕܡܳܪܝܳܐ. ܘܡܶܬܟܰܪܟܺܝܢ ܗܘܰܘ ܒܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ. ܘܡܰܠܦܺܝܢ ܗܘܰܘ ܠܥܰܡܳܐ.
10 ܘܰܗܘܳܬ ܕܶܚܠܬܶܗ ܕܡܳܪܝܳܐ ܥܰܠ ܟܽܠܗܶܝܢ ܡܰܠܟ̈ܘܳܬܳܐ ܘܰܡܕܺܝ̈ܢܳܬܳܐ ܕܰܗܘܰܝ̈ ܚܕܳܖ̈ܰܝ ܝܺܗܽܘܕܳܐ ܘܠܳܐ ܐܶܬܟܰܬܰܫܘ ܥܰܡ ܝܳܗܽܘܫܳܦܳܛ.
11 ܘܡܶܢ ܡܕܺܝ̈ܢܳܬܳܐ ܕܰܦܠܶܫ̈ܬܳܝܶܐ ܡܰܝܬܶܝܢ ܗܘܰܘ ܠܝܳܗܽܘܫܳܦܳܛ. ܟܶܣܦܳܐ ܘܩܽܘܖ̈ܒܳܢܶܐ ܘܰܟܣܶܦ ܪܺܝܫܳܐ. ܘܳܐܦ ܥܰܖ̈ܰܒܳܝܶܐ ܡܰܝܬܶܝܢ ܗܘܰܘ ܥܳܢ̈ܳܐ. ܕܶܟܖ̈ܶܐ ܫܰܒܥܳܐ ܐܰܠܦܺܝ̈ܢ ܘܰܫܒܰܥܡܳܐܐ. ܘܬܰܝ̈ܫܶܐ ܫܰܒܥܳܐ ܐܰܠܦܺܝ̈ܢ ܘܰܫܒܰܥܡܳܐܐ ܒܫܰܢ̱ܬܳܐ ܚܕܳܐ.
12 ܘܰܗܘܳܐ ܝܳܗܽܘܫܳܦܳܛ ܐܳܙܶܠ ܘܥܳܬܰܪ. ܥܕܰܡܳܐ ܕܰܥܬܰܪ ܛܳܒ. ܘܰܒܢܳܐ ܒܺܝܗܽܘܕܳܐ ܒܺܝܖ̈ܳܬܳܐ ܘܩܽܘܖ̈ܝܳܐ ܕܰܩܦܳܣ̈ܶܐ.
13 ܘܰܥܒܺܝܕܬܳܐ ܪܰܒܬܳܐ ܗܘܳܬ ܠܶܗ ܒܰܐܪܥܳܐ ܕܺܝܗܽܘܕܳܐ. ܘܓܰܒܖ̈ܶܐ ܩܖ̈ܰܒܬܳܢܶܐ ܓܰܢ̱ܒܳܖ̈ܰܝ ܚܰܝܠܳܐ ܒܽܐܘܪܺܫܠܶܡ.
14 ܘܗܳܢܳܐ ܡܶܢܝܳܢܗܽܘܢ ܠܒܶܝܬ ܐܰܒܳܗܰܝ̈ܗܽܘܢ ܕܒܶܝܬ ܝܺܗܽܘܕܳܐ ܪܰܘܖ̈ܒܳܢܶܐ ܕܰܐܠܦ̈ܶܐ. ܥܕܺܝܢܽܘ ܓܰܢ̱ܒܪܳܐ. ܘܠܶܗ ܡܫܰܡܫܺܝܢ ܗܘܰܘ ܓܰܢ̱ܒܳܖ̈ܰܝ ܚܰܝܠܳܐ. ܬܠܳܬ ܡܳܐܐ ܐܰܠܦܺܝ̈ܢ.
15 ܘܝܽܘܚܰܢܳܢ ܪܰܒܳܐ. ܘܠܶܗ ܡܫܰܡܫܺܝܢ ܗܘܰܘ ܓܰܢ̱ܒܳܖ̈ܰܝ ܚܰܝܠܳܐ. ܡܰܐܬܶܝܢ ܘܰܬܡܳܢܺܝܢ ܐܰܠܦܺܝ̈ܢ.
16 ܘܡܶܢ ܒܳܬܪܶܗ ܫܶܡܥܺܝ ܒܰܪ ܙܳܪܳܚ ܕܰܫܦܰܪ ܠܡܳܪܝܳܐ. ܘܥܰܡܶܗ ܡܰܐܬܶܝܢ ܐܰܠܦܺܝ̈ܢ ܓܰܢ̱ܒܳܖ̈ܰܝ ܚܰܝܠܳܐ.
17 ܘܡܶܢ ܒܶܝܬ ܒܶܢܝܳܡܶܝܢ ܓܰܢ̱ܒܳܖ̈ܰܝ ܚܰܝܠܳܐ. ܐܶܠܺܝܕܰܥ ܫܡܶܗ. ܘܠܶܗ ܡܫܰܡܫܺܝܢ ܗܘܰܘ ܓܰܒܖ̈ܶܐ ܫܳܕ̈ܝܰܝ ܒܩܶܫܬܳܐ. ܘܰܐܚܺܝ̈ܕܰܝ ܣܰܟܖ̈ܶܐ. ܡܰܐܬܶܝܢ ܐܰܠܦܺܝ̈ܢ.
18 ܘܝܳܗܽܘ ܙܳܒܳܪ ܓܰܢ̱ܒܪܳܐ. ܘܠܶܗ ܡܫܰܡܫܺܝܢ ܗܘܰܘ ܡܳܐܐ ܘܰܬܡܳܢܺܝܢ ܐܰܠܦܺܝ̈ܢ. ܥܳܒܕܰܝ̈ ܩܪܳܒܳܐ.
19 ܗܳܠܶܝܢ ܟܽܠܗܽܘܢ ܕܰܡܫܰܡܫܺܝܢ ܠܡܰܠܟܳܐ ܝܳܗܽܘܫܳܦܳܛ. ܣܛܰܪ ܡܶܢ ܡܰܢ ܕܫܰܠܶܛ ܡܰܠܟܳܐ ܒܩܽܘܖ̈ܝܳܐ ܕܬܽܘܩܦܳܐ. ܒܟܽܠܳܗ̇ ܐܰܪܥܳܐ ܕܺܝܗܽܘܕܳܐ.